شكل من غير مضمون

يعني ايه شكل من غير مضمون
احساس بيجري كما المجنون
بيخبط في الحيطان تهزه الشجون
ويقطع في نفسه لجل ما يخرج حزنه
اللي جواه مسجون
شكل من غير مضمون
أصل المضمون جواه مكنون
قفل عليه 100 باب بقفل كبير
قفل من مشاعر حزن وفرح كسير
فرح بقي بيمشي يترنح زي السكير
سايب وراه خطوط هم مرير
هم مش عارف فين رايح ولا امتي جاي
بحار رحال من غير مصير
وتر مشدود
دموع من غير حدود
وكوابيس بتبني قدام الأمل سدود
وأماني بتقع
وحلم مهدود
ضهره محني باصص لتحت
لو بص قدامه
هايصحي من منامه
ويلحق يغير الطريق المسدود
ضلع بينزف
وأه من نزيف الضلوع
كل أه بتخرج تاخد حلم من غير رجوع
حتى انه يفكر يحلم بقي مش مشروع
يا تري ده كفاح ؟
ولا ده ضعف وخضوع
زمان الارض اتلونت من أمل مزروع
دلوقتي الألوان اتطفت
والفرحة اختفت
نفخ اليأس جواه
ورياحه طفت كل الشموع

زيح عني يارب

رحال من غير بيت
ولا دار ولا أهل ولا مكان
أبني عشة مكان ما أبيت
وأعيش بيها كما أي إنسان
حامل علي ضهري همومي
أقلب فيها طول يومي
واحط راسي عليها أخر الليل
لجل ما تساعدني في نومي
ولا شايلني غير همي
وحزني اللي عليا بيسمي
وساعات يدوس عليا ويوجعني
بس لجل ما أسرح في دنيا التمني
ساير حافي في بلاد الله
ورجلي تدوس في هموم وهموم
وعلي قد الهم ما جرحني
بقت خطوتي بتدوس أقوى كل يوم
يا هم متشعلق في كتافي
ويا حزن كل مني ولسة مش مستكفي
هي بسمتي وأحلامي بالنسبالك غير كافي؟؟؟
ده انا بردت حنيني لجل ما تعيش انت متدفي
أبص للسما يوجعني نور النهار
أبص قدامي ألاقي أحلامي محروقة بالنار
مش باقي منها غير رماد
سخن وتحته تقيد النار
وتحفر رجلي مكان خطوتي
حفرة مليانة بأثر ضحكتي
كل خطوة بتاخد مني
وحتة من بسمتي بتقع مني
وزعت ضحكات علي كل البلاد
ورسمت بسمات علي وشوش الولاد
مسحت دموعهم بهدومي
وأكلت همومهم بقت همومي
وضاق عليا التوب
ومبقاش يساع تاني
وأنا برضه ما بتوب
لسة بسعي تاني
وملامحي رايحة لرب العباد
زيح عني يارب
انا العبد الفقير بترجاك
زيح عني يارب
كسرت الهموم عودي
زيح عني يارب
ومليت أقول للأيام جودي
ومابتجود غير بالالم والكرب
زيح عني يارب
زيح عني يارب
زيح عني يارب
زيح عني يارب
ياااااااااااارب

قرطاس لب

قرطاس لب موجود قدامي 

فقررت أتسلي

اقعد أطلع فيه همي

لحد ما الاقي حاجة أحلي

قرطاس لب طعمه مملح

وانا طول عمري باكل ملح

طيب ليه بقي مش عاجبني

ولا انا اللي متعتي بح ؟

وكل واحد بشكل ولون

بتفكرني بحاجة في الكون

****

أول واحدة بتبتسم

شبهي وانا فرحانة

لما كنت أروح مدرستي مطبقة

أضحك وأرسم واتنطط

وأرجع في الاخر مروقة

أكل وأخرج وأزقطط

ومش باين في ملامحي أي شقي

****

تاني واحدة عنيها مغمضة

مش عاوزة تديني اللي فيها

شبهي في أسراري الغامضة

في ابتسامتي الشقية اللمضة

في لؤمي المضحك البسيط

ومكر الأطفال يوم العيد

اللي بيخبوا الطقم الجديد

ليقدم ويبقي عيد مش سعيد

****

تالت واحدة مدمعة

زي أحزاني المسمعة

وكآبة عليا بتدلع

حد عمره شاف كآبة متدلعة؟؟

ودموعها سخنة حرقت صباعي

فكرتني بألمي وأوجاعي

قمت أكلتها جري بدل الموضوع ما يكبر مني

وأقعد أعيط بدل ما انا قاعدة بغني

****

رابع واحدة هادية كده

تحسها أنا وأنا مثقفة

لابسة نضارتي وفي ايدي كتاب الفلسفة

وأقرا وابتسم وانا متكيفة

يخلص الكتاب أبقي مقريفة

أصلي بحب الفلسفة

أبدأ أفكر في الوجودية والإنسان حر ولا مجبر

وديكارت وأرسطو وأفلاطون

وتساؤلات سوفسطائية

وأدور علي الإجابات وانا متشحتفة

*****

خامس واحدة مغمضة

عنيها في نوع من الدفا

بتفكرني بلحظات الصفا

وانا بحب

أيام ما كان الحب شفا

وكنت متكتفة بالحرية

هو يعني ايه حرية متكتفة؟؟

****

سادس واحدة كانت مكسورة

فكرتني بنفسي وانا متجبسة

والدكتور واقف عنده ذهول

ازاي كسرتي الرجلين مع بعض ؟؟

انتي يا بنتي متخلفة؟؟

وقعدت أسبوعين في السرير

الجبس وجعني قمت شلته

يا دوب مر شهرين

اتجبست بعدها تاني

مش هاتصدقوا نطرة الدكتور وحالته

ياعيني أصله كان بيعاني

*****

بصيت جوة القرطاس

ياااااااااااااااه ده اللب لسة كتير قوى

وذكرياتي أكتر بكتير

وحكايتي مالهاش نهاية

بس خايفة أدخل في حواديت متعبة

وحاجات تلخبط وحكايات متشقلبة

نفسي بدأت تتكلم جوايا

قاعدة بتهمس

ريحي نفسك

وقومي هاتي بداله الترمس

طفلتي .. كم أحبك

جاءت يوماً تشكو لي بعض مخاوفها
جاءت تعرض لي أهم مطالبها
وتؤكد لي أنها ليست مطالب
بل حقوق تملكها
لم تتصور أن يأتي اليوم الذي ستضطر فيه إلي أن تطلبها
فتفوهت إليها ببعض نكاتي
لعلها تبتسم
 وأأخذها بعيداً عن همومها
كي لا أراها تنقسم
نتشبث سوياً بأمل أخير
أن الإرادة لا تنهزم
حتى وإن الحب إنهزم
لا تحزني يا صغيرتي
مازلتي في دنيا الحب طفلة
تتلمسين خطواتك من الخوف
تحولتي يا طفلتي
وترين أمامك دنيا الحب 
لأري عيناكِ تلتمع بشغف
وترسمين علي شفاهك ابتسامة صغيرة
تضج بالسعادة
ترتعش أصابعك القصيرة
لتلملم السعادة
التي تستحقينها
والآن فلتعيشينها
*****
أحياناً تجبرنا عقولنا
علي اتخاذ خطوات وإجراءات
منطقية نعم
ولكنها لا تشبع أحاسيسنا
طفلتي
إنطلقي إلي أفق أوسع
ابرحي دنيا العقل
تمتعي بجنون الحب
فأجمل ما في الحب جنونه
هذا الشئ الذي لا يمكن توقعه ويمنحنا السعادة
فلتكوني كمثل كل الفتيات
يجب أن تعبري عن غيرتك
عن سعادتك وطفولتك
حزنك وقنوطك
اقفزي واظهري شقاوتك
وصدقيني
من يعشق طفولتك
سيعشقه نضوجك
*****

انتي اللي خذلتيني

أنا ماخذلتكيش
أنا بس من غير حبك

مش عارفة أعيش

وعيوني بتقولك أرجوكي ما تمشيش

بس لساني مش قادر ينطقها

علشان قلبي شايف بسمتك

وانتي بتحضري شنطتك

وهاتسبيني وتمشي

يمكن ترجعي بعد سنين

ويمكن ما ترجعيش

ويمكن علي ما تفوقي

ترجعي ما تلاقينيش

بس أنا ماخذلتكيش

طيب ما لاحظتيش ؟؟

نظرة عين بدموع حزينة ؟

وايدي بتمسحها 

وضلوعي بتحاول تخبي آلامها 

بس عليكي ما بتخبيش

طيب مافهمتيش

نظرة الرجاء؟

ماشوفتنيش 

بصلي وبقول دعاء 

كنت عاوزاكي موجودة وماتمشيش 

***

كان نفسي أقولك محتجالك 

أو لما تمشي أقول اني جايالك 

بس بعدت المسافات 

والكلام زي السكات 

هانقول ايه ؟

كل كلامنا بقي خناقات 

بيدبح جوايا معني جميل 

ماشفتهوش 

ماحسيتهوش 

بس سمعت عنه 

حتى السمع بتستكتريه؟؟

طيب انتي حاسة بإيه؟؟

حاسة بيا وأنا بعيد؟

قلتي في يوم إني محتاجة تضميني؟؟

أو بدفا وأمان تحسسيني؟؟؟

ده انتي المعني 

ليه اتنازلتي ؟؟

اللي بينا بقي مشاعر سهلة

ايه .. اتخادتي؟؟

دي غلطتك 

انتي اللي اتنازلتي 

اتنازلتي عني في يوم 

سيبتيني أخبط في العتمة 

سيبتيني تاكلني الهموم 

بقت الدنيا كلها ضلمة 

وبقيتي زي الغريب 

بتعرفي أخباري من بعيد 

بينا سلامات 

شوية مكالمات 

خد وهات 

*** 

ليه جاية تقولي اني خذلتك ؟؟؟

طيب قوليلي امتي وجعتك 

ولا اقولك ماتقوليش 
وتقولي ليه ؟

انتي أصلا مش جاية تسمعيني 

انتي بس جاية تتهميني 

فمش هادافع 

كالعادة كنتي واحشاني 

بس سامحيني 

دلقتي علي مشاعري دش ساقع 

ووجعتيني

واسمحيلي أقولك 

انتي اللي خذلتيني

خوفك عجز

خوفك عاجز

ولا انت اللي جوة خوفك عاجز؟؟

محتاج تعيش؟؟

ولا خوفك خلاك مش عايز؟

خوفك أجوف؟؟

ولا جواك أحلام بتخوف؟

من قلة ما يئست إنها تتحقق

مابقتش شايف إنها تتصدق

 خايف تعيش؟؟

ولا خايف العمر ما يكفيش

الطموح والأحلام

ومن الخوف خايف تنام

بتسهر كتير ؟؟

شغل ومواويل ؟؟

حلمك بقي شغل ؟؟

طيب حب وأساطير؟؟

ولا أصلا مفيش أحلام؟؟

وعايش الدنيا خايف من الزمان؟؟

عايش مكسور مهموم حزين

أو عايش عاجز متكتف

في ضلوعك غربة

دمعة عينك تتشحتف

علي حلم مربوط بخيط ضعيف

حلم برئ في زمن سخيف

لسة حاسس انك عاجز؟

حلمك لازمله يوم ويتحقق

خليك جاهز

ماهو طول عرض هيتحقق

بس انت دقق

وحقق 

وهاتفهم ان لو حلمك ماتحققش 

يبقي انت اللي حلمت ان عمره ما يتحقق

الحب هو

الحب هو أن أراك بقلبي وليس بعيني فقلبي يراك حتى وأنت لست بجانبي والاثنين يرونك الأفضل والأرق والأروع والأجمل علي الإطلاق
**

الحب هو أن أحتمي بعيناك من الأخريين، وبقلبك من الطامعين، وبقوتك من الآثمين
**

الحب هو أن أري الأمان في صوتك وفي قلبك، وعينيك وأحضانك ولمسة يديك، وأن أحتمي منك بك
**

الحب آلا تغمض عيناي وأنا أعلم أنك حزين من شئ ما، ولا أهدأ حتى أمسح بعبراتي حزنك الدفين
**

الحب أن لا أجبرك علي تنفيذ رغباتي، وآلا تحبني كما أريد أنا، فأجمل ما في الحب أن تفاجئني بما هو نابع منك
**

الحب هو أن لا أسجنك داخل قلبي، بل يجعلك حبي أكثر حرية، لتتأكد بعدها أن لا يوجد أدفأ من قلبي تستكين فيه، فتأتي إلي بكامل إرادتك الحرة
**

الحب أن أسبقك إلي الوقوف في وجه أزماتك، قد لا تنتهي وقد لا أنجح في التخفيف عنك، ولكني أعدك أنك لن تواجهها وحدك أبداً
**

الحب هو آلا أطرد أي شئ من حياتك السابقة لأحفر لي مكان، فأنا مكاني في قلبك موجود منذ ولادتك وهو ملكي أنا، أنا فقط جئت كي أملأ مكاني، لا لأحل محل الأخريين
**

الحب هو أنه عندما تفرقنا الحيوات، وتتساقط بيننا الأمطار وترسم طريقنا الأخطار، وتهددنا خطا النيران ويموت حبنا ظمآن، آلا أجرحك وأظل أتذكرك بالخير دائماً فقد كنت يوماً اختياري، وكنت حامل أزهاري، وملاذي من ظلام شتاء دامس
**