مخلوقين من طين

مخلوقين من طين 

ودموعنا ندى بتسقينا

بتقول وتحكي عن الحنين

ننبت حب واشتياق

خوف يمحيه غرام في عناق 

نعيش في ارض الساكتين 

عشاق

عاشقين ...

مخلوقين من طين. 

بضاعة رخيصة

طيب بص كدة جوة عيوني

وقولي هاتشوف فيهم ايه

هاتشوف أحزان ولا هاتقرا فيهم بالكذب لحظات جنوني ؟ 

لحظات قلعت فيها تفكيري

ولبستني ظنوني

لحظات طفح فيها الكيل

وبقى الصبر فيها مسجون

مسجوني

اللي شايل على راسه جراحي وهمومي

بضاعة رخيصة

وبتتباع من غير فلوس 

شكلها حلو 

بس بتاكل في النفوس

لا هاتعيش ولا هاتكمل

ولا وقت حزنك معاك تستحمل 

بضاعة خبيثة 

اصلها كانت علاقة

محبة وصداقة ...

رخيصة

مش أسف

مش هاتأسف

أنا مش أسف 

حتى لو كنت في بُعدك خايف

انا مش أسف

مش هاطلب منك ترجع النور لعيوني

حتى لو هافضل عمري كله مش شايف

انا مش أسف 

مهما الدنيا ترمي همومها عليا وتشيلني

حتى لو اتكسرت ومشي بضهر محني

ومهما فضحني قلبي وكان لحزني كاشف

أنا مش أسف

أنا مش هاقبل أكون قاتل

ولا مقتول 

ولا هاقبل ابقى ظالم وشوية مظلوم

ولا لعطش حب اعيش محروم

أنا اصلا ليك موهوم

انا موهوم بصداقة 

جايز 

موهوم لدرجة الصفاقة

وبقيت مش عايز

 لا قابل منك جرح محفور

ولا حتى فرح بارز

خلاص مش عاوز 

ولا يلزمني

لا جراحك بقت بتألم

ولا الفرح منك بقى يفرحني

الشوارع

بصي يا حلوة

واحنا بنمشي في قلب الشوارع

بنخبي دموعنا

ماتفارقش عيونا

ومع كل خطوة

بنرمي مواجع

بصي يا حلوة

في قلب الشارع

زيطة ولخمة

أصل كل موجوع طالع

يرمي جراحه على رصيف مايعرفوش

ماشافهوش 

أو الرصيف صديق قديم 

صديق بيه رحيم مابيخونهوش 

وتلاقيه راجع

يحكي كل رصيف

كل خطوة دبت عليه

حزينة مدمعة

أو متألمة ومتوجعة

أو حتى بترقص من الفرحة

والضحكة في الخطوة مسمعة

عارفة يا حلوة

لو تحكي عننا الشوارع

هاتقول حواديت

وقصص وحكايات

وكلام ماقلناهوش لحد

واحتمال تسكت وتقول نسيت 

بس الشوارع مش بتنسى

بتحن علينا

لما قلوب الخلق بتقسى

تسقينا أمان

وعلينا تطبطب

لما يكسرنا الزمان

لما تترسم في عيونا الأحزان

والفرحة تخرب

في قلب الشوارع

حكينا بصوت مش مسموع

حكينا من غير ما نظهر دموع

أو نزلت دموعنا وداق طعمها التراب

هو اللي شاف جوف المر

وإزاي اتلون لعذاب

هو اللي حضنا واحنا وحدنا

يوم ما اتنكرولنا الأحباب

مجروح في الشوارع

مالاقش حبيب ولا صديق

كله سراب

نزل حط همه على الرصيف

في كرسي على قهوة وشوية شاي خفيف

وضحكة ترن من حزنها

وأخرها جرح ونزيف

تمشي في شوارع

تشوف انعكاس لملامحك في فتارين

تلاقي على عيونك سور من الخوف

حابس روحك جوة الزنازين

نفسك قلبك يكسر القضبان

قلبك للراحة يوم عطشان

صوت نفسك عالي من الخوف

صوت مخنوق من قلبك

صوت حزين بس بيخنق

بيروح في زحمة أصوات وعربيات

ورجول ماشية فوقيها أحزان

وكله فاكر انه لوحده

مع انه لو بص حواليه هايصدق

ان الشوارع هي اللي بقت تحضن أمانينا

وأحزانا

وفي قلب الشوارع لقينا مكانا

100 لون

يا ١٠٠ لون جوة بعض

كلهم بيكملوا بعض

لون حزين ولون سعيد

ولون بطعم الفراق والبُعد 

يا ١٠٠ لون راسمين طوق

بتخنق قلب أصلا هو مخنوق

جواه يدوي صوت الرعد 

مع انه .. راسم بسمة كما الشهد 

يا ١٠٠ لون داخلين في بعض 

الرابط ما بينهم بس الصمت 

جرب تفرق الألوان عن بعض 

دي الألوان زي المشاعر 

ولا قدر يفرق المشاعر حد

إحزن

إحزن كما تشاء 

ولتحزن إلى ما شاء 

فلا لحزنك تبكي الأرض 

ولا تكفهر السماء 

ولا تسير الشمس مبتعدة 

ولا يأتي لأجل حزنك الشتاء 

ولا تنس أن تبتسم كل صباح 

حتى وان كنت ... 

تحزن كل مساء

***

احزن كما تشاء 

وإبكي 

فبالكاء صنيعة الكسر والخواء

ولكن الدنيا حقاً صماء 

لا تستمع لأنين 

ولا تلتفت لأي أصداء 

فإن لم يجعلك البكاء سعيداً 

فإنه يفتت أحزانك لأشلاء 

أو أنه سيحيل الدنيا ظلاماً 

فتكون أنت والموت ....

سواء 

طفل برئ

ولما ألاقاني طفل برئ

نفسه يحلم

نفسه يطلعله جناحين

نفسه يغمض يوم عيونه

ومايصحاش على صوت أنين

نفسه يقف على مسرح يغني

وصوته يغطي على العازفين

وجمهور كبير يصقفله ييجي كدة ساعتين

لما ألاقاني طفل برئ

نفسك يضحك بأعلى صوت

لما يفرح

ولما يحزن ..

مايتمناش الموت

نفسي ألاقاني طفل صغير

بس كبير

عايش لوحده

وينام لوحده

بس يوم ما يبكي

يلاقي حضن دافي

يموت فيه

نفسي أكتب كما طفل صغير

لا حد يقولي وزن مكسور

ولا ده كلام مش مفهوم

وجواكي كلام أحسن كتير

طيب مين قالك اني بكتب

ومستنياك تقيم ؟

أنا مش بكتب

أنا بحس ؟

هو انا هاكتب احساس مكسور !!؟