سيبني

سيبني 

وياريت تفاجئني 

إنك قادر تستغنى عني

سيبني 

وكمان ابهرني 

انك حتى مش عاوز تسمعني

سيبني لخيالي وقول غصب عنك

بس صدقني الوجع هو اللي غصب عني 

اجرحني

وانسى اللي بيا 

واوجعني

ولو في إيدك يوم ألم

ارميه عليه 

وكمان ادبحني

يمكن لما تشوفني بموت ده يفرحك

ده يحسسك بقوتك

ده يقولك قد ايه انت جدع 

لتكون فاكر الوجع دلع

وان الصرخة ما بتتسمع

فوقك سما وتحتك أرض

مالكهم رب

لسة هايبقى ليه رد 

ورد ربك مالهوش صد

يا رب

محمد منصور

آخر كلمة كتبتهالك 

وانت ماشفتهاش 

أخر رسالة 

اللي انت مشيت بعدها وماقريتهاش

آخر مرة شفتك فيها 

مالحقتش أسلم وقت طويل 

مالحقتش أقول خليك موجود 

كان حواليك زحمة كتير 

وقتي معاك كان قليل 

آخر كلمة قلتهالي 

وآخر كلمة قلتها عني 

آخر توصية وصيت بيها الناس 

كانت آخر اهتمام وخلاص

لا بعده حد اهتم يسمع 

ولا بعدك بقى في حد بيرجع 

كله بيمشي .. كل المشاعر بقت تنداس 

آخر مرة قلتلي امشي علشان ما تتعبيش 

وفي نفس اللحظة بتقولي افضلي وماتمشيش 

مع كل يوم وحِدة من غير وجودك 

مع كل يوم بزرع روحي جوة أرضك وحدودك 

مع كل صديق يجرحني ويبعد

أفتكر طيفك فأحزن وأبعد

كنت ونعم كل حاجة جميلة في الحياة

كنت أجمل من إنك تفضل في الحياة

كان وجودك هو الحياة 

واكتشفت متأخر ... 

انك أخ وسند وضهر 

وإن بعادك جرح مر 

إن الدنيا لفت ودارت 

ومابقاش حد يهتم ولا حد يداوي جراح 

ولا حد ساكن في مدينة الصداقة

بقت كلها أشباح

كل ما الوقت يعدي ويفوت

أتأكد إنك كنت أصدق من إنك تفضل عايش 

صدقك كان لازم يعيش بالموت. 

ندى

قاللي لو تسلفيني اسمك أرطب بيه أيامي الجافة .. ده الندى مهما غطاه الحزن تفضل روحه شفافة .. يفضل عبير صدقه أقوى من آلامه المتشافة. 

قاللي لو تسلفيني اسمك أعمل منه أنهار للعاشقين .. يبقى مصدر خير للمساكين .. يبكي على ضفافه المجروحين .. وتطلع إيدك تطبطب وتداوي .. تكون سكن يعيشوا جواه آمنين. 

بترسم

وأنا بترسم وخطوطي انت.

بس لحد امتى

أنا هافضل رسمتك؟

وبتوه في عتمة ليل

مع انك كنت الدليل

وامتى هاتعترف ان العتمة سكتك ؟

ودي سكة مليانة طُرق.

وقلبك كله سكك.

وأنا لما أقرب أوصل، وأبقى على وشك.

ألاقي طرف طيفك بقى مستحيل.

وأنا بتعب في طريقك الطويل.

كله عوائق بتوجع.

كله خطوة بتقولي أرجع.

كل همسة ريح بتصرخ.

أخرتها ألم، فبسكت وأسمع.

دي أنة ألم ولا نشوى.

ودي نار قايدة من لسعة حشى ولا جراح بتضوي.

ودي صرخة فرح ولا فرحة بتتكوي.

ليه فرحتي غلفها الخوف.

ليه بيتردد قلبي الملهوف.

ليه اختارت عنيا العمى
 رغم إنها لسة بتشوف. 

هموم

حوش حتة من الضحكة 

وخليها سعادة منسية 

وارجعلها وانت مهموم 

ترسملك بسمة وهمية

لا انت فرحان بجد

 ولا مهموم بجد 

ولا حاسس بحاجة ولا حتى أي حد

أجمل لحظة في اليوم وهو بيخلص

أجمل أيام  العمر اللي بتنقص 

وكانت أجمل مشاعرك قبل ما تتجرح 

وترخص

لو سمحت

لو سمحت 

ولو كان عندك ليا وقت 

قولي ليه اتأخرت 

ليه عدى عليا أيام 

انت سايبني ولا سألت 

لو سمحت 

لو لسة جواك ليا شوية مشاعر 

طمني انا خايفة 

انت اللي ياما حطيت الدنيا بين ايدي 

لو قلتلك بس انا خفت

ليه دلوقتي ولا مهتم ؟ 

ليه حضنك ما بقاش بيضم ؟ 

ليه البرد جوة ضلوعك 

بقى شراعك وقلوعك 

ليه الجفا بقى الأساس 

هو اللي بيؤم 

لو سمحت 

وما تسبنيش اتوتر في وجودك غير المفهوم 

وانت اللي ياما شقلبت كيان الأيام حواليا 

لو قلتلك اني اتوترت 

لو سمحت 

ما تسبنيش أبكي خوف قربك 

اللي اقسى من عتمة بُعدك 

سيبني أحس بشوية أمل 

ما تستكترش عليا الأمل 

كفاية مرارة الهزيمة في حلقي 

لما حسيت اني عليك هُنت 

أنا حقيقي ببكي ألمي 

لما تيجي سيرتك وأقول انا عندك كُنت

بقيت ماضي 

ضاقت مساحتي في قلبك 

وأنا قلبي راضي 

خايف تمحيني يوم من حياتك 

قلب مكلوم ومستكين 

من غير حبك فاضي

أوصيكم أن

أوصيكم أن لا تجعلوني أكون 

وتتركوني أحيا موتي في سكون 

لا تتباهوا بمميزاتي 

لا تجعلوني مسار حديث آتِ 

اتركوني أستمتع بظلام مماتي 

وإن تذكرتموني يومًا 

فليكن بالدعاء بالغفران

على حياة لم أتمكن من أن أحياها 

اتركوني أنعم في دنيا النسيان 

لا تجعلوني أهيم كالأطياف الشاردة 

لا تعرف مسكنها ومن أسماها 

اتركوني أترنم بمعزوفتي 

اتركوني لنفسي لعلها تكون معشوقتي 

لعلي أتفهم أسرارها أخيرًا 

وأخرجها من الظلماتِ

ولتعلموا 

إني تمنيت الموت يومًا 

هربًا من ادعاءكم الكاذب 

عن حياتكم التي تحيوها 

وأنتم لا تفعلوا 

سوى أن تشقوها

اتركوني اتجرع مرارة موتي 

أو حلو اختفائي 

اتركوني ... 

فتلك هي اختياراتي