ماتخافش

مش قلتلك 

كل لحظة فرح 

هاتلاقي وراها 

لحظة جرح 

بتدبح نفس الفرح 

وبتقتله 

كل بسمة سعادة 

وراها جرح بزيادة 

شئ صعب وحزين 

لما يكون نصيبك كله انتظار 

والانتظار يعني نار 

يعني كل يوم بوجع 

مش عارف حتى مكانه فين 

كل يوم تلاقي أنين 

ومش عارف تداويه 

أخرك تداريه 

وتبكي 

يا تري بتبكي عليه 

ولا بتبكي من الوجع 

*** 

ماتخافش من الدنيا العتمة 

محدش بيموت من الضلمة 

لكن ممكن تموت في الضلمة 

لو كانت جوة القلب 

لو كنت بتحرق أيامك 

من غير فعل ولا ذنب 

لو لقيت كل السهل 

ييجي عندك يبقي صعب 

*** 

ماتخافش من الموت 

تموت يعني ترتاح 

لا يوم تستني اللي جاي 

ولا تتوجع علي اللي راح

لا يوم أحلامك تبهت 

ولا تتحل أشباح 

*** 

ماتخافش من الأيام 

ما هي هاتمر هاتمر 

وأيامك دايماً محسوبة 

وبتنقص من العمر 

عاوز العمر يفوت في البكا ؟؟ 

مش كفاية مرارة الانتظار ؟

لو دموعك تطول السما 

أو تاخد النسيان قرار 

وتعيش حتى لو يوم 

من غير مرارة الانتظار

بحبك

بحبك كلمة كانت كلمة حروفها متبعترة

أجمعها وانا قلبي بيدق وأسأل نفسي هاتطلع ايه يا تري؟
الاقي حاجة معناها مالي عمري بس حروفها صغيرة
ده حتى من صغرها فيها حروف متكررة
بحبك كلمة بقولها قدام ملامحك 

كلمة بقولها لصوتك ولشكلك

كلمة بقولها لطيبة وحنية قلبك 

بحبك كانت أول كلمة أحس بيها 

كلمة لا زمن ولا جراح قدرت تنهيها 

كلمة كل ما نخلص نقولها 

نبدأ من جديد نقول فيها

ساعات

ساعات بتحس إن جواك حاجة مش قادر تخرجها، كلمة وجعاك ومش قادر تنطقها، لا سكوت ولا كلام بيساعدك، ولا كتابة بتلحقك ساعتها، ساعات تحس إن جواك وجع طعمه غريب عن أي وجع تاني، بس لا طعمه مر ولا حلو، بس هو واقف في زورك مش بيتبلع ولا عارف تعيش بيه، ساعات تحس انك عشت كل اللي المفروض يتعاش وعملت كل اللي المفروض يتعمل وخلاص بقي اللي باقي من عمرك هاتقضيه في مكانك مش هاتتحرك، لأنك عملت كل المتاح ليك ولحياتك، فتتمني تموت علشان مش هايبقي في جديد، وساعات تحس إنك ماعملتش حاجة خالص وإن مفيش أمل تتحرك خطوة واحدة فتتمني برضه تموت بدل ما انت بتموت بحسرتك ملايين المرات في الدقيقة، ساعات ييجي علي بالك أمنية إنك تعيش حياتك ... نفسك تعيش حياتك عادي وطبيعي، وفجأة تفوق نفسك إن ده مش هايحصل، في ناس كل آمالهم يعيشوا بس اللي الناس بتشوفه طبيعي في الحياة ... الطبيعي ده بيكون أقصي أحلامهم، في ناس بيبقوا طلعوا بحياتهم وبشخصيتهم فوق زيادة عن اللزوم بس طلعوا مرة واحدة وبالتالي ماحسوش بالدرجات الدنيا، الناس دي لما الطبيعيين بيتفرجوا علشهم بيحسدوهم، هما قادرين يفكروا بعقلهم، عايشين كويس - من وجهة نظرهم - ، دماغهم حلوة بيقدروا يترفعوا عن الصغائر فيقدروا يسامحوا ويعدوا الغلطات وحلوين في النصايح وإنهم يسمعوا غيرههم، محبوبين، ناس كتير تتمنالهم الرضا يرضوا، بس مين يعرف إن الناس دي علشان توصل لكدة داست علي أحلامها العادية والبسيطة ... داست علي آلامها ومادتش لنفسها فرصة تعيش زي ما كانت بتدي الفرصة دي لغيرها، والسيئ بجد إن الناس اللي عايشة سعادة الدرجات الدنيا - بجانب إنهم مش مقدرين النعمة اللي هما فيها - فهما كمان بيستكتروا عليك اللي انت فيه وممكن كمان يعتقدوا انك لازم تساعدهم وده حق مكتسب ليهم، مع انهم لو يعرفوا إن أمنية حياتك بس إنك تعرف تنام بس تنام، حتى النوم إللي هو الفعل اللا إرادي في حياة أغلب الناس إنت محتاج علشان تنام طقوس خاصةً بقت تقريباً تابوهات في حياتك، علشان تضحك محتاج إنك كل حاجة تحسبها، علشان تاكل محتاج تستحضر نفس تاكل، كل فعل الناس بتعتبره من طبائع الحياة إنت بيحتاج منك مجهود، عمر ما حد هايحس بقيمة الحاجات البسيطة إلا لما يتحرم منها.

عارف

عارف إنت إحساس إنك بتصغر، وكل مدي بتصغر أكتر، احساس انك مدبوح وبتتفرج علي دمك وهو بينزف، بس مش قادر تتكلم أحسن الناس تاخد بالها إنك مدبوح وبتتوجع، عارف لما أحلامك تتحول لسراب وتعيش علي أمل إن السراب في يوم يرجع مجرد حلم تاني ومش مهم يتحقق بس المهم ترجع تحلم، ساعات كدة تغمض عنيك فتشوف قدامك شريط سنين عدت وفاتت وتلاقي نفسك اديت كتير لناس ماتستحقش، واللي استفدته إن سيرتك طيبة في كل مكان، ودي حاجة كويسة بس لوحدها ماينفعش تقومك من الوقعة اللي انت فيها.

ساعات كدة تتمني إن حد يبص في عنيك ويعرف ويحس إنك حزين فياخدك في حضنه وماينطقش ولا كلمة ولا يسألك عن حاجة ويفضل حاضنك لحد انت ماتعيط وتبدأ تحكي فيسكت خالص ولا يقاطعك لا علشان يفهم حاجة ولا حتى يستفسر فتفضل تتكلم تتكلم تتكلم وتبكي لحد ما يتقطع نفسك وبعدها تغمض عنيك وتنام، ساعتها بس ممكن ترجع إنسان تاني وتجدد قوتك علي التحمل حتى لو مشاكلك ماتحلتش، بس ده عمره ما هايحصل لأن عمرك ما هاتلاقي اللي يحسك من عنيك، ولا هاتلاقي اللي هايسمعك من غير أي مقاطعة أو رد فعل ولا حتى نظرة استغراب، وغالباً اللي هايسمعك ده هايتعاطف معاك يا إما هايعتبرك متخلف وعبيط، أو هايشتمك علشان جيت علي نفسك أحياناً وده من كتر حبه فيك، بس عمره ما هايفهم إنك فيك اللي مكفيك وإنك مش مستحمل حد يقولك كلمة وبعدين.

عارف لما تحس إن مشاكلك صغيرة بالنسبة للناس التانية لأن مشاكلك متعلقة بالإحساس ووجع بيقطع في قلبك، ودي حاجة مش بيفهمها أي حد، وبالتالي يا إما الناس هاتعتبرك تافه أو الكويس اللي فيهم هايعتبر إن الموضوع أبسط من إنه يتحكي، بس اللي محدش يعرفه إن وجع النفس بيأثر علي كل حاجة عملية في حياتك لان حياتك العملية اللي بتعملها نفسك، ومفيش إحساس أمر من إنك تنجح ومش حاسس بنجاحك، ولا إنك تكون فرحان ومش قادر تضحك من قلبك.

عارف احساس إنك في عز فرحتك مستني مصيبة لأن كل مرة بيحصل كدة وعلشان كدة انت مابتقدرش تفرح، مش علشان في مصيبة جاية لكن لأنه بيكون عندك شبه يقين إن المصيبة هاتيجي في الفرحة دي تحديداً، علشان كدة بتخاف تفرح بيها علشان عارف إنك شوية ومش هاتلاقيها.

الوردة الدبلانة

عارف الوردة الدبلانة

اللي دبلت من كتر الخوف 

ولسة عايشة قلقانة 

اللي عاشت ليالي طويلة بتحلم 

اللي لسة مش قادرة تتكلم 

اللي خايفها تقول علي أحلامها 

لا ماتتحققش

وتعيش حزينة وندمانة 

من الطبطبة وكلمة معلش

عارف الوردة الدبلانة 

اللي دبلت عطشانة 

ويوم ما لقت اللي يرويها 

مالقتش غير دموع 

لا تروي ولا تشبع 

بس بتكسر الضلوع 

عارف الوردة الدبلانة 

اللي كل ما دموعها تكتر 

تدبل أكتر وأكتر 

ما هي الدموع يعني 

أحزان وآلام بتكبر 

عارف الوردة الدبلانة 

اللي بتضحك كل يوم 

فالناس تفتكر ان ضحكتها غطت علي الهموم 

الوردة اللي ألوانها غطت كل العيون 

الوردة الدبلانة كل يوم بتتني 

كل يوم من الوجع بتنحني 

لما تشوف وردة دبلانة 

اعرف انها 

في الحزن غرقانة 

موعد كل أسبوع

إنه موعد كل أسبوع

عندما تنتهي كل الأعمال 

ويخلد الجميع للنوم

فلا أجد داخلي إلا أن أبكي 

وأظل أبكي طوال اليوم 

 وأحياناً لا أشتهي الدموع 

في موعد كل أسبوع

لا أشتهي سوى العودة للماضي 

أيام مرت بلا عودة 

وأصبحنا الآن بلا لقاء 

أحزان لا تغطيها سوى السماء 

تبيت ترتجف في العراء 

تتلحف بآمال واهمة 

لن تتحقق يوماً 

وتحاول أن تكتفي بالأحلام المستحيلة 

كما كانت تفعل دوماً 

كم هو صعب بل ومستحيل 

أن لا تجد للراحة يوماً 

سبيل ....

طابور

أدينا واقفين في الطابور

مستنيين ييجي علينا الدور 

يمكن يعدي علينا الفرح 

ويمكن يدوس علينا الحزن 

أكتر وأكتر 

يمكن تفضل أحزانا

ويا الحزن تكبر وتكتر 

الأصعب من الجراح والحزن 

لما الشكوى تبقي مش من حقك 

صدقني 

أصل الفرحة دي مش ليك 

مهما هايفضل الحزن يجرحني 

عمري ما هاقبل تبقي ليك 

فكر دايماً بعقلك 

حتي لو خلاك تحزن 

واوعي تفكر بقلبك 

لأن ساعتها جوة الحزن هاتسكن 

حتى البسمة المزيفة 

هاتتحرم منها 

وهاتبقي دموعك متكتفة 

ومش عارف تخلص منها 

مش يمكن بكرة تتعدل

وييجي علينا الدور 

ونخرج بقي من الطابور ؟ 

كلمة ورد غطاها

كلمة ورد غطاها

عاوزاها ولا مش عاوزاها

سيبك من اللي حواليكي 

المهم انتي جواكي 

حاساها؟؟

كلمة ورد غطاها

حاولي تفهمي نفسك 

وماتجريش ورا قضاها

إوعي  تخنقيها

وخلي كل الدنيا البراح

سماها

كلمة ورد غطاها

نفسك الحزينة 

مين سمّاها

مين نساها

الفرح والسعادة 

مين خلي أيامها 

جرح ومر بزيادة 

مين شال وحط عليها

مين جرح ودمع عنيها

مين حط الشوك في ايديها

وأدماها

دي كلمة ورد غطاها

يا تسيبيها تعيش 

يا تموتيها وتموتي وراها

Have no one

In fact...

you have no one

But in your dreams 

You only have one 

You only have yourself 

So, you must save your own soul 

And don't sacrifice for all 

Sometimes Sacrifice has bad effect 

In fact... 

It teaches some people 

How to be greedy 

So, you must be ready 

to go far away.. 

and disappear 

In the far way

There's no fear 

There's no pain 

When you stay alone

There's no heart hurt 

Your soul won't cry again 

Just be sure

That in fact 

You have no one 

Lost

Lose a hope .. what a shame
Like a picture without a frame
So any one can pass from Its outlines
And cut off her body
That's what the sadness can do to us
Like killing in darkness
so, you can't see the killer
Here you can be sure
That your life is cheaper ...
than you can live it 
And now ...
You must close all the open doors
Just for a while
Till you can find yourself again
Also you can pray to GOD
To save your brain
So as not to lose yourself
When you find it
because at this time you'll be lost
Forevermore 

العدل

وإحكم بالعدل عليا 

ولا العدل لسة ماجاش؟ 

احكم بالعدل علي عمري 

ولا عمري مايسواش ؟ 

احكم بالعدل علي قلبي 

ولا العدل في حالتي حرام 

احكم بالعدل وخليني أعيش 

حتى بس لو أيام 

احكم بالعدل 

يمكن يوم أرتاح وأنام 

لو عدلك يوم غاب عني 

وناوي تحكم ظلم 

فهمني 

ليه أصلاً عاوز تظلمني 

هو الظلم مش برضه حرام ؟؟ 

 

سد

قد ايه كانت في وجودك

فرحة مالهاش حدود

كانت عايشة جوة حدودك 

ولقت الوجود 

ليه بنيت السور العالي 

وبنيت سدود ؟ 

ليه رسمت أول خط خط اسود ؟

ده الخط جر وراه خطوط

غطت كل حاجة

 وبقت الأرض والحيطان سود 

يا تري ممكن نهد السد 

والحرية تاني تعود 

ولا أخر الحب السجن 

وأخر السجن أكيد الموت 

موتي القادم

موتي القادم

آتٍ آت 

أحيا ثملة 

حتى الممات 

أترنح ولا أفيق 

من تتابع الضربات 

أسقط وأعاود الوقوف 

متصنعة الثبات 

فيأتي الموت الجديد 

فأسقط مجدداً 

فيما يشبه السبات 

موتي القادم آتٍ آت 

وفي موتي تسقط الدمعات 

 لا يصدقون 

أني أحياً مجدداً 

من الرقاد 

فماتزال روحي 

تسكن الرماد 

فما يلبثون يلبسون السواد 

حتى يخلعونه عندما أعود 

كفاكم تصور أني أحيا 

ففي موتي لا اجتهاد 

فمنذ الموت الأول 

والروح هائمة كما الأشباح 

وتموت مجدداً 

إلي أن تنتهي الحيوات 

وموتي القادم آتٍ آت

من غير صوت

عايش ومقسوم 

عايش من الدنيا محروم 

بس لا ينفع يعيش فيها 

ولا يقدر يعيش محروم 

عايش موجوع 

وبدأ طريق مافيهوش رجوع 

نفسه ويصرخ 

ويطلع صوته في يوم مسموع 

وتدوس علينا أوهام العمر

 وتنزف جراحنا تعب ومر 

عايش أيام البكا 

وأيام البكا ما بتخلص 

والهموم بتعمل جراح 

والوجع يوم ما بينقص 

ليه الحزن لما بنفتكره بيكبر 

ليه الدموع لما نفتكرها بتكتر