أنا بس مستنية الشتا
فصل الدموع والبكا
وقت ما تيجي رعشة البرد وألاقي ان مفيش دفا
دي رعشة برد ولا خوف ولا قلب علي نفسه جفا
أنا بس مستنية الشتا
علشان أستخبي جوة هدومي
تخبي وتداري همومي
بدا ما الاقيها قدام عيني
ممررة يومي
أنا بس مستنية الشتا
مستنية أمشي تحت المطر
مستنية أتخيل ... أو أفتكر
مستنية ألاقي ذكريات في ريحة أرض اتبلت
بالمطر
أو بالدموع
مستنية أحكي للمطر عن اليوم
وإزاي بس علي صوتها بيجيلي نوم
وازاي لما هي بتسكت بيسكني خوف
فأقلق وأقوم
أنا بس مستنية الشتا
مستنية الضلمة اللي بتيجي بدري
وأنا في حضنها اترمي وأنا بجري
أرمي همومي ... أرمي دموعي
أرمي وجع كان مخليني علي أخري
أحكي كلام ماتقالش لحد
ومايتقالش لحد
عن وجع اتفرد واتمد
عن شمس غابت يوم وماجتش تاني
وماسيبتش إلا البرد
انا بس مستنية الشتا
شمس الشتا اللي بتدفي
بسمة حزينة بتكفي
ونقطة هوى من قلوب صافية
بتطيب وتشفي
انا بس مستنية الشتا
ليست هناك تعليقات:
إرسال تعليق