بدور عليك في وشوش الناس
وبين حروف كلامهم
جبت القسوة دي منين
اللي تخليك تجرحني قدامهم
جبت القلب الصعب منين
اللي يشوفني محتجالك
بصرخ باسمك وإيدي بمدهالك
ومع ذلك يسيبني أغرق
قدرت توجع قلبي ازاي
ده أنا والله من الكلام مش قادرة اصدق
أنا بحكي عن حد تاني
حد غيرك إنت أكيد
حد غير الطفل الهادي
اللي نام بين إيدي سعيد
اللي طبطب عليا يوم
ازاي يوم قدر يجرح
ويقف عليا كمان يتفرج
اللي وعدني إنه عمره ما هايسمح
يخلي الوجع مني يقرب
أنا ماكنتش طالبة منك كتير
كنت بس طالبة وجودك
كنت بس طالبة تغرسني وتد
جوة حدودك
أحس بجذورك بتشدني
بتثبتني جنب ضلوعك
ألمس بروحي ارضك
أمسح بحبي دمعك
أسمع دوى قلبك
نواجه الرياح سوا
عواصف قاتلة
تثبتني أكتر
أحضنك أكتر
تعدي الأيام والسنين
ونفضل قوة وفي وضعنا نكبر
طيب ارجع
لأَنِّي لسة محتجالك
لأن لسة روحي بتندهك
مشتقالك
ليست هناك تعليقات:
إرسال تعليق