أنا ماخذلتكيش
أنا بس من غير حبك
أنا بس من غير حبك
مش عارفة أعيش
وعيوني بتقولك أرجوكي ما تمشيش
بس لساني مش قادر ينطقها
علشان قلبي شايف بسمتك
وانتي بتحضري شنطتك
وهاتسبيني وتمشي
يمكن ترجعي بعد سنين
ويمكن ما ترجعيش
ويمكن علي ما تفوقي
ترجعي ما تلاقينيش
بس أنا ماخذلتكيش
طيب ما لاحظتيش ؟؟
نظرة عين بدموع حزينة ؟
وايدي بتمسحها وضلوعي بتحاول تخبي آلامها
بس عليكي ما بتخبيش
طيب مافهمتيش
نظرة الرجاء؟
ماشوفتنيش
بصلي وبقول دعاء
كنت عاوزاكي موجودة وماتمشيش
***
كان نفسي أقولك محتجالك
أو لما تمشي أقول اني جايالك
بس بعدت المسافات
والكلام زي السكات
هانقول ايه ؟
كل كلامنا بقي خناقات
بيدبح جوايا معني جميل
ماشفتهوش
ماحسيتهوش
بس سمعت عنه
حتى السمع بتستكتريه؟؟
طيب انتي حاسة بإيه؟؟
حاسة بيا وأنا بعيد؟
قلتي في يوم إني محتاجة تضميني؟؟
أو بدفا وأمان تحسسيني؟؟؟
ده انتي المعني
ليه اتنازلتي ؟؟
اللي بينا بقي مشاعر سهلة
ايه .. اتخادتي؟؟
دي غلطتك
انتي اللي اتنازلتي
اتنازلتي عني في يوم
سيبتيني أخبط في العتمة
سيبتيني تاكلني الهموم
بقت الدنيا كلها ضلمة
وبقيتي زي الغريب
بتعرفي أخباري من بعيد
بينا سلامات
شوية مكالمات
خد وهات
***
ليه جاية تقولي اني خذلتك ؟؟؟
طيب قوليلي امتي وجعتك
ولا اقولك ماتقوليش
وتقولي ليه ؟
وتقولي ليه ؟
انتي أصلا مش جاية تسمعيني
انتي بس جاية تتهميني
فمش هادافع
كالعادة كنتي واحشاني
بس سامحيني
دلقتي علي مشاعري دش ساقع
ووجعتيني
واسمحيلي أقولك
انتي اللي خذلتيني
ليست هناك تعليقات:
إرسال تعليق