مش هاكون
مش هاكون كذبة في عالمك المجنون
مش هاكون احتمال في دنيا الظنون
مش هاكون وهم حرية وأنا مسجون
مش هاضحك وأنا جوايا مقسوم
مش هاكون
مش هاكون غير إيد تطبطب وقت الألم
مش هارسم سعادة مغموسة بالندم
مش هاخلق من خوفي 100 تمثال وصنم
وأترمي في أرض الدموع تقتلني الشجون
مش هاكون
مش هاكون بسمة بتبكي علي حدودي
مش هاحط الزمن شوكة في عودي
مش هاودع الأيأم أو أقولها عودي
مش هاسلم عمري للأوهام وأقولها جودي
مش هاكون
مش هاكون طير طاير فوق السحاب
طاير بجناح من غير ريش وأمل كذاب
هو أصلاً مش طاير بعيد ولا فوق
هو الوهم من تقله بقي شبه السحاب
الوهم كتير والحزن عليه غّلاب
من غير أسباب
في روح ماتت وهي بتدق علي الحب الباب
وروحت عايشة شايفة الحب سراب
شكله جميل تحت الشمس
بس لا عطش يروي
ولا في الضلمة يضوى
ولا يعمل للسنين اللي بتمر حساب
مش هاكون
مش هاكون نقطة بكا تاهت وسط المطر
مش هاكون أمان مزيف عايش في قلب الخطر
مش هاكون حلم مات بعد ما اتقسم واتفطر
مش هكون طير وقع من عشه اتكسر
لما طار قش بيته راحت حياته هدر
مش هاكون
مش هاكون فكرة طالها النسيان
مش هاكون جسم حي غطيته الأحزان
مش هاتكفني دموعي ولا هاتبقي أحزاني أكفان
مش هاكون من مجرد واحد يتقال عليه إنسان
ليست هناك تعليقات:
إرسال تعليق