مين !!؟؟

طيب وانتي مين يداويكي

انتي مين يطبطب عليكي 

انت مين يحضنك ويمسح دموع عنيكي

انتي مين هاتبكي قدامه

من غير ما يقولك كفاية وجعتي قلبي 

ولا هايطلب منك تسكتي

لأنه مش مصدق إنك بتبكي

مفيش حاجة بتفضل على حالها

مفيش حاجة بتفضل على حالها

ولا بتفضل بدرجة جمالها

توبها مع الحزن 

بيبقى أسمالها

والدموع بترسم أشكالها

مفيش حاجة بتفضل على حالها 

ولا تبقى أبدا زي ما كانت 

ولا الحزينة عمرها ما فرحت 

ولا الجميلة عمرها ما خانت

وياما الغالية إتغدر بيها

واتجرحت وياما هانت

لا الأسود بيفضل قاتم

ولا الأبيض بيفضل منور

الأسود كتير بيبهت 

والأبيض أصلا باهت

ولا الظالم بيطلعله قلب

ولا المظلوم بيفضل ساكت

ولا الصداقة بتفضل قوية

ولا الحب بيفضل ثابت

ولا الي بيتنفس يبقى حي

ده ياما ناس جوة نفسها

ألف مرة ماتت.

حتة مني

في حتة مني جوة مني
لسة عاوزاك
وفي حتة مني أقوى مني
دايما شايفاك
في حتة مني بتفضل تغني
دايما سامعاك
اتاريني كلي
تملي
محتاجاك
في جزء مني
عايش بالتمني
انه يلقاك
وفي حتة مني
غصب عني
مستنياك