اضحك

عاوزاك تكون مبسوط 

تحس إنك مبسوط 

وتعيش مبسوط 

دايماً مبسوط

خبي دموعك 

جوة ضلوعك 

اضحك اضحك 

دايماً اضحك 

وخلي الضحكة بأعلي صوت 

الضحكة بتوجع ؟؟

مش مهم 

وجع الضحكة مش هيعلم 

اللي هايقتلك كلمة معلش 

لو سمعتها هاتموت

اضحك اضحك 

مهما يكون 

اضحك بصوت عالي 

كما المجنون 

هايقولوا مجنون ؟؟ 

سيبهم يقولوا 

اللي بيقولوا مش عايشين جواك 

عارف اللي حاسين بيك هيقولوا ايه ؟؟ 

هايقولوا مهموم 

بس مداري 

اضحك أكتر 

وطفي نارك 

نارك ناري 

اضحك أعلي وأعلي وأعلي 

خلي الصوت دايماً يعلي 

يعرفوك من صوت الضحكة 

صوت الضحكة دايماً أعلي 

حتى لو الأحزان هاتعلي 

اضحك تاني 

واضحك أكتر 

الضحكة لو مش هاتحلي يومك 

مش هتمرر 

اضحك ضحكة حتى لو حزينة 

مش لازم تكون زي السكر 

المهم تضحك 

حتى لو دموعك جواك بتقطر 

 يوم ما يبطل الصوت 

والضحكة تموت 

اوعي تعيش 

من غير الضحكة 

تهون الحياة 

وييجي الموت

 

إلي صديقي

هو انت تقدر تخليني أرجع أبتسم 

طيب هو انت ممكن تخليني أبطل أتقسم 

تقدر ترجع دموعي جوايا تاني ؟

طيب تقدر ترجع الحلم ؟؟ 

تقدر تهد من حواليا الوهم ؟؟ 

تقدر كمان تعدّلي ذنوبي 

وتخليني أواجهها ؟

تقدر تخليني أبطل هروبي ؟

طيب هتقدر تخليني أنام ؟

 تقدر ترجعلي احساس الأمان ؟ 

تقدر تقتل شوية 

بس شوية من الأحزان ؟؟ 

تقدر بجد تدفي القلب اللي عايش سنين بردان ؟؟

أنا عارفة إنه صعب

إذا ماكانش مستحيل 

ساعات الوجع بيخنقنا 

ويعمينا عن السبيل 

نيجي بقي للسؤال 

انت عارف أنا قلت الكلام ده ليه ؟ 

علشان ماتجيش تسألني مخنوقة كتير ليه ؟ 

ومصممة تضيعي حياتك 

عايشة بس علي ذكرياتك 

عايشة في عالم افترضي 

بتحاولي فيه تحيي الماضي 

أنا أصلاً ماعنديش غير كدة 

عارف الحد اللي جسمه كله جروح 

ومابقاش عنده مكان ممكن يتجرح تاني 

ساعتها هاتلاقيه بيحافظ علي جراحه القديمة ويخليها دايماً موجودة 

أحسن يتجرح تاني

عارف ....

كتر الجراح ده شعور مش إنساني 

عارف احساس القلم اللي خايف يتقصف

ويبروه وعمره يقصر 

فكل ما ييجوا يكتبوا بيه يتكسف

فرموه علي جنب وسابوه يتحسر 

لأنه اكتشف 

انه لا قام بدوره وكتب 

ولا حافظ علي نفسه 

أصل الدنيا قصفته 

بس الوقت مابيرجعش 

ولا بيستني 

وكل الوقت ما يمر 

بيبعد الفرح عنا

وتفضل الأحزان أحزانا

تفضل الأوجاع مكتوبة بإسمنا 

ويا تري الأوجاع بتزيد

ولا اللي بتزيد أسمائنا 

عارف إيه مشكلة الحب ؟؟

عارف ايه مشكلة الحب؟؟

إننا بنعيش فيه علي سراب 

بندور علي سراب 

وبنخلق من الوهم حلم 

وتبقي دنيا أوهام 

وإحنا فاكرينها أحلام

ومستنينها تتحقق 

ومش بنصدق 

لما نصحي مانلاقيهش 

طيب فكر كدة ودقق 

هاتلاقي الوهم لسة مانتهاش 

هاتلاقي الحلم مخنوق موهوم 

وفي الاخر يصبح الحب مهزوم 

***** 

عارف إيه مشكلة الحب ؟؟

بتعذبنا ذكرياته 

الحلو فيها اللي بطلنا نشوفه

والوحش فيها اللي ماقدرناش نحوشه 

عارف إيه أصعب ألم 

لما تكتشف إنك وهم 

أو كنت حلم
مجرد حلم

وهاتفضل حلم 

تيجي بس لما تغمض العيون 

تبكي لما الليالي تهون 

تبكي حزن أو فرح أو جنون 

تبكي دم أو دموع 

تكتم أنينك أو يخرج بصوت مسموع 

 تخرج البسمة اللي مليانة وجع

وتلاقي الحلم مرسوم موجوع 

***** 

سنتين

عارف يعني ايه سنتين ؟؟

يعني مش يوم ولا يومين 

دول 730 

زود عليهم كمان 255

يبقوا 985 

تخيل انت بقي 

انا عايشة كل ده علي الحنين 

علي الذكريات 

علي الوجع علي الدموع 

 أنا عارفة إنك مش راجع 

وبنادي ولا انت سامع

ده حتى نفسي مش سامعاني 

أنا بنادي في مكان 

وهي في مكان تاني 

فاكر يوم ما قلتلي 

اني وقت الجد هلاقيك جنبي ؟

طيب طول السنين ماعداش وقت جد ؟؟ 

طيب أنا طول السنين بدور عليك في وشوش الناس 

ومش لاقيك في ملامح أي حد 

 دموعي عندك مش وقت جد ؟

انهياري مش وقت جد؟؟ 

عاوزة أقولك حاجة كمان 

رغم انك كنت فاكر نفسك ضعيف 

بس ضعفك كان بيحميني من شئ مخيف 

وكمان كان بيحميني من شك سخيف 

الغياب طول قوي 

سنتين ده وقت طويل 

عمر تاني 

عمر طويل 

انا عارفة اننا محبوسين 

لا انت هاتيجي ولا انا ينفع اروحلك 

علي الاقل دلوقتي 

بس عارف يوم ما اجيلك 

كالعادة هاترمي في حضنك 

هعيط وأحكيلك 

عن كل حاجة ضايقتني 

عن كل كلمة جرحتني 

عن كل أمنية بعدك بقت مستحيلة فقتلتني 

ممكن أقولك أخر حاجة ؟؟ 

إنت بس وحشتني 

ولسة بحبك

كلام محبوس

عارف ايه أجمل حاجة في إني بكتبلك وإنت مش موجود ؟؟ 

إني مش هاستني رد وبالتالي مش قلقانة من اللي ممكن تشوفه وماكنش عارفة أحكيهولك فبكتب بقي براحة راحتي .. عارف أنا عندي شوية مشاكل ليها علاقة بالأحاسيس، ما انت عارف انا مابعرفش أكتب غير اللي انا حاساه، المهم يعني هاحاول الخصلك الاحاسيس دي في شوية كلام:

1- تخيل كدة لو جيت تبص في ساعة ايدك ولقيت كل الأرقام اللي فيها وقعت، يعني الوقت وقع منك ومهما تحاول تلحق الدنيا برضه هاتكون متأخر، يا تري تفضل تحاول كنوع من إصرار السلاحف ولا ممكن تفقد الأمل وتعيش بقي وزي ما تيجي تيجي.

...

2- تخيل كدة انك - بعد الشر عنك - عيان قوى وكل الدكاترة قالولك علي دوا معين فجيبته بس للأسف الانسان اللي انت مستأمنه علي حياتك واللي عايش جواك بدل الدوا ده بسم بطئ، فإنت يومياً بتاخد الدوا وانت مش عارف انك في الحقيقة بتاخد سم، يا تري ايه أمر من التاني، إنك شربت سم ؟؟ ولا انك شربته من ايد توأم روحك؟؟ ولا خيانة روحك؟؟

.....

3- تخيل انك تعرف انسان عملت علشانه حاجات كتير حلوة، بس في يوم هو افتكر انك عملت في حقه حاجات وحشة، مجرد فكرة فقرر انه ينسي كل حاجة وكمان ييجي يعاتبك - بعد ما جرحك - ويقولك وانا اللي كنت مستأمنك علي حياتي وخليتك تعمل ده كله علشاني وفي الاخر خنتني :D
ببتسم علشان ماعنديش رد

.......

4 - عمرك قريت قصة بينوكيو ؟؟ قصة الراجل اللي كان نفسه يبقي عنده ولد فنحت ولد من الخشب واتمني انه يبقي حقيقي والجنية حققتله ده بشروط، دي مشكلة كبيرة طبعاً بصرف النظر عن جو الأمنيات والجنيات، صعب قوى إن يكون عندك أمنية ومش عارف تحققها، فتلجأ لفكرة العالم الافتراضي اللي تحط فيه أحلامك، ميزة العالم الافتراضي انك بتتحكم في احلامك وتعدل فيه وتبدأ من الاول أو من النص وتركز علي نقط السعادة وتتجاهل نقط الألم، ومالوش سقف ولا حدود، بس مع الوقت بيطغي عليك ويضيع الخط الفاصل بين العالم الحقيقي والافتراضي، فنبدأ نتخيل إن الحاجات اللي بنعملها في العالم الافتراضي ممكن تتعمل في الحقيقة ونتفاجئ بقدراتنا المحدودة، فتزيد جوانا الغربة وإن العالم الحقيقي ده مش بيسعدنا بنهرب أكتر للعالم الافتراضي لحد ما نحس انه بقي دنيتنا ونتفاجئ علي انهيار كامل لأننا لا عيشنا في عالم حقيقي حتى لو مر نعرف نتعامل مع تفاصيله وتطوره، ولا عيشنا سعادة العالم الافتراضي.

رسالة لنفس البنت اللي كنت ماعرفهاش

.... عارفة 

أنا كان عندي أمنية 

مالهاش علاقة بيا 

لكن ليها علاقة بيكي 

كنت بتمني أقف جنبك 

وأحميكي 

أتمني أمنع الدموع

إنها توصل لعنيكي 

وكنت شايفاها أمنية مستحيلة 

وكانت بتعدي ليالي طويلة 

أبكي كل ما أحس بالعجز

أبكي من احساسي بالعجز 

أبكي وأحس أكتر بالعجز

عارفة يعني ايه في يوم وليلة 

ألاقيني بسلم عليكي 

وبعدها بليالي كتيرة 

أعرف أوصلك 

مش عارفة بكرة مخبي ايه 

مش عارفة الدنيا هاتبقي ازاي 

بس اللي اعرفه كويس قوى 

اني مش هاسمح أشوف حزن تاني في عنيكي 

ومش هاسمح لأي حاجة تقرب منك 

إلا اذا كانت بتخاف عليكي 

وعاوزة تحميكي

All is fake

Some times you feel that you have many people in your circle, but in fact those people are in a fake circle & your real circle contains no one, at this time you be sure that everything is deceptive, no one put his real face, all of them have a fake smile, interest, even love,