أنا النفس اللي في يوم إدالك الحياة
أنا النفس اللي خرّج من صدرك صوت الأه
أنا النفس اللي تاه منك ومادروتش عليه
ليه راجع تفتكر دلوقتي إنك مش لاقيه
ليه راجع تقول يا خسارة ؟
عارف فين الخسارة ؟
إن النفس ريحتك فيه
****
أنا القلب اللي كان في يوم بين ايديك
ضميت كفوفك عليه بقسوة
وغمضت عن وجعه عنيك
أنا القلب اللي نمت في حضنه أيام
اللي اتعلم علشانك يحب
واتحمل مرارة الأيام
اللي انت قلت عليه في يوم
استحمل ما لا يحتمل
من الآلام
جاي دلوقتي يا خسارة ؟؟
عارف فين الخسارة ؟
إنه بني في هواك أحلام
****
أنا الحلم اللي اتبني وحيد في العتمة
أنا الحلم اللي كبر حزين في الضلمة
ويوم ما فكر يفتح عنيه
لقي دليله في الحياة
ضربة ولطمة
فاستحمل وسكت
ويمكن مات
جاي دلوقتي تقول يا خسارة ؟؟
عارف فين الخسارة ؟؟
إنه مات من سكات
****
ليست هناك تعليقات:
إرسال تعليق