نفسك في ايه ؟

نفسك في ايه حبيبي 

نفسك في دموع تقف وما تنزلش ؟ 

ولا دموع تنزل وماتقفش ؟ 

أهات تطلع ولا تسكتش

ولا تسكت وماتطلعش ؟

نفسك في إيه ؟ 

في حلم قديم لسة ما تحققش ؟

ولا انك تعيش وماتحلمش ؟ 

نفسك تموت لأنك مش قادر ماتموتش 

لعبة

أنا لعبة في محل لعب 

قاعدة مكانها ع الرف 

ساكتة من سنين 

وميتة من التعب 

بتبص على الموجودين

وهما بيختاروا 

وازاي بيفاضلوا بين اللعب 

ويقلبوا ويحتاروا 

أنا لعبة في محل لعب 

وقعت في ايد طفل مجنون

اختارها ولعب بيها 

وحول متعة اللعب لجنون 

أنا لعبة مرمية 

باصة للسما وساكتة 

ممنوعة من الحرية 

أنا لعبة لسة بتحس بتعب 

من أيام ماكانت 

ع الرف في محل اللعب