28 أغسطس

28 أغسطس 

لسة بييجي بوجع 

لسة بنفتكر يوم ما اتولد الجدع

لسة بنزعل على يوم 

اتولدت فيه الحياة 

وبعدها راحت لما 

النفس اتمنع 

*** 

لسة بنحس بشجن 

لسة تايهيين 

مهموميين هايمين 

مستنيين نلاقي وطن

لسة بنحاول نستقوى بالزمن 

والزمن دايس علينا 

نرفع عنين مدمعة مكسورة وحاسة بوهن

*** 

ولسة بنفتكر 

نبكي ونتقهر 

ونخاف من كل حاجة 

ما هي كل حاجة بتفكرنا 

نخاف لوش الدنيا الوحش 

يحس بينا ويفتكرنا 

بنكفي دمعتنا في عيوننا 

ونصرخ في عز سكوتنا 

راضيين راضيين 

نركع للوجع

واحنا بنفتكر يوم 

اتولد فيه الجدع

28 أغسطس

سيبلي ذكرى

سيبلي حاجة أعيش عليها 

سيبلي منك ذكريات 

يا ريت يكون فيها فرحة 

مش جرح وتعب وسكات

سيبلي حاجة يوم ما تبعد 

أقول لسة جوايا حاجة حية منك 

مش كل شيء راح ومات

سيبلي حاجة افتكرها في يوم 

وأنا ببتسم وفي عيني دموع 

سيبلي حاجة تداوي قلبي 

لما تسيبه يوم موجوع

سيبلي لمسة حنينة

تهديني لطريق النور 

عن متاهاتك المبهمة

سيبلي سكة يوم أمشيها

فيها نسيمك في الهوا

سيبلي دمعة اموت فيها

وتكون موجود ونموت سوى.

ماتعاتبنيش (٢)

ماتعاتبنيش على صبري 

وعلى اني حيرانة في أمري 

وبضيع أيام من عمري 

مهزومة وحيدة ببكي

ماتعاتبنيش 

ده بكايا

 حيلتي وطريقتي

علشان أطيب جراح جوايا

علشان أقدر أواجه مشكلتي

ومشكلتي إني حقيقي بحبك

كابوسي الكبير اشوف بُعدك

الموت عندي ده أهون 

إني أتنفس من بعدك

وانت بعيد بعيد قوي 

مش جنبي علشان اتطمن 

ولا حاجة بعدك بتطمن 

كل الخوف جوايا بيسكن

في الوحدة

لما أصحى والاقيني مع نفسي 

مفيش جوايا الا هموم 

اترجاها حني وبلاش تقسي 

بلاش جرح جديد كل يوم  

والحقيقة اللي خايفة أواجه نفسي بيها

لا البكا يوم بيشفي

ولا يوم الدموع بتختفي

ولا باقي غير سكة أمشيها

يمكن ألاقيك في الأخر 

جاي تطمني 

ويمكن أموت وتنسى الفرحة

انها وعدت يوم تسكني 

عن وجود .. عن وجودي

عن وجودك ... عن وجودي 

عن حاجات مالهاش أساس 

عن هروبك برة حدودي 

عن خضوعي 

عن تقديمي لقلبي عنك اعتذارات 

و100 التماس 

عن جراح سايبة أثر 

عن بكا نطق الحجر 

عن عويل طويل ومُضني 

عن حنين في يوم سجني 

عن حاجات كتير بتوجع 

بحسها ومن سكات 

بغمض عيني واكتم نفسي 

علشان أحسها من سكات

علشان العلن صعب بيألم 

أكتر ما بتألم الحاجات 

***

عن كل مرة نادوا عليا وانا سرحانة 

عن كل مرة اتجرحت 

يمكن نزفت

وأنا مش حاسة 

وأنا مش فاهمة 

ليه مش بتنفس 

ليه اتخنقت 

ليه مات جوايا كلام 

ليه بقى صوتي فايق وواعي 

مجرد أحلام 

ليه بقى نوم من غير كوابيس 

حلم بعيد صعب المنال 

ليه بقى شوقي ورغبتي فيك 

شيء ميت مجرد جماد 

حتة تمثال 

ليه بينادوني 

رغم إني مابردش 

ليه يحركوني

 وأنا لسة مابردش 

وليه يخرجوني عن شرودي 

وأنا لسة بفكر في وجودك ووجودي 

وحاجات كتير ... مالهاش أساس 

خايفة

لما كتير بكون خايفة

ومحتاجة حد يطمني

ساعتها بكون مش شايفة

 وجودك بس هو اللي هاممني

بس ساعتها الاقيك سايبني

ألاقيك بعيد

وبتديني شوية كلام

أخره كلام

حلو وبيفرح

بس شبه الأحلام

مفيهوش حاجة بتحقق

ولما تدقق

هاتلاقيني لسة لوحدي

وانت بعيد

عندك حاجات كتير غيري

مخلياك سعيد

بس أنا ماليش غيرك

.. عارف انت

لما تكون بتحب

وانه علشانك اتخلق الحب

من كتر ما بتحب

وتيجي تدور على حبيبك

ماتلاقيهوش

هو فين ؟

تنادي عليه ماتسمعهوش

هو فين

خليني أول اهتماماتك

مش كلها

خليني الأساسي في حياتك

وده مش هايبعد الحاجات اللي بتحبها

بس صدقني

لو انا في نظرك مش مفيدة زيها

بس محدش هايحبك قدي

محدش غيري هايتمنى الموت

علشان انت تعيش

ومحدش غيري فعلاً هايموت

لو انت مفيش

يوم ما تحزن أنا اللي هاكون موجودة

واقفة جنبك

انا بس اللي هاقدر

أطبطب على قلبك

انا بس اللي هاكون

معنى حبك 

أنا بحب

أنا بحبك ... 

كلمتين ياما سمعتهم مني 

علشان انت قريب مني 

علشان انت أكتر من صاحبي 

علشان انت الأقرب لقلبي

*** 

بس فجأة 

واحنا في وسط كلامنا العادي 

حصل ما بينا شيء مش عادي 

نزل الحب جوة قلوبنا 

من غير أي مقدمات 

سبحان من قلب قلوبنا 

من غير ما يدينا اختيارات

سبحان من خلانا دوبنا 

وحول الحب لعشق قوام

*** 

طيب عارف ؟

كل محاولات الارتباط قبلك 

كانت من غير اشتياق 

كانت من غير بهجة بجد 

فكان أخرها دايما فراق 

لا حد وحشني 

لا حد من جوايا لمسني 

ولا حد خلاني لقلبه أشتاق

*** 

طيب عارف ؟

بحلم بيك أنا ازاي ؟ 

بتمناك في عمري إزاي ؟

شايفة الحب اللي بين ايديك 

حاساه ليا وليك جاي

شايفة الشوق جوة قلوبنا 

شايفة لمسة بتدوبنا 

شايفة نظرة وحياة بتجمعنا 

*** 

طيب كل سنة وانت حبيبي 

كل سنة وانت عمر بحاله 

كل سنة وانت العمر وحاله 

كل سنة وانت لعمري حاله 

كل سنة وأنا محمية بقلبك 

وإنت محمي بعمري وروحي 

وإنت ساكن جوة روحي 

وإنت بتجري في دمي 

وإنت حاميني من همي

كل سنة وابتسامتي باسمك 

كل سنة وخطوطي برسمك 

كل سنة هافضل كل همك 

إللي يراضيك ويعيش ليك 

اللي مش هايشوف الكون غير بين إيديك 

كل سنة وانت صاحبي وكل حياتي 

كل إللي فات معاك جميل 

بس الأجمل هو الآتي 

بحبك. 

مايموتش إللي جوانا عاش

نفس العادة مابطلتهاش 

فاتت سنين ومانسيتهاش 

وبيتأكدلي كل يوم 

مايموتش اللي جوانا عاش 

***

نفس العادة ويمكن نفس الحروف 

والقلق والرعشة في بُعدك والخوف

واللوم والقهر وعتاب الظروف 

وجملة ما كان زمانا كنا ... بس ماكناش 

*** 

وفي نفس اليوم كل سنة 

باجي أرتب شوية كلام 

وأقلبها دموع ومحزنة 

وبعدين أستناك في شوية أحلام 

وانت أبدا مابتجيش 

استنيت ليالي كتير 

ناديت بس ماسمعتنيش 

يا ترى الي مانعك الموت 

ولا في السكوت مابتحبنيش 

*** 

وبخاف كل يوم 

ياكل الزمن من ذكرياتنا 

شوية الصور الباهتة

وحكايات هي اللي باقيالنا 

دفا الشتا ونسمة الصيف 

ذرة دموع بتكوي 

خوف ووحدة وخريف 

***

لو في قلبك كلام مع الزمن 

قوله يحن 

قوله يطبطب وما يئساش 

قوله استنيت مروره 

وهو حتى لسة ماجاش 

لا راضي يسيبني في حالي ولا راضي يجيبني عندك 

لا سابك ليا ضهر ولا سابني ليك سندك

قوله الضلمة صعبة قوي 

ما بتنتهيش 

والضي بعيد قوي 

مابيجيش 

والمر قايد نار 

مابتطفيش 

قوله يسيبني مايمسكنيش 

قوله مهما الحب اتظلم 

فالحنين حي وماتنساش 

وبيأكدلي كل يوم 

مايموتش إللي جوانا عاش