حقنا

لما الدنيا تظلمنا بالحرمان 

وبعدين تدوس علينا بالحنين 

طيب مين يجيب حقنا إحنا الاتنين ؟

من يكون لينا دليل 

مايسبناش تايهيين 

مين يطبطب ومين يواسي 

ومين يجيب حقنا 

احنا الاتنين ؟

مين يجيب حق اتنين عاشوا في الحرمان 

محرومين 

وبعد الجرح 

فضلوا عايشين 

بالجرح مدبوحين 

فاكرين وهايفضلوا فاكرين 

كل كلمة اتقالت 

كل نظرة 

كل لمسة حب وحنين 

بس مين 

بعد الموت يجيب حقهم 

هما الاتنين ؟

اوعي تخافي

اوعي تخافي

يلمسك شر 

اوعي تخافي

العمر يمر

اوعي تخافي 

من أي قيود 

وإنتي طير حر 

واوعي تموتي

وقت ما يبقى الموت

هروب وضعف

واوعي تعيشي 

وقت ما الدنيا تكون بس صنف

مركونة على الرف

ولا تشتاقي

لو شوقك مش كله شغف

خلي الشوق في خيالك

من غير سقف

خليه شئ تعيشي معاه

دايما حاساه

وفي أعمق أعماق حبك

شايلاه محاوطاه

سيبي العشق

يعدي عليه العمر 

واوعي تخافي 

لما العمر يمر

أنا أسف

طيب أنا أسف 

على اللي بيحصل واللي بيجرى

أنا أسف 

أني في يوم نمت

 من غير ما أبوس عيونك السمرا

أني عدى عليا دقيقة ماقلتلكش فيها 

إنت الأجمل انت الأغلى

أنا أسف 

أني نمت في مرة وانت سهران 

أني ماوهبتكش كل ما املك من الحنان

سيبت حاجة اديهالك في المستقبل

ونسيت .. أن انت المستقبل 

انت في عمري .. 

معنى الأمان 

قلبك وطن

في وقت اتهز في 

معنى الاوطان

وحبك دفا 

ينام في حضنه حنين سهران

قلبك وفا 

وماتخلقش لحبك غيري أي إنسان