نفس العادة مابطلتهاش
فاتت سنين ومانسيتهاش
وبيتأكدلي كل يوم
مايموتش اللي جوانا عاش
***
نفس العادة ويمكن نفس الحروف
والقلق والرعشة في بُعدك والخوف
واللوم والقهر وعتاب الظروف
وجملة ما كان زمانا كنا ... بس ماكناش
***
وفي نفس اليوم كل سنة
باجي أرتب شوية كلام
وأقلبها دموع ومحزنة
وبعدين أستناك في شوية أحلام
وانت أبدا مابتجيش
استنيت ليالي كتير
ناديت بس ماسمعتنيش
يا ترى الي مانعك الموت
ولا في السكوت مابتحبنيش
***
وبخاف كل يوم
ياكل الزمن من ذكرياتنا
شوية الصور الباهتة
وحكايات هي اللي باقيالنا
دفا الشتا ونسمة الصيف
ذرة دموع بتكوي
خوف ووحدة وخريف
***
لو في قلبك كلام مع الزمن
قوله يحن
قوله يطبطب وما يئساش
قوله استنيت مروره
وهو حتى لسة ماجاش
لا راضي يسيبني في حالي ولا راضي يجيبني عندك
لا سابك ليا ضهر ولا سابني ليك سندك
قوله الضلمة صعبة قوي
ما بتنتهيش
والضي بعيد قوي
مابيجيش
والمر قايد نار
مابتطفيش
قوله يسيبني مايمسكنيش
قوله مهما الحب اتظلم
فالحنين حي وماتنساش
وبيأكدلي كل يوم
مايموتش إللي جوانا عاش
ليست هناك تعليقات:
إرسال تعليق