كان حلم
بس حلم
بس فيه معنى الحب
يمكن أول مرة من سنين
يبقى عندي حلم
وألاقيك فيه
قاعد جنبي
موجود قربي
واخدني في حضنك
ايدك على كتفي
حتى نفسك باخده كنفسي
وبعدين أبصلك
وأفكر أسألك
لسة كل حاجة فيك زي ما هي ؟
كل حتة في حضنك مكشوفة أو متدارية ؟
لسة هي هي ؟
لسة الدفا موجود ؟
لسة حضني مرسوم نجمة على عودك ؟
لسة شوقي جوة قلبك بيتنفس وجودك ؟
لسة ايدي قادرة تمسح من ملامحك همومك ؟
زي ما انت لسة مرسوم جوة قلبي حبيب
لسة لمستك لأي وجع دوا وطبيب
لسة قلبي بينادي في الخلا
على الهوى
وكان حضنك هو المجيب
شيء عجيب ...
لما تلمس روحك
في حضن حبيبك
إزاي تحس بوجودك
في حضن غيرك
بس غيرك هو انت
حبيبك انت
نفسه اللي خارج منه
بتاعك انت
زي ما روحك ملكه هو
وكل ما فيك في حضنه هو
برة وجوة
ملكه هو
اتنين ودابوا في الحنين
اتنين ناموا في حضن الهوا ...
عاشقين
ليست هناك تعليقات:
إرسال تعليق