علي فكرة

 علي فكرة أنا لازم أخد عليها كدة
هي مش هاتتظبط ولا تتغير عن كدة
وياما قلت لنفسي كدة
بس ضحكت علي نفسي بأمل صغير رغم اني كنت متأكدة
وهمت نفسي إنك غير
وأتاري فكري لعقل مريض أسير
تعبت ودماغي شتت من كتر التفكير
انت ليه في وجودك بتتغير
ليه الاهتمام بقي بيصغر أكتر
هاتصدق لو قلتلك انك بقيت بتيجي في خيالي قلبي بيوجعني أكتر
بحس بنغزة البعد والهم
مش مهم ان بقي في أهم
المهم اني حاسة اني بقيت من غير اسم
الأزمة انك بتجردني من احساسي
ومش باقيلي إلا أوهامي
اللي بتحرق قلبي مع أنفاسي
وأهي نار بقضي بيها أيامي
أه لما قلبي اتحرق لما انت غبت عني
قلبي وجعني
لما اتمنيت آلاقيك تعبان
يمكن ساعتها أسامحك علشان سايبني
بس للأسف أنا خاب ظني
أو اتأكد سوء ظني
ولما بترجع مش عاوز حتى تعتذرلي
لأن ده بقي الواقع وده اللي فاضلي
وأنا هاقبل زي ما اتعودت اني أقبل
بكرة الأيام هاتعدي والدنيا هاتبقي أسهل
وأعتقد انك زيك زي غيرك
بكرة ييجي يوم ويصحي ضميرك
وهاترجع وهاتستغرب
ويمكن ماتقبلش
ان بقي في حد أقرب