عشت كي ألخص حياتي في بضع سطور، لا تسمن ولا تغني من جوع، فما أقسى وأحلى أن أرى مشاعري على الورق تخطو خطواتها في سبيل إنقاذي من نفسي، إلا أنها لم تعرف أنها في طريقها هذا تمزقني
ونبدأ نحن أحياناً بالسوء كي لا يقتلنا التفكير نبدأ بالسوء كي لا يقتلنا البكاء
نبدأ بالسوء بعد ما منحناه يوماً
نبدأ بالسوء كي نمنحكم أعذراً واهية لكنها أعذار
نبدأ بالسوء كي لا نكره
نبدأ بالسوء كي نطيل الوقت من أجل العودة
نبدأ بالسوء كي نضحك علي أي ابتسامة حمقاء
نبدأ بالسوء كي ألجم عقلي وتفكيري
نبدأ بالسوء كي أعيد قدراتي علي التحمل
وعلي الرغم من أن السوء لنفسي وذاتي
ولم يمسكم هذا السوء يوماً
وأتحدي من تأذي منه يوماً
فإني أعترف أني منحت السوء لنفسي
كي أمنحكم الحياة
فتركتوا السوء بقلبي وبحثتم عن قلوب أخرى
تلعب دور الملهاة
وكانت تلك نهاية قلب
أحب من حوله وتحول من أجلهم لأشباه
وأصبح ظل علي الحائط يفرد كفه، لعله يلتقط شيئاً، يحاول الإمساك بأية أحلام أو آمال، أصبح ظلاً وما أتعس الظلال، حيث إنها محبوسة بشكل أبدي علي حائط لا تري أو تسمع أو تتكلم، كما أنها باهتة بلا ألوان، لا تفعل سوى حركات هوجاء وفقاً لما يراه صاحب الظل، فما أصعب أن تنتمي لعالم الظلال ما أقسى أن يكون ما يتحكم في الظلال هو شبح الماضي، دنيا أصبحت تنتمي في الأساس للظلال إلا أنها تبادلت معي الأدوار، فأصبح الماضي يتحكم في الحاضر وحوله لظلال، وغابت شموس الرؤية أختنق من رؤية الظلال، أختنق من كوني أصبحت أنتمي لهم، أختنق لكوني أشتاق لماضي ويفلت من بين أصابعي حاضر قد يكون أفضل، أعلم أنه بإمكاني جعله أفضل لكني لا أريد، فقد ارتضيت لنفسي وضع الظل لاحلامي وأمنياتي السابقة، فلماذا التعنت مدامت النتيجة معروفة مسبقاً سينتصر شبح الماضي
عمرك فكرت ترسم صاحبك من غير عيوب؟؟
مرة سمعت حكاية عجبتني قوى قوى هاكتبهالكم
يُحكى أنه كان يوجد ملك أعرج ويرى بعين واحده وفي أحد الأيام دعا
هذا الملك {فنانين} ليرسموا له صورة شخصيه بشرط" أن لا تظهر عيوبه
"في هذه الصورة فرفض كل الفنانين رسم هذه الصورة!
فكيف سيرسمون الملك بعينين وهو لا يملك سوى عين واحدة وكيف
يصورونه بقدمين سليمتين وهو أعرج؟؟!!
ولكن وسط هذا الرفض الجماعي {قبل أحد من الفنانين رسم الصورة}
وبالفعل رسم صورة جميله وفي غاية الروعه
كيف؟؟؟
تصور الملك واقفاً وممسكاً ببندقية الصيد بالطبع كان يغمض أحد عينيه
ويحني قدمه العرجاء
وهكذا رسم صورة الملك بلا عيوب وبكل بساطه
هي دي الحكاية ببساطة يا تري كام واحد فينا تغاضي عن عيوب صاحبه طالما فعلاً فاكره صاحبه؟
وكام واحد فينا مش بيشوف غير عيوب اللي قدامه؟
مثلاً لو انا وانت أصحاب انت فيك عيوب وانا فيا عيوب بس لو كل واحد فينا شاف عيوب التاني جزء لا يتجزأ منه واتعامل معاها وحبها كمان مش يتقبلها غصب عنه الدنيا هاتبقي أحلي كتير
طالما انا اخترتك صاحب من الأول يبقي عيوبك دي انا بتقبلها أساسا، يعني انا مثلا ممكن أتعامل مع واحد مغرور أو ناشف في معاملته لكن ما تعاملش مع واحد بوشين أو غبي، وخصوصاً الناس اللي بوشين دول اللي يعرفوك لمصلحة ما أو لسبب ما وأول ما السبب ده يخلص يبقي انت خلاص مالكش لازمة؟؟
حد فيكم قبل كده سمع عن حاجة اسمها حدود العلاقة؟؟
للأسف في ناس بتخلط قوى في حدود العلاقة دي هاقولكم مثل
لو انا عيانة بروح للدكتور ممكن أروح للدكتور سنة وكل مرة أروحله أشتكيله من نفس المرض أو من مرض تاني سيان بقي مش هاتفرق، المهم اني لو في يوم لقيت الدكتور متضايق وماسألتهوش مالك عمره ما هاييجي يعاتبني ويقولي ما سألتنيش ليه لأن حدود العلاقة بينا اني مريضة وهو دكتور، لكن انا لو ليا صاحب دكتور لو قعدت 4 مرات بس أشكيله همي هايزعل مني اني غيرت حدود العلاقة بينا، حدود العلاقة دي ما ينفعش تبقي من طرف واحد، لو انا وانت أصحاب وانا عرفت أقربلك لدرجة انك تحكيلي كل حاجة فده ميزة فيا انا عرفت أفهمك بس تخيل بقي في نفس الوقت لو انت ماعرفتش تفهمني وبالتالي ما قربتليش وما قدرتش تخليني أفتحلك قلبي فده عيب فيك انت، وللأسف أول ما تخلص حكاياتك اللي انت بتحكيهالي مش هاتلاقي بينا حاجة تقولها أنا أصلا ماهمكش في حاجة فبتبعد وممكن تلبسها للي قدامك مش مهم هي في جميع الأحوال مش فارقة
أجمل صداقة في الدنيا انها تكون بين اتنين فاهمين حدود العلاقة، في ناس متعتهم في الحياة العطاء بس ده مش معناه انهم مايخدوش حاجة، ماينفعش تيجي تقولي مش انتي بتفرحي لما بتسعدي اللي قدامك خلاص بقي اولعي انتي، لأننا بني أدمين محتاجين الحد الأدني من الاكتفاء العاطفي ودي حالة عامة علي الكل ما بتفرقش بين كويس ووحش
أجمل حاجة في الدنيا لما تلاقي صحابك بيهتموا بيك بنفس درجة اهتمامك بيهم بيسألوا عنك لما تغيب لما في يوم يكلموك علشان يقولولك انت فين بس أو وحشتنا، لما يطلع منهم تصرف بسيط بس يقول قد ايه انت غالي عليهم، وأصعب حاجة في الدنيا لما تلاقي الصاحب اللي عشت معاه عمرك بيبعد عنك لأنك بقيت غير ذات أهمية ليه
دايماً بعتبر ان علاقة الصداقة أهم من الحب والارتباط وأهم من الأهل كمان، لأن الصداقة هي العلاقة الوحيدة اللي بنختارها بعقولنا وإرادتنا، أهلنا دول مفروضين علينا شبهنا بقي ولا لأ حلوين وحشين أهم بغصب عننا بنحبهم، والحب العاطفي نفس الكلام كام واحد فينا حب واكتشف ان حبيبه مش مناسب ليه بعدين، ده غير ان الحب بيدخل فيه حاجات تانية العين بتحب قبل القلب أحياناً
• عارفة يا ندي حكاية النورس اللي قرر يطير فوق السحاب؟؟
• لا ماعرفهاش
• كان في نورس قرر يطير فوق السحاب في مكان محدش من زمايله وصله
• وعمل ايه؟؟
• فرد جناحه في الهوا وقعد يحاول يحاول يحاول لحد ما نام في حضن السما
• ووصل لفين؟؟
• محدش عارف
• طيب شاف ايه؟؟
• محدش يعرف أصله ماجاش تاني بس سواء مات ولا لسة حي الأكيد انه شاف اللي محدش من زمايله شافه، عارفة ده معناه ايه؟؟
• ايه؟؟
• ارمي همومك وطيري بعيد، ماتخليش الحزن يعجزك، ويحفر علي ملامحك ويتعبك، ماتخليش الوجع فيكي ينطق، افردي جناحك وعيشي في حضن السما سواء فضلتي حية ولا لأ، فرحتي ولا لأ، المهم انك شوفتي اللي محدش شافه... ندي سامعاني ؟؟؟
• والحيطان اللي بتضيق، والصديق اللي ما بقاش صديق، والحبيب اللي راح ومش راجع، والقلب اللي اتملي مواجع، وقلة الحيلة وضيق الصدر، والعيا المر، وعنيا اللي بتشوف عتمة في عز النور، والقلب المكسور، كل دول كتفوا جناحي وكتموا صرختي وخلوني عايشة ضيفة في دنيتي، بستني اليوم يخلص يمكن أخلص، بفتح عيني من النوم مستنية وجع جديد
• طيب ما انتي عيشتي بوجعك كتير، يا تري ارتحتي؟؟ شوفتي الخير، شوفتي فرح، يا بنتي ده مصير ومكتوب ولازم نعيشه
• طيب أعمل ايه؟؟
• حليه انتي اقبلي الحلو فيه أكيد فيه حلو بس انتي مش لاقياه، أكيد أكيد موجود حتى لو مش شايفاه، أقولك حاجة؟؟
• قول
• سمعني حكاية حكاية النورس اللي قرر يطير فوق السحاب؟؟
• عقلي يا عقلي
• يا نعم
• بحبك رغم انك تاعبني.
انتي غير أي حد
صدقيني غير أي حد
انا لو بنهار وماسكة نفسي قدام الناس
قدام عنيكي انتي بتهد
علشان انتي غير أي حد
انتي نفسي وانتي ضميري
ماينفعش تقولي بتكلمي غيري
ماهما واخدين اللي برة وانا من جوايا بتهد
لا قادرة أرسم عليكي
والشكل اللي برة أوريكي
ولا قادرة أتكلم عن اللي جوايا
صوتي اللي انحشر من الوجع
حزني اللي طاير في سمايا
واللي أكل مني وعمره ما شبع
تفتكري هاتفرحي أو هاتطمني لما تشوفيني بتهد ؟؟
أكيد لأ
علشان انتي غير أي حد
انتي النفس اللي خارج مني
وعايشة بيه بيطمني
انتي القلق اللي شاغلني
نفسي أطمن بس مش قادرة
وعجزى ده هو اللي قاتلني
خايفة في نظرك أقع وأموت
لما تلاقي أمانك بيفوت
لما تلاقي كل كلامنا اتحول سكوت
لا في حكايات
صبيان وبنات
ولا في فرح ولا حزن ولا شوارع وبيوت
خايفة في نظرك أتهد
وخوفي قاتلني مانتي غير أي حد
اوعي تيجي وتلوميني
بس من فضلك استنيني
حاولي بوجودك تطمنيني
حتى لو اللي بينا سكات
اوعي تصدقي ان الكلام مات
انا يمكن بسكت ساعات
لكن جوايا كلام كتير
كلام حب وأساطير
مشاعر فرح وحزن يبتمني علي ايديكي يطير
انتي الأمل وأحلي مكان
أدفي مكان
وقلبي ده ليكي عطشان
لجرعة أمان
طيب اطمئنان
وصدقيني
مجرد وجودك
بيحميني
مجرد اني عايشة جوة حدودك
ده بيكفيني
مجرد اني بنحني علشان أرسم عودك
ده بيرضيني
أسألك سؤال؟؟
هو انتي ممكن يوم تسبيني ؟؟
أكيد لأ
هاتفضلي جنبي ومعايا
زي ما وعدتيني
هافضل أشوف الحلم جواكي
جوة عيونك الملونة
هاتفضلي تحني وتطبطبي
بعيونك الحنينة
هاتفضلي معايا وليا أنا
مهما وجعتيني
ورغم مرور سنوات
مازلت أري نفسي تلك الطفلة
التي لم تتعلم بعد
السير بثبات
مازلت أراني أتعثر في الطرقات
وأثقالي أكبر من احتمالي
مازلت أضعف من ابتسامة الأصدقاء
وأصدق اللوم والعتاب أنه باب الصفاء
ومازلت أنظر حولي نظرات الرجأء
أن لا تتركوني
وحيدة في أرض جرداء
أن لا تتركوني
أبكي آلام جوفاء
ذات أصداء عالية
ولا تملك إلا مكنون من الخواء
مازلت الطفلة الصغيرة
التي قررت أن تحيا كما الكبار
فخلعت عني البراءة
وابتعت أثواب الرياء
فوجدتني فقدت طفولتي
واحترقت في النار
مازالت الطفلة داخلي
تائهة في عالم الكبار
كل الحاجات بتفكرنى بعيون حيرتها تحيرنى و الذكرى مش بتصبرنى
تمر صورتك اتبسم, الابتسامه تعذبنى كل الحاجات حواليا تدور زى الحيطان بتداري النور
و قلبي من بعد الطيران ما حيلته الا جناح مكسور ..... دلوقتى مهما اقول الأه و انت بعيد مين يسمعنى.
كل الحاجات الا عيونك ممكن انسى كل الحاجات من حواليا عارفة وحاسة
ضاع الونس يا قمر غايب بعدك مليش أى حبايب
دلوقتى حتى بخاف حزنى يبعد عني كل الحاجات كانت تضحك لما اقابلك...لا عرفت نفسى من بعدك و لا من قبلك... قبلك ماكنليش ولا حاجه.....بعدك سنينى محتاجة يا ريت تشوف دمعة صوتى لما أغني كل الحاجات بتعذبنى و أنا وحدانى .... تهرب قصادى و تقولى متجيش تانى دور على اللى كان وياك تحت الورود نايمه الأشواك كل اللى يومها فرحته معاك بيعذبني
الأغنية دي بالنسبالي يعني كتير قوي
يعني أنا
يعني كل حلم حلمته
طيب أنا مش ببعتها لبني أدم من لحم ودم أنا ببعتها لنفسي لقلبي
ببعتها لندى اللي كنت بقول عليها زمان مفيش حاجة ماتقدرش عليها، ندى اللي عاشت لوحدها وكانت شايلة مسئولية نفسها وقدرت تحافظ على نفسها، ندى اللي كان كله بيتباهى بقوتها، ندى اللي كانت بتعرف تعمل 100 حاجة في الدقيقة
ليه نفس الواحد ممكن تيجي عليه قوى كده ليه الواحد ممكن يفقد كل مقوماته للحياة
فجأة بقى حتى مالوش الحق إنه يطالب بإنه يعيش، الحياة خد وهات طيب انا بقى عندي ايه أديه؟ لا شئ وبالتالي بقى مش من حقي أطالب بشئ فبقيت برضى باللي موجود وده مش قاري طموحي ولا عاجبه ولا مكفيه
انا اتكسرت بجد يوم ما حبيت، يوم ما حطيت قلبي في إيد حد والدنيا أخدته مني، يوم ما اتنازلت إن قلبي مايفضلش ليا أنا، من أول ما حبيت نفسي مارجعتليش تاني، ياريتني فضلت عايشة نفس الحياة الهادية بتاعتي، من غير إثارة الحب اللي اسعدتني في وقتها وبعدين أخدت مني أكتر من اللي اديتهولي
كل الحاجات بتفكرنى بعيون حيرتها تحيرنى و الذكرى مش بتصبرنى
كل حاجة في حياتي بشوفها دلوقتي بتفكرني بماضي، كل صورة كل كلمة كل حلم، والذكريات بجد مابقتش بتكفيني زي زمان
و قلبى من بعد الطيران ما حيلته الا جناح مكسور ..... دلوقتى مهما اقول الأه و انت بعيد مين يسمعنى.
ودي حقيقة أنا حتى كلمة أه بطلت أقولها علشان مش هلاقي اللي يسمعها أه دي مرة كتبت حاجة وفي وسط الكلام كتبت عن نفسي "حلمي بسيط بس مش هاقدر أحققه من كتر بساطته بقيت بعديه وبسبقه" ودي الحقيقة أنا أمنية حياتي أعيش زي الناس العاديين بس لا عاوزة أكتر ولا أقل أنا وصلت لفوق قوى قوى قوى ووقعت بعدها لتحت قوى تحت الناس كلها وبقت أمنيتي أوصل بس للناس
ضاع الونس يا قمر غايب بعدك مليش أى حبايب
دلوقتى حتى بخاف حزنى يبعد عنى
عمري ما هاقدر أجرب احساس الحب بنفس صافية تاني لأن دايماً هاتفضل في حاجة مجروحة ونفس مكسورة، نفس هاتشيل أقل موقف وتحمله أكبر مما يحتمل، نفس أصلا فقدت الملكة إنها تحب
يا ريت تشوف دمعة صوتى لما أغني
مش لازم أغني كفاية وأنا بتكلم بقت في رنة حزن في صوتي غريبة وبقي عندي قدرة غريبة على السكوت بس هي مش قدرة على الصمت قد ما هي عدم قدرة على الكلام
كل اللى يومها فرحته معاك بيعذبنى
بجد بجد كل فرحة فرحتها في يوم من الأيام بقت بتوجعني دلوقتي حتى بخاف أتكلم عنها، في ناس ربنا خلقهم علشان يعيشوا احساسهم لوحدهم، وأنا يوم ما غيرت طبيعة ربنا فيا ماعرفتش أعيش تاني
في يوم الأيام
جبت ورقة وقلم
وقررت أكتب أي كلام
قررت أكتب عن إحساس ماقلتهوش
عن يوم عدا عليا وكنت أتمني ماعيشهوش
ممكن تحسي اني بتكلم عادي
واني مش بكتب عن أحاسيس
خليها عليكي المرة دي
واعتبريه شوية تهييس
اعتبريني من قلة النوم
عقلي فوت بقي كله تلبيس
تعالي بقي نبتدي حكاية
حكاية بنت اسمها ندي
حكاية بنت يا ضنايا
ماجبتش لسة 26
بس تشوفيها تقولي 80
يمكن من كتر اللي حصل
واللي جواها اتكسر
مش مهم
مين يهتم؟
تفتكري أصحاب؟
طيب هما فين؟
كام واحد شاف اللي جوانا
كام واحد زعل علشانا في يوم
كام واحد شافنا واحنا حزانا
وفكر مرة يخفف الهموم؟
كام صاحب جالنا وهو مهموم ؟
ولما ترجعله بسمته
يجري يدور علي دنيته
تصدقي انها اتقالتلي في يوم ؟
ماتزعليش مني يا ندي
بس وانا فرحان دايماً ناسيكي
مش بفكر فيكي
ولما بزعل
دايماً بجري عليكي
علشان أحكي ليكي
والله مازعلت ولا شلت في نفسي
ولا في يوم قلت لحد فيهم نفسي
...
أحكيلك عن مين ؟
عن بنوتة قربت مني
وفي يوم وليلة بعدت عني
وأحاول اقرب بس هي سابتني
وبعدها بكام يوم جت تعاتبني؟
وتقولي في بعدك الحزن قتلني؟
... ولا تحبي أحكيلك عن التانية؟؟
مانتي عارفاها
ومعايا شايفاها
مصت دمي
وقال ايه بإيد بتشيل همي
وبالإيد التاني بترمي عليا
وهي بتطبطب وبتمثل الحنية
...
أحكيلك عن مين تاني؟؟
أحكيلك عن واحد عرفته صاحب وصديق
قاللي هاتلاقيني معاكي في أي وقت
وكنت بشوفه كل دقيقة لما كنت بقوله خلاص ياعم زهقت
علطول مع بعض أصحاب وإخوات
بس خلاص ده زمن وفات
تصدقي يا بنتي
كان دايماً يقول انه مستغربني
ويسألني
انتي ليه بتستحمليني
ودايماً دايماً تسمعيني
والله والله وما ليكي عليا حلفان
دلوقتي اتغير مابقاش نفس الإنسان
ممكن يشوفني ومايسلمش
وبعتله وقلتله اني عيانة
وماتطمنش
ولا قال سلامتك
ولا قال انا جايلك
مع انه زمان
كان جاني
خلاص بقي ونشوف حد تاني
.....
أحكيلك عن مين؟؟
أحكيلك عن صاحب وصديق كان حتة مني
لدرجة عمري ما عيطت إلا قدامه
كنت كل ما أخاف هو بيطمني
وكنت بفرح لما بشيل أحزانه
عارفة كان بيقول عني ايه ؟
إنه عمره ما إدي سره لحد غيري
وانه أخويا اللي هايفضل موجود العمر كله
واني الشئ الحلو اللي فاضله
وفجأة حسيته بيبعد عني قلبي وجعني
مش المشكلة انه بيبعد
المشكلة انه كذبني
لسة مصمم انه قاعد وهايقعد
ندي .. بتتكلمي في ايه أنا موجود
ندي... ساكتة ليه من امتي كان بينا حدود
الحدود يا بني بناها الزمن
الصاحب مش بس في وقت المحن
الصاحب المفروض
دايماً موجود
...
أحكيلك عن مين تاني؟؟
هاحكيلك بقي عن الكبير
الحب العظيم
عن حب قعد 3 سنين
فيه متشعلقين
والدنيا تلطش شمال ويمين
واحنا مصممين
وكنا بنقول كلمة
هانعدي سوا طالما لسة عايشين
وتحسي ان الدنيا سمعتنا
وفجأة صبحنا ميتين
ماتستغربيش
ماهو واحد مات
والتاني عايش قلبه حزين
واحد بقي تحت التراب
والتاني مدفون في العذاب
وبقي جبان
يحب تاني ليشوف العذاب ألوان
وطبعا طبعا مش هايستحمل
اللي يموت مرة صعب تاني يتحمل
.....
ماتبصليش بقي
أنا عارفة نظرة عنيكي
بتسألني سؤال
هو مفيش حلو في حياتك ؟؟
أجاوبك؟؟
أمال انتي بتعملي ايه؟
انتي الحلو
وفي ناس تانيين
هاكتبلك عنهم بعدين
وأقولك هما ليه حلوين
بس لما اروق
ومن الاكتئاب ده أفوق
استنيني المرة الجاية
وأوعدك مش هاتأخر
ولا هاستهبل
قبل ماتمشي
تسمحيلي أقولك شكراً؟
مش علشان سمعتيني
شكراً علشان حستيني
