من شباك في القلب مفتوح
طل علينا إنسان مجروح
لا عارف يضحك ولا يبكي
ولا عارف يسكت ولا يشكي
بنظرة شايلة كتير وكلها هموم
ساكت ووشايل ذنب كاذب
وكأنه موصوم
ساعات نلاقيه بيضحك كأنه فرحان
بيكذب علينا وعلي نفسه
نلاقيه بيتنطط من الضحك
أتاريه بيضحك من يأسه
ساعات نلاقيها بيرسم بسمة متقطعة
بسمة ليها طعم الوجع ومدمعة
بسمة كشرخ في جدار صامت
صرخة في قلب الهم مسمعة
وساعات نلاقيه قاعد جنبنا
مصمم يسمعنا ويخفف همنا
مش مدينا فرصة نشيل عنه
من كتر ما هو بيشيل عننا
ساعات نلاقيه بيقول كلام
عن مشاعر وأحاسيس وأماني وأحلام
عن حاجات كانت حلوة ومررتها الأيام
عن حلم بدل ما يسعد بقي بيسبب آلام
ساعات نحسه قاسي وبيبعد
لا عاوز يكلمنا ولا يسمعنا
ولو كلمناه يبقي مش فاهمنا
ونحس إن قسوته وصمته بيجرحنا
فنبعد ونقرب تاني علي أمل نلاقيه بيحكي
فنلاقيه قاعد في الضلمة لوحده بيبكي
ولا عارف يسكت ولا يشكي
