إليك أنت فقط

إليك أنت فقط ...

تكمن الأزمة في أنا

في أشيائي

في حديثي

في ثنيات أجدها في ردائي

في أوهام تسكن مخيلتي

في ضعف هو دائي

ويكمن الحل بين ذراعيك

أنت دوائي

من هم أعيش فيه أبدا

وأحيا سعيدة معك

في يوم استثنائي

تلامس قدماي أرضًا

وترتفع أناملي للسماء

ترسم بخيوط لامعة

أحرف اسمك

أمتلك السحب جميعًا

أصبح الهوى سمائي

لا تتركني وحدي

فلن أنجو وحدي

لن أحيا وحدي

فلتحمل عني بعضِ من تعب

امح عني عنائي

استمع لرجاء يهفو إليك

استمع يومًا لرجائي

خيوط ملونة

ملعون أبوها تكتيفة 

محدش حاسس بيها 

مش باين منك غير عيون 

بتبكي وهي بتطل

علشان مربوط بخيوط ملونة 

بتلمع في عيون الكل 

مربوط بجراح مش ظاهرة

وآلام كتير مخفية 

وماضي بيزود جرحك 

بحكاياته المنسية

وتفرح ساعات من همك 

بحكايات وهمية

لا حصلت ولا هاتحصل 

كان مولد خلاص وانفض

وكل جرح رجع لمكانه

وفضلت أحلامك في مكانها 

مرمية على الأرض

لا عاد لها طريق مفتوح

خلاص كله اتسد

معفرة ومتربة

بعد ما شوقك ليها اتهد

قلبي

وأنا قلبي صورة على الحيطة 

ترسمه يفضل ساكت

توجعه يتألم، تروح ألوانه 

يبقى باهت 

تفرحه يزيد ضي 

ينبض محبة 

ولو كان ميت من الوجع 

الفرح يملاه ... يرجع حي 

*** 

وأنا قلبي منحوت من حب وروح 

جواه خيوط عشق كتير

قادر يبني صرح كبير 

قادر يعشقك ويعيش جواك 

قادر يكون رد لسؤالك

جواب لما تنادي 

موال ليك شادي 

قادر يكون حتة منك وجنبك سمير 

أنا قلبي قادر يكونلك كل الدنيا ... 

بضمير

أنا قلبي كلمة ما تقالتش 

بيت شعر ماتكتبش 

صوت مكتوم كان نفسه يخرج وماخرجش

وهم كان نفسه يكون حقيقة وماتحققش

انا قلبي مكان محدش راحه 

بس جواه ذكريات كتير

أصوات كتير تسمعها جواك 

بتروح بيك لحد هناك 

وتشوف أحداث ماحصلتش

حكايات ماكملتش

وجع قلب هاين على الدنيا 

وقبضة ضعيفة على حلم موجوع لسة ماستسلمتش

وعد صادق لواحد ماكذبش 

حب في قلوبنا مصمم يعيش 

وقادر مايموتش

الموضوع صعب

الموضوع صعب 

صدقني صعب 

كأنك بتشرح للأعمى يعني ايه ألوان 

وإزاي يحسها من اللمس 

بتشرح للقاتل ازاي يكون إنسان 

يحن ويحس 

كأنك مطالب تتواجد في كل مكان 

مش مكان واحد وبس

الموضوع صعب 

صعوبة واصلة لدرجة المستحيل 

ومهما كان بالك طويل 

هاييجي يوم تحس بيأس 

هاييجي يوم تتمنى فيه 

إنك تعيش وبس 

بلاها فرحة 

بلاها حياة 

واقف انتباه 

متأكد إن الموضوع صعب 

بعرفك

أنا بعرفك لما بتكذب وتعمل مهتم 

بعرفك لما بتسأل من باب الواجب 

بعرفك لما اللي جواك بيجرحني 

بس انت تكذب وتجامل وتحاسب

بعرف لما نبرتك بتختلف 

وتختلق أعذار وهمية 

ومهما تحاول تبقى لطيف 

نبرة صوتك ليا بتكون رسمية 

بعرفك لما ترسم انك متساهل 

وانت مصعب العيشة واللي عايشينها 

لما تكون مش فاهم الدنيا باللي فيها 

وتعمل إنك أذكى اللي فاهمينها

بعرفك لما تحاول تفهمني إني الأذكى على الإطلاق 

بس عيونك فاضحاك 

انت شايفني الأغبى والأتفه 

بس بتحاول تخبي اللي جواك 

وأنا دايمًا رد فعلي سكوت 

مش مهتمة مين يكسب في الجدال ومين يخسر 

وفي الأخر النهاية واحدة 

كلنا هانموت 

سوى ولا متفرقين 

فضلنا مع بعض ولا بعاد 

اتكلمنا ولا قضينها سكات 

مهما قعدنا سوى طول اليوم وطول العمر 

في الأخر كل واحد بيغمض عنيه يواجه أحلامه لوحده 

ويلاقي أحلامه على قده 

ويقول في حلمه اللي ماقالوش في يومه 

في الحلم مش هانبطل كلام 

احنا بنكون على حقيقتنا بس في الأحلام

نفسك في ايه ؟

نفسك في ايه حبيبي 

نفسك في دموع تقف وما تنزلش ؟ 

ولا دموع تنزل وماتقفش ؟ 

أهات تطلع ولا تسكتش

ولا تسكت وماتطلعش ؟

نفسك في إيه ؟ 

في حلم قديم لسة ما تحققش ؟

ولا انك تعيش وماتحلمش ؟ 

نفسك تموت لأنك مش قادر ماتموتش 

لعبة

أنا لعبة في محل لعب 

قاعدة مكانها ع الرف 

ساكتة من سنين 

وميتة من التعب 

بتبص على الموجودين

وهما بيختاروا 

وازاي بيفاضلوا بين اللعب 

ويقلبوا ويحتاروا 

أنا لعبة في محل لعب 

وقعت في ايد طفل مجنون

اختارها ولعب بيها 

وحول متعة اللعب لجنون 

أنا لعبة مرمية 

باصة للسما وساكتة 

ممنوعة من الحرية 

أنا لعبة لسة بتحس بتعب 

من أيام ماكانت 

ع الرف في محل اللعب 

حلمت

حلمت تكون طيف في أحلامي 

وأفضل أحبك يا طيفي 

حلمت بأحلام وردية 

وإن الدنيا على كيفي 

صحيت لقيت الأحلام 

ماتت وضاعت من إيديا 

بس بقيلي في الصبر شوية 

أشكلهم أحلام مندية 

وبرضه لازم يكونوا عنك 

واخدين شكل مساحتك 

يشاركوك في فرحك 

ومين قد حلامي يفرحلك 

حلمت بمكان فضا وكله غنا ورقص 

حلمت بكلام يتقال بأعلى صوت 

بس فيه روعة الهمس 

حلمت بعالم مش محرمين فيه 

جمال اللمس 

انتحار

محدش يقولها ولا يشرحلها 

محدش يقولها إنه انتحار 

محدش يقولها إني يئست 

وإن حياتي اسودت وبقت زفت

قولولها الحياة كلها ضحك ومسخرة 

وأنا كان نفسي بقى أبطل هزار 

*** 

محدش يقولها كانت بتبكي لوحدها

ولا إزاي تموت اللي ملت الدنيا بصوت ضحكها

ولا حد يقولها إن بنتك مليانة تناقضات مرعبة

وإزاي ما أخدتيش بالك منها

وإوعوا حد يلوم عليها 

أو حتى يطبطب ويبكي قدامها

أنا أمي زيي مش بتحب تبان ضعيفة 

وده بيبان قوي في كلامها

***

قولولها إن إللي أنا فيه ده رحمة 

وإني تعبت من مواجهة أزمة ورا أزمة 

وتعبت من كتر ما شلت وخبيت 

وإن حتى قلبي مارتاحش لما حبيت

قولولها إني والله فكرت كتير 

ولقيت ربنا هايبقى أرحم بكتير

ودعيتله كتير إنه ياخدني

ولما ماحصلش قررت إني أروحله 

نفسي بس أقوله

إني استحملت على قد ما اقدر 

أكتر من كدة كنت هافقد يقيني 

كنت على وشك أكره المتقدر

كنت على وشك أطق من كتر الجنان

***

محدش يقول لأمي إني هدخل النار

ماتتعبوهاش

ومحدش يقولها إنه انتحار

محدش يقولها إني يئست

وإن حياتي إسودت وبقت زفت

قولولها إن الحياة كلها ضحك ومسخرة

وجه الوقت اللي هابطل فيه هزار

ارتويت الحب

ارتويت الحب حتى أسكرني فترنحت أفكاري.

وأخطأت كثيرا ولم أدرك أنه يحصي أخطائي.

فأخذت أنطوي على نفسي ولا أسرد خوفي لغير أشعاري.

فانظر ماذا جناه عليّ الخوف عندما اعتلى أفكاري.

أصبحت صامتة كما الجمادات. 

تتحرك الشفاه بالبوح ... ترتعش العيون بالنوح

ولا أتفوه أسراري.

فتلاحقني بسوء الظن ... وإليه يعود فضل انهياري.

ومن الخوف أصرخ من فوق قمم أشجاري. 

أنا هنا ... أخشى ظلام الأسفل. 

ولا أسمع في الأفق غير أصدائي.

فأسقط في يأس وتبتلعني مياه هائجة. 

قتلتني دموع أنهاري.

ماريونت

كلنا ماريونت 

مربوطين بخيوط 

متحددة خطوتنا 

بالظبط والمظبوط 

ولا حد قدر يتكلم 

وقت ما أمروه بالسكوت 

كلنا ماريونت 

وفي ايد بتحركنا 

بتحددلنا كلامنا 

دموعنا وسكوتنا

كلنا ماريونت 

ولانعرف نعمل حاجة 

كلنا عرايس موهومة

ومهما نحب ونعيش ونبني 

اتفرد ضهرنا ولا عيشنا بيه محني 

دي خطوات محددة 

بالخيوط مرسومة

وأنا من أكون ؟

وأنا من أكون !؟ 

أنا من تشتهيها سراً وتنكرها علناً 

ترفضني آياتك جهراً ويسردني قلبك سراً 

أنا من تلعنني نهاراً وتتمناني ليلاً

أنا الحقيقة التي تخفيها وتتمخض أمامي كذباً 

أنا الأحاديث المسردة بينما يستهي عقلك صمتاً

أنا الشيء ثابت حدوثه بينما بقية أحداثك وهما

أنا قوس انحني أمام عقلك وأُطلق لقلبك سهما 

وأنكرته كما الأكاذيب بينما هو يؤلمك حقا

ماصدقوناش

ماصدقوناش ... 

لما قلنا قلبنا اسود 

مابنقبلش الإساءة 

ولا القسوة اللي تهد أي علاقة 

ماصدقوناش ...

قالوا استحالة 

ده اللي يحب مابيئساش 

ماصدقوناش ... 

لما قلنا مابنجيش بلوي الدراع 

ولا صدقوا اننا نقدر نقول وداع 

فجأة لما بعدنا حسوا الضياع 

حسوا انهم مايعرفوناش 

وماصدقوناش 

بس بكرة هايصدقوا

لما مانرجعش

لما ييجوا على بابنا 

واحنا مانفتحش

لما القسوة تقفل قلوبنا ونبطل نحن 

هايعرفوا ... 

ان اللي عاش عمره يداوي ويطبطب 

ممكن يبعد لو مجروح 

ويفضل عايش زي ما عاش

المهم يصدقوا ويبطلوا 

مايصدقوناش

تصدق أو ما تصدقش

تصدق أو ما تصدقش 

قلبك ممكن يعشق 

بس عنيك ما تعشقش 

وعنيك ممكن تموت 

وقلبك حي ما بيموتش 

تصدق أو ما تصدقش 

ممكن اللي داويت جرحه امبارح 

يجرحك النهاردة 

وعليك ما يصبرش 

تصدق أو ما تصدقش 

ممكن اللي كان مظلوم امبارح 

ونايم ودموعه على خده 

يصحى يقرر يظلم كل الناس 

منهم اللي ظلم ... اللي ما ظلمش 

واللي قدر يعلن وجعه 

وجعه معلم ..

زي اللي ما أعلنش 

واللي اتجرح وقال أه 

مات مدبوح 

زي اللي ما قالش 

كله بيوجع ... كله بيألم 

كله هايسكت ويبلع ألمه 

حتى اللي عمره كله ما سكتش 

الصديق

إنت صديق

وقت الفرح ... وقت الضيق

وقت الخنقة بتكونلي شهيق

وقت ما اتوه روحك طريق

إنت الصديق

وقت الخطر روحك سابقاني

 وقت الموت روحك حامياني

 ما انت الصديق

وفي فرحي بتضحك من قلبك

حتى لو قلبك في الحزن غريق

ما انت صديق

إنت الجمال بأجمل معانيه

والحب بأروع أساميه

إنت القريب .. إنت الناصح .. إنت الصريح

إنت الشقيق

إنت الصديق 

أيوة بحبك

وجودك شيء مكملني

ضل طيفك اللي بيبهرني

سكوتك ... كلامك .. حركة عنيك

وكل حاجة منك بتشغلني

حزنك اللي بيقتلني

دموعك اللي بتجرحني

كل ما فيك بيكملني

كل خط فيك بيرسمني

كل كلمة منك بتنطقني

كل صوت حواليك بيسمعني

رجوعك ليا اللي فرحني

صوتك اللي لما سمعته

لقيت روحي بترجعلي

لقيت قلبي رجع يتنفس

حتى الضحكة بقت بتضحكلي

أيوة بحبك

مهما قالوا ده حب غريب

الغريب هو تفكيرهم

وتصورهم إني عاوزاك حد عادي

إني عاوزة أحبسك قصادي

رغم اني بحبك من بعيد لبعيد

حب بس يحتويك ... يدفيك

حب اتخلق بس .. علشان يشوفك سعيد

أيوة بحبك

مهما قالوا مايصحش وماينفعش

ده حب ابن موت ومايعش

خليهم يقولوا ويرغوا كتير

انا اتعودت غيرك ماسمعش

 أيوة بحبك

وبُحبك بس عرفت تاني أرجع أعيش

أيوة بحبك وبطلب منك

تفضل جنبي وماتمشيش

أيوة بحبك وبتمنى قلبك

يفضل هنا وجوايا يعيش.

أنا عفريت

وانا كل يوم أقرر وأصحى الاقيني ناسية قراري 

تبقى انت اللي جارحني وأجي أقدملك اعتذاري

أبقى عايشة متكتفة وبضحك كأن القيود اختياري

تبقى عايش جوة مني وعارفني وأخبي عليك قال يعني بداري

وساعات تخرج برة مني واقولك عني حبة توافه وكأنها أعظم أسراري

والاقيك بتضحك زي الأطفال أتاريك عيل اه يا مراري

وابص فجأة في مرايتي وماعرفنيش وافهم

ليه التناقضات وأقول اتاري 

انا عفريت أصلا لابسني ولو خرج منه هالاقيه من قدامي جاري

بس هامسكه واخليه يلبسني تاني اصلي بحبه والجنان في قلبي لسة ساري. 

برسم

قاللي:

هاقعد أوصف حبي ليكي وترسميني

أكتبك وتنطقيني 

أترمي في حضنك وترحميني 

قلتله: 

 القلم مش جايب ملامحك

مش راضي حتى يكتب اسمك

مش قادر يخط خط يحكي فيه ردود فعلك
 ولا يلحقك في كذبك 

واضح انك برة اهتمامات قلمي واضح انه مش قابل رسمك

عنك انت

لما انت غبت 

لقيتهم بطلوا يجيبوا في سيرتك 

بطلوا يسألوا عن حبك

أتاريهم سكتوا لما انا بطلت اتكلم عنك

وعن اني ازاي دايما بحبك

سكتوا وهما مش فاهمين

ازاي بطلت احكي عن قلبك

وانا كنت بسكت علشان ماحكيش وجعي بسببك 

علشان روحي ماتخرجش مني 

وغضب عني

تنادي باسمك

كنت بسكت أحسن ملامحي

تاخد في بُعدك شكلك

كان حلم جميل عندي 

اني أكون فعلا شبهك

بس ماينفعش وانت بعيد

ملامحي تفكرني بيك وتبقى حتة منك 

ولما انت رجعت 

وبقيت تقضي معايا كل وقتك 

لسة محتاجة اصدق 

انك جيت من نفسك

عاوزاك تقول دايما ان اللي رجعك ليا ... 

هو قلبك

لو على الراحة

لو على الراحة أنا مش مرتاح

100 جرح ومفيش سماح

100 خيال وكله أشباح

ولا حد ليه صوت ولا صدى

لو الراحة انا كدة مقتول

حركة كتير وفي الاخر مشلول

أيام بتقع وأنا مش مسئول

راسي فوق ... قلبي فوق

بس جوة نفسي ساعات مكسور

لو على الراحة فهي لوحدي

أحكي لنفسي وأنا فاهمة قصدي

وأقول كلام أخد فيه وأدي

لو على الراحة فأنا مخنوق

بتنفس بس مخنوق

بضحك بس برضه مخنوق

وأبكي من كتر ما انا مخنوق

وكل ما اجي أفكر أموت

أكتشف اني مش قادر

أكتشف اني مجرد مخلوق
عايش مخنوق

أنت لم تعد لي

أنت لم تعد لي 

ولم تعد تثيرني آرائك 

لم أعد أنتشي 

وانا أسرد على الجمع أسمائك 

فيوم أنت حبيبي ويوم أنت روحي

واليوم أطلب منك الرحيل 

فاحزم الحنين معك في حقيبة أشيائك 

ولن أبكي رحيل وجهك الكريم

وكذلك لن أعدد جراحك لي عند أصدقائك

فالنسيان اسم اللعبة

أو التناسي لأحزانك

وسيأتي يوم أراك فيه

فأنقب داخل قاع مخيلتي

لعلي أجد لك أثر 

ولن أجد إلا ذكري وحيدة

فرفيقها مثلك عندي 

مات واندثر.

تعالى

اقراني صح كما قال الكتاب 

اضحك في وشي من غير عتاب 

واسأل دايما بلاش الغياب 

تعالى نحلم لحد النجوم 

ماتخليش وجع الحقيقة 

يهزمنا ومن أحلامنا نقوم 

طيب تعالى نبكي 

لحد ما نموت 

ودموعنا تنزل سيول

ف بكا من غير صوت 

مين قال مفيش ألم ؟

ده مفيش أقسى من ألم السكوت 

تعالى نجري مشاوير مشاوير 

تعالى نعدي من الطريق الطويل 

علشان نفضل فترة أطول سوا 

تعالى نسيب ملامحنا للهوا 

ينحتها ويشكلها 

ونسيب حتى التراب يجرحها 

خلي الجراح دي ترسمها 

طيب تعالى نكتب كتير 

ومن حروفنا نرسم رسمة 

تعالى نرسم وش كبير 

ونحط عليه خط البسمة 

وحواليه كلام كتير 

عاوزين حروف تعمل زحمة 

المهم تعالى نعمل حاجة 

تعالى ندخل في قلب الدنيا 

حتى لو هي مش محتاجة