الحقيقة

يوم ماتعرف الحقيقة ماتستغربش

كان من حقي أرفض أعيش معاك 

من حقي أطلب مانجرحش 

من حقي أدوس علي قلبي وأنسي هواك 

من حقي أسيبك وماندمش

 وكفاية قلبي شاف الجفا 

بردت وماحسيتش في حضنك دفا 

عشت لحبك بكل وفا 

وانت ليه خنتني وماوفتش 

سيبني أدور علي أحلامي اللي في حبك ماحققتهاش 

سيبني أعيش أيام عمري اللي ماعشتهاش 

سيبني ألحق قلبي يمكن يكون لسة مانتهاش 

ومسيرك يوم تعرف انا ليه رفضت أرجع 

بس دلوقتي اعرف إني رافضة أخضع 

رافضة أرجعلك بابتسامة 

وانا احساسي بسببك بيتقطع 

يوم عاصف

خرجت ووجدته يوم عاصف
وجدت قلبها يرتعد من الحب خائف
تحاول اصطناع الدفء 

من حضن زائف 

تترجي قلبها أن يتوقف

إذ ربما الحلم يتحقق

وتري طيفاً من بعيد 

يحمل ابتسامة غداً سعيد 

أهذا أمل ما أم وهم جديد؟؟ 

لا تلبث أن تتبناه لتجده وحيداً 
يطوف كرؤيا حزينا شريداً 

تلتهمه الأيام وتدمع عيناها قائلة هنيئاً هنيئاً 

وتجد عقلها يتخذ موقف جرئ 

يدافع عن حلم لم يزل بعد برئ 

يرمي بأفكاره وكانت في رمياته سديدة

فوقف قلبها ينتفض 

في انتفاضه يفقد نبضاته 

وتتسرب من بين الدماء حياته 

وتربت بأنملها مخففة 

ولكن أناملها متجمدة بفعل العاصفة 

ووجدت عقلها يتململ يتنصل منها 

ووقف قلبها مذعوراً منتفضاً خائف 

وخرجت فوجدته يوم عاصف

فكر

ليه دايماً لما حد بيعملنا حاجة بنفكر في الحاجة مش بنفكر في اللي ورا الحاجة دي، ساعات في ناس بتعمل حاجة وهي تقصد حاجة وساعات بتكون مضطرة وساعات بنكون احنا اللي غلط، المهم اننا لما نفكر بدماغ اللي قدامنا ونعرف كل المعطيات عن أي فعل ده هايفرق كتير في رد فعلنا هاكتب حكاية قريتها مرة اسمها - من ركل القطة 

|

|

|

|

|

|

|

|

|

|

|

|

|

مدير لا يعرف كيف ينظم يومه ولا عمله ولا يعرف كيف يتعامل مع الناس ، كان يراكم الأعمال على نفسه ويحمل نفسه مالا تطيق ، نادى سكرتيره يوماً فدخل الأخير ووقف أمامه.

صرخ فيه : اتصلت بهاتف مكتبك ولم ترد

قال السكرتير: كنت في المكتب المجاور ، آسف

المدير بضجر : كل مرة آسف ... آسف ، خذ هذه الأوراق ، وأعطها لرئيس قسم الصيانة ثم عد بسرعة.

مضى السكرتير غاضباً بسبب معاملة المدير ، فألقى الأوراق على مكتب رئيس قسم الصيانة وقال : لا تؤخر العمل عليها فنحن نريد أن يكون كل شيء جاهزاً بسرعة.

تضايق رئيس القسم من أسلوب السكرتير وقال : المرة المقبلة ضع الأوراق وتكلم بشكل لائق.

قال السكرتير : مناسب ، غير مناسب .. المهم قم بإنهاء العمل بسرعة .

ارتفع الصوت بينهما ، فهذا ينتقد وذلك يرد ... حتى تدخل الموظفون من حولهما فعاد السكرتير إلى مكتبه.

مضت ساعتان فأقبل أحد الموظفين الصغار في قسم الصيانة ولم يكن يعلم شيئاً عن المشكلة فقال لرئيسه سأذهب لأخذ أولادي من المدرسة وأعود.

صرخ الرئيس : وأنت كل يوم تخرج

قال الموظف هذا حالي من عشر سنوات وهذه أول مرة تعترض

قال الرئيس غاضباً : ارجع لمكتبك

مضى الموظف لمكتبه حائراً مصدوماً من هذا الأسلوب ، وبدأ بإجراء اتصالات ليبحث عمن يوصل أولاده من المدرسة للبيت ، وبعد أن طال وقوفهم في الشمس ذهب أخوه وأعادهم.

في المساء ، عاد هذا الموظف إلى بيته غاضباً بسبب ما لاقاه اليوم من معامة ، فركض إليه ابنه الصغير ومعه دفتراً جميلاً ، فقال الطفل: أبي ، المدرس أعطاني هذه لأنني ...

ولم يكمل الطفل حتى صاح به الأب : اذهب عني ، أخبر أمك بالقصة ثم ودفعه بيده

مضى الطفل مكسوراً في عينيه الدموع إلى غرفته فأقبلت إليه قطته الجميلة تتمسح به كالعادة فركلها الطفل بقدمه ضربة قوية أرسلتها إلى الجداء متلوية بألمها.

السؤال : من ركل القطة ؟؟

العبرة : خطأ واحد منك قد يسبب انفجار في كل العالم وهذا هو ما فعله المدير ، ومن العبرة أيضاً أن تفصل في المشاعر فلا تحمل شخصاً مسؤولية نقاش وخلاف مع شخص أخر

هي دي خلاصة القصة ممكن اللي عمل معانا فعل ما فيه 3 غير "غير منطقي، غير مبرر، وغير مكرر" يبقي لازم نقف ونقول ايه اللي جري وحصل ووصله لكده يمكن هو متضايق من حاجة، يمكن بيطلع عصبيته، يمكن رد فعل علي حاجة احنا عملناها، يمكن هو فاهم غلط شئ ما،  المهم ان احنا لما نقع في موقف زي ده لازم نستني اللي قدامنا يهدي الأول وبعدها نبدأ نتكلم معاه وبجد هو هايقدرلنا الحركة دي قوى لكن لو صممنا ناخد رد في وقتها تبقي هاتقلب خناقة ولو نفضنا خالص وكبرنا دماغنا يبقي هانشيل جوانا 

يارب اكرم الكل

اوعي تفكر

ممكن تفتكر اني مابحبكش
أو إني عليك ما بقلقش
ممكن تفتكر اني مش واخدة بالي
أو مشغولة بحالي
بس صدقني انا قلبي واجعني عليك
ما انا ضحكتي مابتطلعش إلا بيك
يا ونس حياتي
أهلي وناسي
وأهم أحبابي
وأجمل أصحابي
يا سبب انبهاري
وقدري واختياري
لو أطول أسعدك
أو بالفرحة أوعدك
يا فرحة عمري اللي بتوعدني بابتسامة
 يا ضحكة قلبي اللي هاتوصلني لحلمي بالسلامة
يارب أشوفك كويس
يارب أشوفك سعيد
يارب ألاقيك تاني
راجع تحلم من جديد

أصعب احساس

إنك تكون محتاج لحد ومش قادر تنطقها
إنك تكون بتكره حاجة ومجبر تشوفها
إنك تكون عارف ان في حاجة مش هاتستمر بس لما بتتغير عليك برضه بتكرهها
إنك تكون عارف ان جواك حاجة حلوة بس غصب عنك بتقتلها
إنك تكون عارف انك كده كده في الدنيا خسران بس غصب عنك كل حاجة بتحسبها
إنك تكون نفسك تمسح دموعك بس ايدك تتشل فتسيبها
إنك تكون نفسك تطلع صرخة بس خوفك يكتمها
إنك تكون بتملك أحلام بس غصب عنك بتوأدها
إنك تكون عارف جروحك اللي بتألمك بس علشان خاطر اللي حواليك بتعمل اللي يزودها
إنك تكون شايل أحمال ونفسك تتكلم بس الكلام يوجعك فتفضل شايلها
إنك تكون عارف كل ده ويبقي أخرك شوية كلمات تكتبها

رسالة لبنت ماعرفهاش

انتي بنت انا ماعرفهاش
ماشوفتهاش
ولا عمري حتى سمعت صوتك أو شفتك من بعيد بتضحكي
بس هاتصدقي ؟؟
لو قلتلك اني اعرفك ؟؟
وأكتر من كده انا بحبك ؟؟
هاتصدقي لو قلتلك اني متعاطفة معاكي بشدة
ولما بفتكرك عيني بتدمع بحدة
يمكن علشان انتي مظلومة
بس ما انا قابلت مظلومين كتير
اشمعني انتي ؟؟
يمكن علشان اللي سمعتهم 

كان قصدهم 

ماتعاطفش معاكي
بس غصب عني انا اتعاطفت
وبيكي اتاخدت
بشوف صورك
بتوجعني
أسمع حكايتك
بتألمني
ببقي نفسي أصرخ وأقول دي مظلومة
واللي ظلموها عالم موهومة
لسة بيقنعوا نفسهم ويبرروا
ياريتهم فكروا
قبل ما يقرروا
عارفة
انا لو صحبتك
كنت مسحت دمعتك
كنت هادوق طعم دموعك
هاقتل الألم جوة ضلوعك
لما بسمع عنك بخاف
الاقي نفس المصير
بس اطمني
ربنا كبير
وانتي تستاهلي كل خير
عارفة انا نفسي في ايه ؟؟
نفسي نكون أصحاب
حتى لو في السر
نفسي أقعد معاكي
نفسي أحكي معاكي
عارفة ..
انا شفت صورك من فترة
قد ايه انتي عنيكي حنينيين
قد ايه ابتسامتهم تجنن
قد ايه حزنهم بيقتل
هو انا ليه حاسة بيكي قوى كده
انا المفروض ماعرفكيش
المفروض ماحسكيش
المفروض حتى ماكتبلكيش
سامحيني علي ضعفي
واني كتبت في مكان محدش هايشوفه
واني مش قادرة أجاهر باللي جوايا
ومش قادرة أطلب منهم اني اصاحبك
انتي حتى مش هاتقري الكلام ده ولا هاتعرفي بوجوده
ولا بوجودي أنا كمان
يارب الزمن يعدي حدوده
وييجي علينا الزمان
اللي أعرفك فيه وأقدر أساعدك
وأقدر أقولك اني بحبك
ممكن طلب أخير ؟
ماتزعليش من اللي ظلمك
هما مش وحشين
هما بس موهمين
واطمني
ربنا بياخدلك حقك
عارفة إنك ماتعرفنيش
بس من فضلك استنيني
ممكن تاخديني ؟
اوعي تسيبيني 
ساعات شيطاني بيلعب في دماغي إن مصيرنا واحد
قوليلي ازاي انتي عيشتي 
واستحملتي
وازاي الوجع عدى عليكي وماتكلمتيش
مابينتيش 
علميني ازاي لما الوجع ييجي من أقرب الناس اكتمه 
كتمتيه ازاي وماصرختيش 
ماتستغربيش 
يمكن في يوم تلاقيني جايالك 
وبقولك حالي بقي حالك

شكل من غير مضمون

يعني ايه شكل من غير مضمون
احساس بيجري كما المجنون
بيخبط في الحيطان تهزه الشجون
ويقطع في نفسه لجل ما يخرج حزنه
اللي جواه مسجون
شكل من غير مضمون
أصل المضمون جواه مكنون
قفل عليه 100 باب بقفل كبير
قفل من مشاعر حزن وفرح كسير
فرح بقي بيمشي يترنح زي السكير
سايب وراه خطوط هم مرير
هم مش عارف فين رايح ولا امتي جاي
بحار رحال من غير مصير
وتر مشدود
دموع من غير حدود
وكوابيس بتبني قدام الأمل سدود
وأماني بتقع
وحلم مهدود
ضهره محني باصص لتحت
لو بص قدامه
هايصحي من منامه
ويلحق يغير الطريق المسدود
ضلع بينزف
وأه من نزيف الضلوع
كل أه بتخرج تاخد حلم من غير رجوع
حتى انه يفكر يحلم بقي مش مشروع
يا تري ده كفاح ؟
ولا ده ضعف وخضوع
زمان الارض اتلونت من أمل مزروع
دلوقتي الألوان اتطفت
والفرحة اختفت
نفخ اليأس جواه
ورياحه طفت كل الشموع