ماتزعلش
لما تحلم بحاجة وماتتحققش
ماتزعلش
لما الحقيقة تبقي مرة فتحلم تنام
وتنام ماتحلمش
ماتزعلش
لما ييجي دورك تفرح
فتيجي الفرحة لحد عندك
وتموت وماتفرحش
ماتزعلش
لما تخطي في النار علشان حلم
والحلم يموت ومايفضلش
ما تتأثرش
لما تفضل تبني تبني
وتلاقي كله بيتهد
ماتتكسرش
لما تكون موجود موجود
وانت حواليك ولا حد
وماتزعلش
لما روحك تروح للضحكة
فتيجي بشهقة
وتكتشف إنك بتبكي
مابتضحكش
طيب إصبر
لأن رصيدك من الحزن بيخلص
ماتستعجلش
يمكن الجاي أحلي وأخلص
ماتخونش
يمكن الضحكة الصافية في الطريق
استناها
ماتستسلمش
اوعي تسيبها وتموت
استناها
ماتموتش
لسة في فرحة طفلة
ليه ما بتكبرش
هاتكبر لما ترعاها في قلبك
هاتكبر وتكون زهرة حبك
هتكبر لما تلاقيك دايماً واقف
ومابتقعش
لما تشوفك قوى علي الارض
وماتضعفش
لما تشوف الحب جواك
مابيتغيرش
ليست هناك تعليقات:
إرسال تعليق