أنا والدنيا عايشين فيها
تحت سماها وفوق أراضيها
مهما تزعلني برضه أراضيها
أصلي أنا لسة عايشة فيها
في كل الحالات الدنيا هاتتعاش
وأنا عمري فيها لسة ما انتهاش
ولازم الحزن يكون مايسواش
إني أعيش فيه حتى يومين
أنا والدنيا عايشين في سباق
وأنا قررت أكون الأولي
يمكن ده ما يجيش بسهولة
بس أنا لازم أحاول كتير
بعمر قصير وقلب كبير
هاعلم في الدنيا ومش هاتنساني
ولا انتوا كمان هاتنسوني
هاتقضوا اللي باقيلكم تفتكروني
ياااااااااااه دي كانت حلوة وبتضحك كتير
وفي عز زعلها بتنكت
وفي زحمة الشغل واحنا مخنوفين
برضه ندي ماكنتش بتسكت
معلش .. معلش .. سامحوني
أصل ابتسامتي أكتر حاجة حبيتها
لأنها عمرها ما اتخلت عني
حتى لو دموعي قتلتها
برضه بتحيا غصب عني
هي دي دنيتي اللي أنا عشت فيها
وخلاص أنا راضية بيها
وبكل حد علمني حاجة
رغم إني لسة محتاجة
محتاجة ابتسامتي تخرج من قلبي
وأقول اللي جوايا من غير أخبي
........................
أنا ماعرفش عمري بقايله قد ايه
بس هاحاول أحقق فيه
كل اللي انا بحلم بيه
مكان واسع وكبير
فيه كل الي انا حبيتهم
علشان اقول كل اللي نفسي فيه
وبعدها هاروح وأنا راضية
وابتسامتي خارجة من قلبي
والعواصف جوايا هادية
خلاص خلاص مابقتش بخبي
أجمل حاجة إني بحبكم
عايشة عمري وأنا جنبكم
أصل وجودكم فرق معايا
ضيع الخوف من جوايا
وأكدلي إن عمري في الدنيا لسة ما انتهاش
وفي الاخر دنيتي برضه هاتتعاش