أنا عفريت

وانا كل يوم أقرر وأصحى الاقيني ناسية قراري 

تبقى انت اللي جارحني وأجي أقدملك اعتذاري

أبقى عايشة متكتفة وبضحك كأن القيود اختياري

تبقى عايش جوة مني وعارفني وأخبي عليك قال يعني بداري

وساعات تخرج برة مني واقولك عني حبة توافه وكأنها أعظم أسراري

والاقيك بتضحك زي الأطفال أتاريك عيل اه يا مراري

وابص فجأة في مرايتي وماعرفنيش وافهم

ليه التناقضات وأقول اتاري 

انا عفريت أصلا لابسني ولو خرج منه هالاقيه من قدامي جاري

بس هامسكه واخليه يلبسني تاني اصلي بحبه والجنان في قلبي لسة ساري. 

برسم

قاللي:

هاقعد أوصف حبي ليكي وترسميني

أكتبك وتنطقيني 

أترمي في حضنك وترحميني 

قلتله: 

 القلم مش جايب ملامحك

مش راضي حتى يكتب اسمك

مش قادر يخط خط يحكي فيه ردود فعلك
 ولا يلحقك في كذبك 

واضح انك برة اهتمامات قلمي واضح انه مش قابل رسمك

عنك انت

لما انت غبت 

لقيتهم بطلوا يجيبوا في سيرتك 

بطلوا يسألوا عن حبك

أتاريهم سكتوا لما انا بطلت اتكلم عنك

وعن اني ازاي دايما بحبك

سكتوا وهما مش فاهمين

ازاي بطلت احكي عن قلبك

وانا كنت بسكت علشان ماحكيش وجعي بسببك 

علشان روحي ماتخرجش مني 

وغضب عني

تنادي باسمك

كنت بسكت أحسن ملامحي

تاخد في بُعدك شكلك

كان حلم جميل عندي 

اني أكون فعلا شبهك

بس ماينفعش وانت بعيد

ملامحي تفكرني بيك وتبقى حتة منك 

ولما انت رجعت 

وبقيت تقضي معايا كل وقتك 

لسة محتاجة اصدق 

انك جيت من نفسك

عاوزاك تقول دايما ان اللي رجعك ليا ... 

هو قلبك

لو على الراحة

لو على الراحة أنا مش مرتاح

100 جرح ومفيش سماح

100 خيال وكله أشباح

ولا حد ليه صوت ولا صدى

لو الراحة انا كدة مقتول

حركة كتير وفي الاخر مشلول

أيام بتقع وأنا مش مسئول

راسي فوق ... قلبي فوق

بس جوة نفسي ساعات مكسور

لو على الراحة فهي لوحدي

أحكي لنفسي وأنا فاهمة قصدي

وأقول كلام أخد فيه وأدي

لو على الراحة فأنا مخنوق

بتنفس بس مخنوق

بضحك بس برضه مخنوق

وأبكي من كتر ما انا مخنوق

وكل ما اجي أفكر أموت

أكتشف اني مش قادر

أكتشف اني مجرد مخلوق
عايش مخنوق

أنت لم تعد لي

أنت لم تعد لي 

ولم تعد تثيرني آرائك 

لم أعد أنتشي 

وانا أسرد على الجمع أسمائك 

فيوم أنت حبيبي ويوم أنت روحي

واليوم أطلب منك الرحيل 

فاحزم الحنين معك في حقيبة أشيائك 

ولن أبكي رحيل وجهك الكريم

وكذلك لن أعدد جراحك لي عند أصدقائك

فالنسيان اسم اللعبة

أو التناسي لأحزانك

وسيأتي يوم أراك فيه

فأنقب داخل قاع مخيلتي

لعلي أجد لك أثر 

ولن أجد إلا ذكري وحيدة

فرفيقها مثلك عندي 

مات واندثر.

تعالى

اقراني صح كما قال الكتاب 

اضحك في وشي من غير عتاب 

واسأل دايما بلاش الغياب 

تعالى نحلم لحد النجوم 

ماتخليش وجع الحقيقة 

يهزمنا ومن أحلامنا نقوم 

طيب تعالى نبكي 

لحد ما نموت 

ودموعنا تنزل سيول

ف بكا من غير صوت 

مين قال مفيش ألم ؟

ده مفيش أقسى من ألم السكوت 

تعالى نجري مشاوير مشاوير 

تعالى نعدي من الطريق الطويل 

علشان نفضل فترة أطول سوا 

تعالى نسيب ملامحنا للهوا 

ينحتها ويشكلها 

ونسيب حتى التراب يجرحها 

خلي الجراح دي ترسمها 

طيب تعالى نكتب كتير 

ومن حروفنا نرسم رسمة 

تعالى نرسم وش كبير 

ونحط عليه خط البسمة 

وحواليه كلام كتير 

عاوزين حروف تعمل زحمة 

المهم تعالى نعمل حاجة 

تعالى ندخل في قلب الدنيا 

حتى لو هي مش محتاجة 

يوم 20

نام الكلام وصحي السكون

صمت بألف معنى ولون

نام الحزن أيام وسنين

لسة بيوجع بس كتوم

قام النهاردة وبكل أنين

أعلن ذكرى

للمرة الرابعة

النهاردة يوم 20

قام دمع مسكين مكتوم

بيضحك ويلمع طول اليوم

بس لوحده قرر ينزل

يسلم نفسه لجراح وهموم

يغمض عينه ونفسه ما يفتّحش

تمر سنينه وهو ما تحركش

لا السنين طلعت بيه قدام

ولا الجراح دفنته مكانه

لا خلوه يلاقي في المستقبل مكان

ولا لحق يعيش في الحب زمانه

ولا قادر يشوف غير حرمان

ولا قادر يكون ....

غير مجنون

قلم مسنون

بيجرح ورقة الكتاب

وهو بيشخبط على حروفها

مش مصدق الحكاية

لا تفاصيلها ولا حتى ظروفها

ولا قادر يطمن جراحه

ولا عارف يستحمل خوفها

وبقى يضغط بسنه أكتر

كل ما يلمحها ولا يشوفها

لحد ما سنه في يوم ما اتقصف

والعمر بيه اتخسف

أحلامه محبوسة في قفص

أقفاله حديد مصدي

قضبانه حيطان سدة النور

ولا حتى الهوا بينها يعدي

ومايفكش الأقفال غير الألم

وهو اللي عندها بيهدي

ييجي يسلم شحنة يومه

ويشوف دموعها ويجري

وتفضل أيام بتجري ورا بعضها

وهي مصدقة نفسها

أنا نسيت أو بنسى

أنا بخير تقريبا كدة حاسة

هاييجي عليا يوم أحس فيه تاني لمسة

لحد ما نصبح على يوم حزين

ونخبي الدمع

النهاردة يوم 20