عادي

عادي إن ملامحك يكتبوا عليها إسمك 
عادي إن عنيك تحمل صفة فيك
عادي إن الوجع يترسم علي ملامحك
عادي إن الألم يتنقل ما بين كفوفك
تيجي ترميه من علي كفك
يخنقك ويمنعك خوفك
عادي إنك تتوه بين رغبتك وظروفك
وعادي إن الحزن الكفيف
يفتح بس علشان يشوفك
عادي إن بسمتك تكون ملهية
عادي انك تتبسم
وبسمتك من الخوف مستحية
عادي إن تدور علي فرحة
تلاقيها في حضن الخوف مرمية
تيجي تفكر تعيشها تلاقيها ماتت علشان منسية
عادي إنك تبتسم ابتسامة بطعم الدموع
وترسم علي ملامحك اسمك
لجل ما تغطي علي وجع الخضوع
يمكن يتلهوا في قرايته
ومايفكروش يسمعوا أنة وجعك
اللي طالعة بصوت مسموع
الهمس ممنوع
لا تعترض ولا تمانع
واكتم وجعك جواك
حتى تنفجر من الألم الضلوع
المهم انك تبتسم وتلون شفايفك بلون الحياة
المهم انك تسمعهم
المهم انك توعدهم انك موجود
المهم انك ما تقولش ان في ألم جواك لا محدود
المهم انك تلون اسمك
اللي شوه شكل ملامحك