عارف
أنا كنت بخاف أصحي في يوم مالقكش
كنت خايفة ماستحملش
كل ما تيجي الفكرة في بالي أهرب منها
ومافكرش
بس فضلت نفس الفكرة بتلح عليا
مابتزهقش
فضلت ليل ونهار تخنق فيا
وأنا ساكتة مابنطقش
لحد ما جه يوم وقالولي
حضري نفسك
بنلعب في الوقت الضايع
العمر خلاص كدة ضايع
والزمن جارح وبايع
ورغم إن النهاية كانت بتقرب
بس انا كنت مصممة ماصدقش
لسة في جويا أمل
هايفضل موجود حتى لو ماتحققش
ويوم ما حصل اللي حصل
شكلي فضل ثابت
ملامحي ماتهزتش
جوايا بتهد بموت بنهار
بس لساني ماتكلمش
أخدت جنب بعيد عن الناس
وبكيت
دموع محبوسة من شهور مانزلتش
دموع بتحرق وبتوجع
ومابتبردش
وفضلت تنزل لمدة شهور
مابطلتش
وبعدين دموعي نشفت
بس أنا ماهديتش
ولا جه عليا يوم ونسيت
لحد النهاردة أنا معاك
مانسيتش
ليست هناك تعليقات:
إرسال تعليق