طيب وأنا لما أتخنق أروح لمين ؟؟
أشكي لمين وأطلع همي فيه ؟
أقول لمين إني بحبه وإني طالع عيني في حبه
ومش قادرة أنساه ولا قادر قلبي يرميه
أقول لمين إني محتجاله
وأخرف بالكلام بين إيديه ؟
أقول مين عن القصة اللي واجعاني ؟
عن الغصة اللي في حلقي ممرراه وآلماني
أقول لمين إني بموت
وخايفة أغمض عيني من غير ما يكون قدامي ؟
هاعمل ايه وانا خايفة ؟
هاعمل ايه لما الدنيا تغمض عنيا
وأخبط في الضلمة مش شايفة
هاعمل ايه وأنا ضهري محني
وأنا قلبي مكشوف مش محمي
وأنا لهفتي مرمية والزمن عليها بيخطي
هاروح فين لما أتمنى أبكي
لما الزمن يحط عليا
طيب أنا تعبت من كتر ما بخبي
الضحك الكاذب بقى عبء عليا
مش عاوزة أطوح عيني بعيد
علشان أداري دموعي
ولا عاوزاها تنزل بحرقة
مش عاوزاها تاخدني معاها في ألف أزمة وألف غرقة
مش عاوزة طبطبة ... مش عاوزة همهمة
ولا حد حتى يتفهم موقفي
عاوزة شيء لسة ما تخلقش
عاوزة أنام ومانامش
أحلم وماحلمش
أضحك ومازعلش
بس برضه محتاجة أزعل
علشان لما اضحك أحس وفرحتي ما تدبلش
لو في حاجة اتكسرت بجد
فهي رغبتي
عاوزة ايه أنا ماعرفش
عاوزة كل حاجة وعكسها
عاوزة كلامها وصمتها
عاوزة كل الناس حواليا بس يا ريت أقعد لوحدي
وبزعل ...
لما الاقيهم حواليا وأنا من جوايا وحدي
عاوزة اموت دلوقتي
بس يا ريت أعيش لبكرة
تفكيري سابق وقتي
بس ماعنديش ولا فكرة
في نجاحات لسة ما تحققتش
ولسة في فشل هايوجعني
خايفة يوم أموت خرسة
وخايفة أصرخ ومالاقيش اللي يسمعني
وخايفة حد يسمع
خايفة حد يروح ويرجع
وخايفة على اللي يمشي ما يرجعش
خايفة أحبك
وخايفة أبطل ما حبكش
ليست هناك تعليقات:
إرسال تعليق