لما يوم صحيت ولقيتني لوحدي
وسألت عليك
قالولي سافر
سافر ؟؟
ومش راجع
مش راجع ؟؟
قرر يهرب
يهرب ؟؟
من كتر المواجع
مواجع ؟؟
قرر يمشي
يمشي ؟
قرر يسكت
يسكت ؟
ولو ناديتي عليه
هايعمل مش سامع
كمان ؟؟
*****
فسكت وحطيت في نفسي
علي شوية ذكريات
ويمكن كمان أشغل نفسي
بدل كتر البكا والأهات
بصيت قدامي وقلت مش هارجع
ولا هابص علي اللي فات
ومن أول خطوة لقيتني بلتفت
وبقول مش قادرة
مكتفاني الأمنيات
وأنا كنت فاكرة
انها ماتت وبقت رفات
فناديت بعلو صوتي
وعارفة انك هاتسمعني
مهما كنت بعيد هاتسمعني
ومن اني أوصلك
مفيش حاجة هاتمنعني
بس لقيت صدي حزين بيرد
طيف إسود طلع قدام عيني
وبقي وبيني وبين خيالك سد
وقالي ......
ده سافر
سافر ؟؟
ومش راجع
مش راجع ؟؟
قرر يهرب
يهرب ؟؟
من كتر المواجع
مواجع ؟؟
قرر يمشي
يمشي ؟
قرر يسكت
يسكت ؟
ولو ناديتي عليه
هايعمل مش سامع
كمان ؟؟
*****
قررت بقي اني اتكلم
ليه أسكت أسكت
هو يعني السكات بيطمن ؟؟
ولا علشان الكلام بقي مؤلم
قررت أسأل فين الوجع ؟
فين العمر اللي طلع بينا لفوق
وعمره ما وقع
فين الحب اللي عيشنا في حضنه؟
مين اللي غلط ومين اللي شفع ؟
مين اللي جرح
ومين اللي استحمل
ومين اللي كان بينزف
ومع ذلك كان مستحمل
ومصمم يكمل
ومين اللي ضعف
ووقف
من غير سبب
مين اللي النهاردة
اختار الهرب ؟
أنا كمان هاهرب
بس لجوة
هاهرب لنفسي
نفسي اللي بتحميني
واللي هرب لبرة
بكرة لوحده يجيني
ليست هناك تعليقات:
إرسال تعليق