الدنيا كبيرة

الدنيا كبيرة بتلف بينا
يوم تلاقيك فوق غالب
ويوم تلاقيك مسكين مغلوب
دموعك تروي الطين
طير محبوس حزين
علي قدره مسحوب
حق تقرير مصيره
في أيد غيره
زى عمود سواري في سفينة
مهم بس من غير روح
أسد جسور محبوس
حزين مسكين متعوس
روحه تكسر في القضبان زئيره زئير شيطان
الدنيا كبيرة بتلف بينا
ساعات فرحانة
وكتير حزينة
ساعات علي وشها مرسومة طيبة
وكتير تلاقي ابتسامة لئيمة
دنيا غريبة فيها ناس من كل لون
واحد أبيض
واحد اسود
وواحد من غير لون
مالوش لازمة بس لازم منه
كتير في الكون
وده اللي تخاف منه
لا باين أصله ولا فصله
كذاب والكذب معشش
في مفاصله
تلاقيه بيحب بمنتهي النفاق
بس عشرته ما تتطاق
واللون الأسود كله غموض
ماتعرفلوش معلوم من مردود
جميل وودود بس بينه وبين الحب
حدود
الأبيض نقاء وطهارة
ذكاء ومهارة
طيبة مالهاش أخر
بس يا عيني
مش موجود
دنيا كبير بتلف بينا
ياما شفنها منها
ولسة ياما هاتورينا
ياما هانخسر فيها
ولسة هانكسب منها
بس في الأخر عايشينها
شايلين همومنا وساكتين
علشان عارفين
اللي هايشتكي هايروح فين
ومين هايدور عليه مين
مش عارفين
أدينا صابرين
دي دنيا كبيرة بتلف بينا
لحد ما نصبح ميتين