علي فكرة

 علي فكرة أنا لازم أخد عليها كدة
هي مش هاتتظبط ولا تتغير عن كدة
وياما قلت لنفسي كدة
بس ضحكت علي نفسي بأمل صغير رغم اني كنت متأكدة
وهمت نفسي إنك غير
وأتاري فكري لعقل مريض أسير
تعبت ودماغي شتت من كتر التفكير
انت ليه في وجودك بتتغير
ليه الاهتمام بقي بيصغر أكتر
هاتصدق لو قلتلك انك بقيت بتيجي في خيالي قلبي بيوجعني أكتر
بحس بنغزة البعد والهم
مش مهم ان بقي في أهم
المهم اني حاسة اني بقيت من غير اسم
الأزمة انك بتجردني من احساسي
ومش باقيلي إلا أوهامي
اللي بتحرق قلبي مع أنفاسي
وأهي نار بقضي بيها أيامي
أه لما قلبي اتحرق لما انت غبت عني
قلبي وجعني
لما اتمنيت آلاقيك تعبان
يمكن ساعتها أسامحك علشان سايبني
بس للأسف أنا خاب ظني
أو اتأكد سوء ظني
ولما بترجع مش عاوز حتى تعتذرلي
لأن ده بقي الواقع وده اللي فاضلي
وأنا هاقبل زي ما اتعودت اني أقبل
بكرة الأيام هاتعدي والدنيا هاتبقي أسهل
وأعتقد انك زيك زي غيرك
بكرة ييجي يوم ويصحي ضميرك
وهاترجع وهاتستغرب
ويمكن ماتقبلش
ان بقي في حد أقرب

أول مرة

أول مرة من سنين 

تخوني حروفي 

ويخنقني خوفي 

أول مرة أفكر قبل ما أكتب 

وأفكر أبطل أكتب 

حسيت ان الحروف مش مسعداني 

وجيت أرمي علي الصداقة 

لقيتها المرة دي مش ساعفاني 

كل ما أكتب كلمة أمسحها 

أخاف تيجي علي روحي وتجرحها 

أخاف تفكرني 

أخاف تقهرني 

دخان إسود قدام عيني 

ومانعني أشوف 

عامل غشاوة علي عيني 

وغطي علي الحروف 

ولقيت حروفي سايباني 

يعني سابتني 

بعد ما خانتني 

مش باقي

 مش باقي مني غير شوية جروح 

مش باقي غير دموع وأهات بتخرج بطلوع الروح 

مش باقي غير هم وحزن وأمل مدبوح 

مش باقي غير دنيا عجزت فيها وشعري شاب 

شعري أبيض في سن صغير بس الحزن خلاه شاب 

وهدني العجز بس الحزن جوايا لسة شباب 

مش باقي غير صديق بيسأل في وقت الفراغ 

أو وهو حزين ومحتاج يوقف قطر الهم اللي بيه داخ 

مش باقي من كلامي غير كلمة أه وانتظار 

مش باقي غير رعشة برد في قلب النار 

وشوية أحاسيس مش مفهومة 

من امتي النفس المهمومة 

بتحس ولا ينفعلها احساس 

ولا حتى بيبقبلها الناس 

من امتي الدمع بيروي عطشان 

ولا الدموع عملت إنسان 

حتى الدمع الراقي النبيل 

بقي جنب صراخ وعويل الألم 

أكفان 

يا صاحب الحزن النبيل 

ياللي بتضحك وقت المستحيل 

ويسيبوك ويرجعوا علشان عارفين انك هاتقدر تشيل 

ما انت شايل الهم التقيل 

مش باقي من ملامحي غير نفس العيون الملونة 

بس حزينة وهي بتضحك 

كانت الفرحة بتديها ألف لون 

بس الحزن لونها بلون الجنون 

اللي بتدور علي فرحة مكسورة 

في قلب الهموم 

مش باقي غير شفايف اتعودت علي البسمة 

وعلي الفكاهة في الصحبة واللمة

بس لوحدها 

بتضم علي نفسها 

وتفتكر الوجع لحد ما تنزف 

وييجي الصحاب تضحك أصلها لوعدها 

عمرها ما تخلف 

مش باقي غير الجراح المستخبية 

والبسمة والضحكة الوقتية 

انا نفسي أرمي نفسي في حضن الليل 

وأشم نسمة الشتا يمكن تكون للراحة سبيل 

بس الحزن مكبلني 

عبء عليا وقاتلني

ومقعدني مكاني

وسط ذكرياتي وأحزاني 

 انا فجأة اكتشفت اني موجودة كلي 

بس الهم غير جلدي 

وبقي ده بس اللي فاضلي 

بحبك

بحبك كلمة كانت كلمة حروفها متبعترة

أجمعها وانا قلبي بيدق وأسأل نفسي هاتطلع ايه يا تري؟

الاقي حاجة معناها مالي عمري بس حروفها صغيرة

ده حتى من صغرها فيها حروف متكررة

بحبك كانت معني لكل ابتسامة علي ملامحي

أقولها ألاقي ايامي بترجعلي وتقولي سامحي

ليه هنت عليك تسيبني للسكات وبقي الحلم في حبك رايح مش جاي

سلملي علي ضميرك وقولي لو مرتاح بيجيلك نوم إزاي

قادر تغمض وتحلم وتستني بكرة ؟

قادر تقول لنفسك التعود هايقتل الذكري؟

الأزمة مش إنك بعيد ولا إنك نساي

الأزمة انك سايبني للسكات

فراغ من وجودك مليته الدموع

فكرة شيطانية إني أروح من غير رجوع

الأزمة انك سايبني وانت عارف ان في بعدك مفيش إلا أهات

أنا لا قادرة أكرهك ولا أعيش في بعدك يوم

كذبوا كل اللي قالوا ان الحب مش بيدوم

الحب دايم حتى لو مجروح مكتوم

كذبوا كل اللي قالوا ان الحب بس بين حبيبين

وان الحب يعني ولد وبنت ولازم يموت بين الاتنين

الحب عمره ما كان ضروري حتى يكون بين قلبين

الحب ان مجموعة ناس يبقوا متفقين

يحسوا ببعض خايفين علي بعض ومن البعد خايفيين

انا خايفة تنسي تسقي الحب ويبقي أصفر دبلان

وندوس عليه بجديد حياتنا ونسمع خروشة موته

وياريته هايموت ده هايبقي كائن ضعيف مكسور جبان

وليه تضغط ظروفنا عليه

ليه نحط هم الدنيا فيه

انا خايفة يتوه الحب في معاني حياتنا ويبقي بس تعود

ده الحب لو راح بينا عمره أبداً ما يتعوض

ماريونت

دايماً بتربطني بأحزاني خيوط ماريونت

تتلخبط أيامي وألاقيني من العمر وقعت 

وكل ما أصرخ أكتر 

العتمة في عيني تكبر 

والدموع تزيد وتكتر

وألاقيني في دمعي غرقت 

أكتم دمعي وأقول 

ياريتني كنت سكتّ 

 وسيبت نفسي لخيوط الماريونت 

ما هي الناس أهي عايشة 

بخيوط مربوطة فيها 

تجيبها وتوديها 

ليه قررت أكون مختلفة ؟ 

ماليش شبيه ولا شبيهة؟ 

ليه قررت ألاقي معني؟ 

وليه عاوزة أحلام صافية أحميها ؟

دلوقتي بقت أحلامي بتقطع فيا بسكاكين 

أحلام مين يا بنتي فوقي 

اللي حلموا قبلك ميتيين 

واللي مامتوش

علي رصيف الجنون مرميين

بيتقالهم يا مجانين 

من كلامهم مش مفهومين 

يا بنتي افهمي 

لو حياتنا ملكنا 

كنا داوينا ألامنا وكبرنا سعادتنا وفرحنا 

يبقي ارضي بنصيبك وعيشي زي التانيين 

*** 

لا أنا مختلفة بقي 

ومش هارضي أكون وسط المهزومين 

هاحارب لأخر يوم 

ومش هارجع أتمني إني أسكت

وعمري ما هاقول يا ريتني كنت سكت 

أنا برفض الدنيا والواقع اللي أعيش فيهم 

مجرد عروسة ماريونت  

كراكيب

يعني ايه كراكيب؟؟ 

كراكيب هي الحاجة اللي بنركنها ونخزنها بمرور السنين علي أمل ان هاييجي يوم نستخدمها تاني أو نحتاجلها، ومع مرور الوقت نكتشف ان حياتنا مليانة كراكيب وماعندناش مساحة لأي حاجة جديدة،، الكراكيب في حياتنا هي الذكريات، كام مرة بنبقي قاعدين لوحدنا ونفضل نفكر في الذكريات لو فرحانين بنفكر في الذكريات الحلوة ولو زعلانين بتطلع الذكريات السودة، أصلاً أصلاً احنا مش فاهيمين ان حتى الذكريات الحلوة ماينفعش تبقي حاضرة في حياتنا بالشكل ده، ولا حتى الوحشة لأننا بنحصر الاحساس في الذكريات دي، ولو حصلت حاجة جديدة مافرحتناش بنفس حجم الفرحة بتاعة الذكريات تفضل الذكري دي طاغية علي تفكيرنا بشكل غريب، بيفضل ده تصورنا عن الفرحة عاوزين فرحة مشابهة ليها علشان نحس اننا فرحنا بجد، وفي الذكريات السودة دايماً حاطينها قدامنا علشان لو حصل فعل تاني حزين وعاوزين نعيط مثلاً نفتكر الذكري السودة دي ونعيط، ودايماً نفسنا لما نكون زعلانين تفكرنا بالذكريات السودة كلها ونلاقيها بتمررنا

أنا نفسي نعمل حاجة مهمة وانا شخصياً نفسي أتعلم أعملها، بفكر أطلع الصندرة اللي في عقلي وأطلع كل الكراكيب وأقلب فيها وأفتكرها وأفرزها كده حاجة وأفتكر كل حاجة عملت فيا ايه سواء فرحتني ولا زعلتني وبعدها أخد الكراكيب دي كلها أرميها طالما مافيهاش حاجة لسة سليمة، هي أصلاً فايدتها كلها معنوية بس سلبية يا رب أتخلص من كل الكراكيب اللي في عقلي بقي