بكلم نفسي يمكن تسمعني

أنا بنهار
أه بنهار
وبقيت بضحك ليل ونهار
أصل الحزن تعبلي قلبي
وتعبت أكتر من كلمة مالك
بقيت بضحك وأنا بسأل حياتي
ليه الحزن إيه اللي جرالك ؟؟
شوية ضحك وشوية حب
وأهي بتعدي ... أيام وبقضيها
دنيا وعايشة أنا فيها
لحد ما ييجي يومي اللي أكيد جاى
وأروح بقي مع اللي راحوا
اللي سابلولي الهم وارتاحوا
**********************************
أنا بنهار
حاسة بنار
بتحرق قلبي
وكل مدي بضحك أكتر
علي ما تُفرج
قاعدة أتفرج
عاللي هايحصل
أكتر وأكتر
بقيت بضحك عمال علي بطال
قلبي ها يقف من كتر الفرحة
فرحة بتبكى
حتى ابتسامتي شمتانة فيا
وعنيا بتبصلي بنظرة مش عادية
وبتقوللي....
إوعي تفرحي وتقوللي إنك حلوة
دي كلمة كده جت علي سهوة
اتقالت وخلاص مش فاكرينها
أصلا ... أصلا مش حاسينها
ومحدش واخد باله منها
لكن الحقيقة اللي بتظهر كل دقيقة
شكلك إسود
عقلك إسود
قلبك إسود
************
أه يا نفسي لو تبطلي تسرحي
في دنيا مش موجودة
فيها إيه لما تشوفي نفسك علي الحقيقة
نفس سودة
دم خفيف وذكاء قاهر
مع إنه قاهرني أنا بس
وخيال واسع بيغطيني
بقي بيعميني
مابقتش شايفة غير أوهام
وصدقتها وعشتها
راحت الغمة
وجت الصدمة
وأنا دلوقتي في عز الصدمة
ياهافوق ياهاموت من طعم العلقم
بقي بيتكرر
دايماً بيمرر
كل أحلامي
أه يا نفسي لو تسمعيني
أه يا نفسي لو تفهميني
أديني بقولك قدام الناس
حاولي مرة تعقلي
حاولي مرة تركزي
يمكن في يوم تعرفي
إِنك مخلوقة علشان تحزني
وحزنك ده يخرج الناس من حزنهم
يبقي إحزني
وبلاش تهربي
بس جربي
بلا أحلام بلا كلام فارغ
عيشي كده ... وموتي كده
خلاص ... استسلمي
إلحقيني يا نفسي ده أنا بنهار.