الخوف

ومن الخوف بنحفر حفرة

ومن الرعب تكبر أكتر

وتبقى فجوة

ونقع فيها من مجرد فكرة

ونفضل نقع وسط الكوابيس

لحد ما فجأة

نخبط في صدمة

وقاعدين نقابل في علامات

بس لا فاهمين

ولا عاوزين نفهم

ولا قادرين نستوعب إنها علامات

لبكرة

 ونضحك على روحنا ونقول عايشين في فرحة 

واحنا مستنيين الألم 

يقضي على الخوف 

بس تيجي الصدمة لما نلاقي الألم 

قضى على وهم الفرحة 

وساعات تبقى في قلوبنا 

فرحة خايفة ومرعوبة 

وكأن الفرحة في زمانّا 

لازم تبقى معيوبة 

أو تسبقها دمعة ألم 

ويمكن تلحقها دمعة ندم 

ونقطع وعد على جراحنا 

ما نكرر الفرحة 

ولا نفكر يوم نسرقها 

من قلب الخوف .. 

والشجن