اللي منك واللي مني

اللي منك واللي مني 

شيء مش باقيين عليه 

واللي فينا واللي بينا 

نوصفه إزاي وبإيه 

واللي حصل واللي جرى 

حصل ازاي وامتى وليه 

وإزاي نحب وسط الم 

لما الحب يتحول ندم 

يتبقالنا من حلاوته ايه ؟ 

ولما نضعف 

ودموعنا تسبق كلامنا 

ولما نكفر 

بدنيتنا وأحلامنا 

ولا يتبقى في صدورنا غير شوية أوهام 

نعيش إزاي بأوهامنا !!

لو جرح بجرح 

وفراق بفراق 

سيبلي حلم أعيش ليه 

سيبلي أمل أعيش عليه 

مش لازم وانت ماشي 

تهدم كل اللي ببنيه 

لو ألم بألم 

وجراح بجراح 

سيبلي زهر العمر ماتقطفهوش 

يمكن يوم أرجع أسقيه 

ليه ؟

ديوان شعري اللي ياما شاف اسمك 

ولوحتي اللي ياما شافت رسمك 

نهاري اللي كان بييجي وقت ما تشرق شمسك 

وبسمتي اللي يوم اترسمت لما سمعت نبض همسك 

ليه اللقا حاسس ضياع 

ليه في شيء ما بينا ضاع 

ليه غلطنا 

واتخطفنا من قلوبنا 

واترمينا في قلب الصراع 

ليه في يوم ولو بهزار 

قدرنا نقول 

كلمة وداع 

ليه ما قدرنا ولا فكرنا 

نرمي همومنا 

وندوس عليها ... بقرار شجاع 

ليه شايلين ما بينا هم 

ليه شايفين السعادة وهم 

ليه الحب اتحول سهم 

شق قلوبنا 

وعلى آلامنا ضم 

ليه يوم ما دوقنا طعم اللهفة 

اكتشفنا اننا بناكل 

في البُعد بنهم 

ارجع

ارجع

حتى لو قالولك إن رجوعك

درب من دروب المستحيل

وبلاش تخضع

مهما قالولك

ان خضوعك

مالوش بديل

واسمع 

دقة القلب اللي جوايا بتدوي 

صرخة ألم غصب عني 

بتعوي 

واعرف 

إن أي لمسة غيرك بتكوي 

مهما سمعتني بقول أنا بخير 

اعرف إن حضنك بس اللي ليه 

تأثير 

اني لسة بعيش في أيام 

كانت فيها بُعدك

 مستحيل 

إني لسة بعدك 

بخبط في عتمة ليل طويل 

مفيش دليل 

تاه الدليل 

وألم الوحدة بعدك 

مالوش مثيل 

فارجع 

حتى لو قالولك 

إن رجوعك ... 

درب من دروب المستحيل

كره الحياة

انتي اللي بتمسحي كل خط خطه الحزن على ملامحي

انتي اللي بإيديكي بتطبطبي وتطيبي جرحي

ياللي اكبر قسوة عندك إنك تسامحي

ليه تموتي

ليه الانكسار 

ليه البكا لحظة فراق

ليه الانهيار 

ليه الضحكة متكلفة

مليانة اسرار 

ضحكة بائسة

بتشق طريقها كما النار

ليه ماتت على شفايف الأمل 

كل الأزهار 

دبلت من وجع وألم 

ولا ده مش اختيار 

كله إجبار 

تضحكي في وش البؤس وتطبطبي

وبنفسك على نفسك تستشهدي

ليه روحك كلامها بيقتل

وليه تشهدي

وليه بعد الألم تشهقي

هو الألم بيضيق الصدر 

ولا الوجع ... قلة الأمل خلوكي تزهقي 

الزهق بقى من الوجع؟ 

ولا من الحياة كلها 

يبقى كره النور والأمل تاني من جواكي رجع

في المساء

ليلى يا بنت السماء

ستقضين الليالي وحدك 

تبكين 

وستعتادين الوحدة فتصمتين 

وستتعلمين نهاراً 

أن تخفي عن الجموع 

صوت الأنين 

ستتعلمين الصمت 

وكيفية النوم كما الموت 

ستتعلمين انتظار مرور السنين 

دون حب أو مقت 

كما تمثال قد الحجارة 

أبدع فيه مثّال 

ينظرون له بإعجاب 

ولكنه في النهاية تمثال 

لا يعنيهم إن تحطم 

يطأونه بأقدامهم إن تهشم 

ويتكلمون أمامه عن أدق أسرارهم 

ظناً منهم أنه لا يفهم 

ليلى يا بنت السماء 

ستقضين بعض الليالي 

تحلمين 

بالحدائق الغناء 

وقوة الصحراء 

وتسابق الهواء 

ليبعثر شعرك القصير حول وجهك 

ليرسم لوحة من الحرية 

ناعمة وهوجاء 

ليلى يا بنت السماء 

ستظلي تتخبطين كل يوم نهاراً 

في انتظار المساء 

حين يجيء هو 

في ملابسه السوداء 

وملامحه القاتمة 

التي تلين بين أصابعك 

ولمساتك الشعواء 

ستقضين الليل بين ذراعيه 

يصلح صدره بك ما أفسده الجفاء 

تستمعين له وحده 

فأنتِ دونه صماء 

تتكلمين له وحده 

فأنتِ دونه بكماء 

تذرفين له دموع الشوق 

فهو الأحق بالبكاء 

وحين يطلع النهار 

ستعودين تمثال قد الصخر 

في انتظار عودته 

في المساء 

ذكرى صديقي

في ذكرى صديقي الذي كان .. أنعي يومُ أولِ رأيتك فيه 

في ذكرى صديقي الذي كان .. أنعي قربِ لم أعد أشتهيه

في ذكرى صداقة كانت ومرت

في ذكرى أدمع تُذرف وأحزان استقرت

في ذكرى جراحك لي التي لم تشف

في ذكرى صداقة ما استمرت

في ذكرى يوم حزين

أنعي داخلي شئ ثمين

#أول_يوم_العيد

وردة حمرة

يوم ما جاتلي وردة حمرة ولمستها

وشفت على ورقها دموع فمسحتها

وحبيت أرسملها الفرحة فحضتنها

اتاري حضني كان قاسي ووجعتها

قعدت وردتي تتكلم 

وسمعتها

تحكي عن فرحها وحزنها

جت أحزانها تاخدها مني 

دمرت الأحزان وقتلتها

وجيت احضن وردتي لقيتها دبلانة 

يا ترى قتلها الحزن ... 

ولا انا اللي قتلتها ؟ 

البرد

وأفتح عيني من النوم 

أدور على النضارة 

علشان الدنيا تبان 

وأعمل قهوة على الريحة 

أركنهاعلى التسريحة 

جنب قلم الكحل المكسور 

اللي راسم خط إسود على الخشب 

خط مقطوع ومقهور 

وأغسل وشي من أثر النوم 

وأهيئ نفسي لاستقبال اليوم 

بأفراحه القليلة وأحزانه الكتيرة 

بدموعه الغزيرة 

واحباطاته اللي بتدوم

وأقعد في الضلمة مع قهوتي 

وأفكر فيك 

كنا فين ... 

بقينا فين ؟ 

طيب انت فين ؟ 

ازاي عشت بنفس الطقوس دي 

سنين 

ازاي كل يوم بفكر فيك 

ازاي فكري لسة شاريك 

ازاي فنجان قهوتي مش قادر ينساك 

زي ما قلبي مش ناسيك 

وتخلص القهوة اللي مرارتها 

بطعم بعادك 

ولونها لون الأيام

 بعد فراقك 

وتقيلة زي الكلام 

وقت سكاتك 

وحزينة زيي .. 

من غيرك 

لما اتحرمت من شمس الدفا 

واتحرمت من طيفك 

وسكن البرد الضلوع في الخفا 

وأعلن عن نفسه بالجفا 

قام النور لحظة بعدك مات 

والأمان في الضلمة اختفى 

لو بعادك عني سقم 

فرجوعك هو الشفا 

الشتاء

ومع كل دخلة شتا بفتكرك 

مع كل لسعة برد بشتقالك

مع كل مرة أمشي فيها تحت المطر 

بحتاج تكون موجود

بحتاجلك 

لا البرد ليه معنى من غيرك 

ولا الدفا بيفضل دفا برة قلبك 

وعارفة انك لا قادر تسمعني 

ولا احتياجي ليك واصلك 

اضحك من يأسك

اضحك لأن كلامك موجوع 

وابكي بس بصوت مش مسموع 

وحاول على قد ما تقدر 

تخبي الدموع 

اسكت وابتسم من تحت لتحت 

واضحك بصوت عالي لو سمحت 

الضحكة يعني فرحة 

حتى لو أخر الضحكة دمعت 

قول إنها دموع فرح 

ومن السعادة قلبك سرح 

إوعى تقول انك خايف 

وإن خوفك حاضر دايم 

وقدام عنيك شبح 

ولو نهيت ضحكتك بأه طويلة 

اعمل إن الضحك كتم النفس 

واكتم وجعك جوة ضلوعك 

لأخر نفس 

لا عمر الناس هاتعرف وجعك 

ولا هتدور على الألم 

اللي جواك اتحبس 

اعكس بؤسك ببسمة 

واوعى يأسك على ملامحك ينعكس 

اثبت حضورك

اثبت حضورك بكلمة 

تقولها لقلبي يصدقها 

بلمسة 

يتمناها حضني ويعشقها 

اثبت حضورك بنظرة 

تسرح فيها عيوني 

وأشوف فيها عمرك 

وعمري 

اثبت حضورك بأمان 

يحسه قلبي في حضورك 

اثبت حضورك بحبك 
واثبت حبك بوجودك 

مفيش

الموضوع أبسط من إني أموت 

أو أعيش 

وأبسط كمان من إني أطلب منك تفضل 

وماتمشيش 

الموضوع نلخصه في كلمتين 

إنك لا عمرك يوم حبتني 

أو حتى ما حبتنيش 

إني لا كنت عندك شئ جميل 

ولا شئ وحش

أنا كنت عندك مفيش 

إنك لما كنت بتنسى وجودي 

ده كان حقيقة ... مش تهويش 

إن لما دموعك اترسمت شوكة في حلقي 

ولما جروحك ألمتني أنا وكنت أبكي 

ده كله عندك ما يساوييش 

انك بعد سنين جيت تسألني 

يوم ما قررتي تموتي ليه ماموتيش ؟

انا ماموتش علشان بس أثبتلك 

إني من غيرك بس 

هاعيش 

بشتاقلك

أيوة بجيلك 

لما بلاقي خلص من الدنيا النور 

لما بلاقي بيني وبين الفرحة بحور 

لما ألاقيني بتبكي عيني

وبيني وبين الأمان 

ألف سور 

ساعتها بجيلك ...

حتى لو يوم مش هاتكلم 

وهافضل أبكي 

كفاية إني في وجودك مش بتألم 

في وجودك بتعلم

إزاي السكات ليه طعم الحنان 

أنا بلجألك ... 

مش بس لما بشتق لحضنك 

ممكن أكون بشتاق إني أنطق اسمك 

إني أرمي همومي ودموعي 

في كفك 

إني في يوم أرتاح في ضلك 

وتدفيني عنيك بشمسك 

المهم إني بشتاقلك 

وبحتاج لشوقك 

دايماً بحتاجلك 

حاكيهم

حاكيهم يا فتى عن عشقنا 

عن ليالٍ قضيناها في حُلم كالحُلم

عن نظرتك الثاقبة لأحضاني

عن قلبك الذي اخترق قلبي كما السهم 

حاكيهم يا حبيبي عن أشواقي 

عن نظراتي الخفية لك واستراقي ..

السمع لدقات قلبك 

حاكيهم عن احتراقي

عندما أمل في بُعدك الانتظار 

عندما احتضن مع انصرافك آلامي 

ويفتك بي الانهيار 

وكيف يقذفني بعدك الهوى

ولا اتنفس إلا عندما التقي بذراعيك

فهي في سقمي الدواء 

وما عليه القلب انطوى

حاكيهم عن أشعاري 

التي أرسم فيها ملامحك

حاكيهم عن دفاتري

التي مازالت تحوي رائحتك

عندما جلسنا في برد الشتاء 

ولا يدفئنا إلا نحن

نتلمس حروف هوجاء 

تحكي عن عشق هو لي كالهواء 

حاكيهم عننا 

حاكيهم عن حبنا 

حاكيهم عن عشقنا 

حاكيهم عن أنت وأنا

وجع

نتوجع ونفضل نخاف نتوجع 

ونصرخ ولا أي صرخة خوف من جوفنا ... 

تتسمع

ونسكت يمكن السكات يكون حل 

بس الحلول بتألم وتوجع

ولا النسيان كان يوم بيسكّن

ولا الضحك كان يوم بيشبّع

البحر

دموع بطعم ماء البحر 

قطرات تتوه داخل الموج

تموت كأنه يوم النحر 

وتنبت من جديد كأدمع 

وتُذرف من جديد .. 

كما السحر 

وفي سماء تبكي تحتها

وآهات كتومة تتلوى

فتبكيها النجوم 

من ألم صمتها 

وتعلو الأمواج بهدير غاضب 

تنتحب من أجلها

تصدم صخور من يأس في صوت مدوي

وتتناثر قطرات محدثة دبيب ضئيل

هو كل ما تبقى من صوتها 

وفي الأفق البعيد تتلامس الأمواج والسماء 

ليغلقا دائرة الحياة القاسية 

تكلمي عن آلامك 

أو استسلمي

للأمواج الفاشية

استسلمي لعناق صامت 

ساخن .. غاضب .. ساخط 

عناق بطعم الموت

يبتلع روحك في صمت 

وما بقى في أناملك من قوة 

تتحرك بهستيريا

لتبعثر آلام مقهورة

صمتت على أشياء وأشياء 

فلقبت بالصبورة

ولكنها في الحقيقة من آلامها 

خجولة 

لم تعد تملك إلا الاستسلام 

وأسلمت جفنيها لحركة الهواء 

موت هو أو نصف موت

هي فقط كانت تتمنى أن ... 

تنام 

كان حلم

كان حلم

بس حلم

بس فيه معنى الحب

يمكن أول مرة من سنين

يبقى عندي حلم

وألاقيك فيه

قاعد جنبي

موجود قربي

واخدني في حضنك

ايدك على كتفي

حتى نفسك باخده كنفسي

وبعدين أبصلك

وأفكر أسألك

لسة كل حاجة فيك زي ما هي ؟

كل حتة في حضنك مكشوفة أو متدارية ؟

لسة هي هي ؟

لسة الدفا موجود ؟

لسة حضني مرسوم نجمة على عودك ؟

لسة شوقي جوة قلبك بيتنفس وجودك ؟

لسة ايدي قادرة تمسح من ملامحك همومك ؟

زي ما انت لسة مرسوم جوة قلبي حبيب

لسة لمستك لأي وجع دوا وطبيب

لسة قلبي بينادي في الخلا

على الهوى

وكان حضنك هو المجيب

شيء عجيب ...

لما تلمس روحك

في حضن حبيبك

إزاي تحس بوجودك

في حضن غيرك

بس غيرك هو انت 

حبيبك انت 

نفسه اللي خارج منه

بتاعك انت

زي ما روحك ملكه هو

وكل ما فيك في حضنه هو

برة وجوة

ملكه هو

اتنين ودابوا في الحنين

اتنين ناموا في حضن الهوا ...

عاشقين

هذا الذي

هذا الذي يأتي من أبعد نجمة في السماء 

هذا الذي لا ترى عيني غيره ضياء 

هذا الذي يحمل في مكنون عشقه 

كل الأفعال ... كل الأسماء 

هذا الذي من قبلته تعيش الأحياء

تتذوق الحب والصفاء 

فلا تأفل فيموت الحب صمتا

ويصبح قلبي أسير عشقك 

وقبلاتي لك شهداء 

حبك

أنا لا أخشى الحزن ما دمت أنت معي 
في أحضان هواك تموت أدمعي 
أنصت لدقات قلبك كالموسيقى 
تخبرني أنفاسك أن اسمعي 
وفي أحضانك يأمرني الهوى 
ان استمتعي
اقتربي من أنفاسي كوني معي

تشجعي

أنا لا أخشى الصمت في وجودك

ففي صمتك أحاديث بلا حدود

تنهل من كلماتك القلوب

تبتهل حد السجود

يبتعد في حضرتك الألم

ينكمش البؤس ولا يعود

ولسيرتك الأولى يكون المأوى

ننتظم أنا وقلبي في سيرنا لعشقك

كما الجنود

أنا ونفسي وكل ما لي

في هواك بعضٍ من جندٍ

لا نملك أمام قبلتك أي صمود

لا نملك إلا الذوبان بك

تنهار أمام عشقك كل السدود

ونحيا على فقط على حبك

وتظل أحلامي على هيامي بطيفك

شهود

الخوف

ومن الخوف بنحفر حفرة

ومن الرعب تكبر أكتر

وتبقى فجوة

ونقع فيها من مجرد فكرة

ونفضل نقع وسط الكوابيس

لحد ما فجأة

نخبط في صدمة

وقاعدين نقابل في علامات

بس لا فاهمين

ولا عاوزين نفهم

ولا قادرين نستوعب إنها علامات

لبكرة

 ونضحك على روحنا ونقول عايشين في فرحة 

واحنا مستنيين الألم 

يقضي على الخوف 

بس تيجي الصدمة لما نلاقي الألم 

قضى على وهم الفرحة 

وساعات تبقى في قلوبنا 

فرحة خايفة ومرعوبة 

وكأن الفرحة في زمانّا 

لازم تبقى معيوبة 

أو تسبقها دمعة ألم 

ويمكن تلحقها دمعة ندم 

ونقطع وعد على جراحنا 

ما نكرر الفرحة 

ولا نفكر يوم نسرقها 

من قلب الخوف .. 

والشجن