عمرك فكرت إنك لما تموت أصحابك وأهلك هايقولوا عليك ايه وهايفتكروك بإيه ؟
يعني لو حطوا لوحة كدة فيها كام سطر هما سيرة حياتك هايكتبوا فيها ايه ؟
أنا عن نفسي الناس هاتكتب إن اسمي ندي نادي واحد من أغرب الأسامي اللي قابلوها، البنت اللي كانت مليانة تناقضات مقلقة ومطمئنة في نفس الوقت، البنت اللي في حد قال عليها متزمتة دينياً في حين إن في حد تاني قال عليها متسيبة دينياً، البنت اللي كانت بتعرف تاخد بالها من كل الناس إلا نفسها، وكان عندها القدرة انها تضحك كل الناس وتخليهم يبكوا برضه، حد من أوفى الصحاب اللي ممكن تلاقيهم بس برضه هاتلاقيها منعدمة الفضول إنها تعرف أي حاجة عن أي حد حتى أقرب الأقربين رغم ان لما حد بيحكي حاجة بتسمعه بمنتهى الاهتمام، البنت الي جربت الحب مرة وبعدها عرفت إن الشخصية اللي بتدور عليها مش هاتلاقيها فاكتفت بحياتها كدة، وأهم عيوبها ان ساعات بيبقي قلبها جامد ولما تقلب بيبقي قلبها اسود ولو انها بتقلب نادراً يعني.
بشكل عام الكلام ده صح ومش صح في نفس الوقت، ده الإطار العام لحياتك اللي هايقوله أي حد، أما القريبين والصف الأول في حياتك هايقولوا كلام مختلف هايقوله عن المواقف البسيطة اللي جمعتكم سوا واللي تتوصف بكلمة محدش يفهمها غيرهم هايقولوا عن عيوب ومميزات محدش جربها غيرهم، عارف انت لما تشوف لوحة زيت من بعيد وتلاقيها حلوة قوي ومكتملة وزي الفل وكل ما تقرب منها هاتلاحظ الشقوق اللي في الألوان كل ما تقرب الشقوق هاتكبر، الشقوق دي موجودة من الأول بس لازم تقرب علشان تشوفها، هما دول أصحابك القريبين بيشوفوا الشقوق دي، بس محدش هايشوف الشقوق دي في أوسع مداها إلا إنت.
انت الوحيد بقي اللي تملك كم هائل من الخبرات والذكريات والاخفاقات والنجاحات الصغيرة اللي محدش عرفها بس ساعات كانت بتخليك أسعد حد أو أتعس انسان
فاكر يوم ما دخلت الامتحان مش مذاكر إلا سؤالين ولقيتهم في ورقة الاسئلة؟
فاكر يوم ما روحت المدرسة مش حالل الواجب بتاعك واتفاجئت ان المدرس غايب؟
طيب فاكر لما في يوم كان نفسك تغيب من المدرسة وعمال تفكر في حجج الدنيا تقولها لمامتك لما تيجي تصحيك وإذا فجأة تروح عليها نومة وهي أصلا ماتصحكش ؟
فاكر يوم ما كنت خارج مع البنت اللي مرتبط بيها وعمال توضب كل حاجة في الخروجة وفي الاخر وانت جاي تلبس تكتشف ان التشيرت اللي انت عاوز تلبسه مامتك حطته في الغسيل ؟
فاكر يوم ما جيت تنزل فيلم علي الكومبيوتر والداونلود جه عند 99% وراح فاصل ؟؟
فاكر يوم ما صاحبك قعد يتصل بيك علي الموبايل وانت مش بترد وهربان منه راح مكلمك علي البيت ومامتك قالتله ثانية واحدة هاناديله ؟
طيب فاكر لما قعدت تحوش علشان تجيب حاجة معينة وفي الاخر لقيتها غليت أو الفلوس ضاعت منك ؟
يمكن كلها انتصارات واخفاقات بسيطة لو قعدت تحكيها لحد مش هايهتم بيها أصلاً بس هي بالنسبالك الدنيا واللي فيها لأنك في لحظات كنت أسعد حد وفي لحظات تانية كنت أتعس انسان وكلها مشاعر ماكانتش بتستمر أكتر من دقايق وبتتنسي، هي كدة الذكريات بضاعة بالنسبالك ما تتمنش بمال وبالنسبة لغيرك حرام يضيع فيها وقت أصلا يسمعها منك
المهم بقي ان بعد موتك الناس مش هاتفتكر ذكرياتك دي ... مش هايفتكرها إلا عاشوها معاك ومش كلها ومش دايماً ده لو أصلا افتكروها، الناس مش هاتفتكر إلا الخطوط العريضة في حياتك وذكرياتك، خلي بقي الخطوط بقي العريضة في حياتك مبهجة، حتى عيوبك خليها ماتضربش الناس في مقتل، خلي حياتك وانت عايش ووانت ميت سيرة عطرة عند الناس، خلي لما اسمك ييجي يتقال الله يرحمه كان انسان كويس والله يا ريته كان فضل معانا، وبلاش يتقال عنك الله يرحمه بقي اذكروا محاسن موتاكم، لو مش هاتكسب من دنيتك غير حب الناس فده كفاية قوى، لو مش هاتكسب غير انك رسمت بسمة علي ملامح اللي عرفتهم فده كفاية، لو مش هاتكسب ساعدت في يوم انسان فده كفاية، ولو كسبت كل دول فإنت انسان محظوظ.
افتكر دايما إن اللي اللوحة اللي هاتتكب عنك لما تموت انت اللي بتحط سطورها وكلماتها في حياتك، ولما تموت الناس بس هاتنقل الكلمات دي مش هاتخترعها.
.jpg)
