كانت صفحة بيضا مافيهاش ولا خط
كله بحر غريق ومافيهوش ولا شط
وفجأة جه قلبك ورسم فيها خطوط
والخطوط رسمت مراسي والمراسي يعني شطوط
كانت حياتي صفحة بيضا من غير أي خدوش
لا فيها لون اسود ولا احمر ولا أي رتوش
ليه جيت لونت حياتي
وانت عارف إنك مش باقي فيها
دي الألوان في بُعدك بقت وحوش
الخطوط في بُعدك غطت عنيا
لا بقيت شايفة غيرها ولا بقدر أشوف حواليا
الوجع لو جه أو اختفي ده مالوش أهمية
مليت من الوحدة في زحمة مالهاش صوت
مليت من الأه اللي مش بينهيها موت
مليت من ألم بيسمّع في ضلع بالأوهام متجبّر
مليت من حلم لا بقي بيروي ولا بيشبّع
مليت من أفكار مجنونة زي ما بتيجي بتروح من غير ما تودّع
وأعيش في فراغ مليان خطوط
خطوط رسمت مراسي والمراسي يعني شطوط
ليل وبيخطي فوق أماني كانت في يوم ليها حياة
وخطاوي الضلام تقيلة يا قلبي بتقتل جوانا الحياة
وتكرمش جوة أحلامنا ورقة بيضا
بقت من الخطوط أشباه
الضلام كاتم النفس والنفس كتم الخوف جواه
يا تري مين اللي رسم الألم ومين جوة حلمي سماه
ومين اللي رسم أول خط وأخد بياض الورقة معاه
ليست هناك تعليقات:
إرسال تعليق