لما كنت زمان معنى الأمل
وروحت فجأة بعيد
ولما أجي أنادي عليك
وألاقي ضاع من حلقي الصوت
مش باقي غير الموت
إيه العمل ؟
يا معنى الأمل
لما ألاقاني تحت السما وحدي
ماليش ونيس غير ضلي
ماسمعش إلا صوت صمتي
اللي بقى كاتم على قلبي
إيه العمل ؟
يا معني الأمل
لما نحفر في الجراح
ونلاقي جراح
ولما ندور على اللي باقي
نلاقي الكل بسرعة راح
وحبة الوشوش الباقية
تايهة في ساقية
من همها
بقت ملامحها أشباح
إيه العمل ؟
يا معنى الأمل
لما التعب يلهيك وترقد
ولما الكلام يوجعك فتسكت
وتيجي يوم محاكمة عمرك
تلاقي قلبك ... أمل حبك
عليك بيشهد
إيه العمل ؟
يا معنى الأمل
والشهادة الزور
بتوجع
خليتك حزين مكسور
آهة جواك مكتومة
بس في ضلوعك بتسمع
ويوم ما تشتهي النوم
تترسم شوكة في حلمك
قاسية بتوجع
إيه العمل ؟
يا معنى الأمل
ليست هناك تعليقات:
إرسال تعليق