بالحزن مفتون

وساعات يقولوا عليا بالحزن مفتون

وبالبكا والاشجان وكل ما هو ملعون

وساعات في عز فرحتي يطعني رمح مسنون

مليان آهات وتعب وجرح مسجون

وساعات بضحك وانا ببكي مُر السنين

وساعات اقتل جوايا كل معنى للحنين

وفجأة عيوني تطبطب عليا جوة مني 

وأضحك

فيستغربوا ويقولوا مجنون

ازاي بيضحك فجأة اللي قلبه 

بالحزن مفتون

أوقات يفكروني حزين

من أسباب الفرح محروم

او انا عكس كل البشر من أسباب الراحة معصوم

بس انا وصفي فاق كل توقع

انا اللي بالسعادة دايما مهموم

وبخيالات حزينة وسعيدة موهوم

وباجي مع كل غروب 

اعد لحظات الغضب والسكون

وبعدين اكتشف اني لسة ببدأ اليوم

ولسة جوايا قلب 

حزين والفرح فيه ساكن

ايوة انا حزني راح كل الأماكن

بس برضه بفرحي مسكون

وبأجمل ملامح الهيام ببكي حزين

اصل انا اللي بالحزن مفتون

حمل تقيل

ثم انا شايل حمل تقيل 

حمل قاتلني

بس بفرد ضهري بالكذب 

وكأن الحمل مش هاممني

ولا آلمني

ثم انا بكذب 

لأني بتعذب

بس بضحك وببكي في نفس الوقت

ومحدش يستغرب

وبعدين أهدى وقلبي يجمد

وأقول خليها تخرب

بكرة حتى الوجع يزهق ويسيبني ويهرب

ثم انا خايف جدا وحدي

بس مخبي

 قاعد في الضلمة متكلفت ومتغطي

ومداري وشي

يمكن أنسى ..

يمكن أهدى

يمكن لما أقوم تكون اتحققت أمنية والعمر فات وعدى.

خيالات

انت لسة موجود قدام عيني

وبفتكرلك حاجات تضحك

فأقعد لوحدي ابتسم واضحك

وفجأة اكشر

لما الاقيني بس بحلم

وابدأ ابكي لما اتخيلك من غيري بتضحك

او مش فارقة 

فأطلع شهقة 

ومن وسط دموعي

ومن وانا بكشر 

اقعد فجأة 

اضحك اكتر

مجروح

مجروح وجوة عيني

يبكي حنيني

يا ترى صعبان عليا حزني

ولا ضياع سنيني

وبسأل نفسي يا ترى اللي جاي ممكن يفرحني يوم

ولا برضه هايشقيني

وهي الفرحة ازاي كدة دايماً موجوعة

وإزاي دمعة الفرح برضه بتبكيني

وليه المرة دي انا محتاج ايد تطبطب

وحضن يواسيني

بس ساكت وهافضل ساكت

مهما اتحركت الدموع جوة عيني

أصلي مهما بكيت ولا حكيت

ده من الكسرة مش هايحميني

ولا يوم في ابتسامة صافية هاتترسم

ولا فرحة تاني ممكن ترضيني

كل حاجة اتلونت بلون حزن مكتوم

حزن ليه ريحة وطعم هموم

حزن يوم ما يلاقي حب

هايعتبره يوم مشئوم

وبقيت كاره الفرح والحزن

وكاره أكتر الدنيا

ومش عارف هي هانت عليا في سنين

ولا في هانت بس في ثانية

المهم انها هانت

وبقسوتها بقت بتغطيني 

شجرة واقفة لوحدها

دي شجرة حزينة وواقفة لوحدها

وحواليها ضباب كتير

الضباب مش مبين اللي جنبها

ومحدش بيكلمها يطمنها

انه لسة جنبها

حتى لو مش شايفين بعض

دي شجرة واقفة لوحدها

وحواليها فراغ من البُعد

دي شجرة واقفة لوحدها همومها محاوطاها

خلت لون السما زي الأرض

نص صورة

حطيت صورة باين قوي اني قسمتها اتنين

وعرضت نص واحد فالناس استغربت

النص التاني فين

فقلت انا لما الاقيه في الحقيقة 

هارجع النصين

والصورة ترجع واحدة 

قالوا وهايركبوا تاني ازاي ؟؟

قلت الصور بتتلزق

بس إحنا قلوبنا مش بتداوى

من الوجع والحنين

لما تفضل تبص على نص الصورة 

وتبتسم ابتسامة كلها أنين

مات الكلام

مات الكلام على لساني

ولسة حروفه وجعاني

لسة معانيه شغلاني

ماتت الحروف قبل ما أقولها 

واه لو بس أطولها 

هاحييها من تاني 

يمكن تفهم وجعي ووجعها

قبل ما ترجع تقتلها 

مات الكلام وسكت أنا 

لا بقدر اشرح ولا أوضح 

ولا بطعم المر أصرح 

إني أعلن إني بتألم منك 

لو تعرف ... 

دي حاجة بجد لوحدها تجرح

مات الكلام على لساني 

بلعت الوجع بأحزاني 

وبلعت اليأس بأوهامي

وفقدت الأمل بعد ما اليأس ملاني

إنك ممكن يوم ... 

ترجع لمكانك جوايا تاني

يوم الرحيل

اقترب يوم الرحيل

الذي ظننته بعيد جداً

بعيد لدرجة إني اعتقد أني منحتك العمر كله

للتفكير

لما تجبرني على خوض معارك لذلك اليوم

لا مناص ولا بديل

عندما أسترجع ذكريات اليوم

التي لم تحدث بالفعل

ولكني أعيشها كل يوم

وكأني جعلوه فإنجعل

هل تشعر بمرارة اليوم ؟

هل كنت تتوقع تلك النهاية ؟

هل كنت تراها في الأفق ؟

إذا لماذا حجبتها عني وتركتني فقط أستتمتع بهذا الشفق

هذا النور الوهمي

هذا الحب الصامت

...

للمرة الأولى أعلنها

سأفعل مثل الاخريات

سأصمت مثلهن

سأبكي وحدي مثلهن

وسأمثل على الاخريين الثبات

ولن أحزن أمامهم

فعندي من الذكريات

ما يجعلني أسرده في أعمار

وعندي من الحكايات

تكفي لعمرِ آت

ستظل موجود بين ثنايا كلامي فقط

أتلفظ اسمك بين الحين والاخر

فيعتصر قلبي ألماً

ويصرخ فمي ضحكاً

على تلك الذكريات

وسيأتي يوم يضحك فيه الجميع

تضحك أنت لابتعادك عني

أضحك أنا لابتعادي

يضحك قلبي لتحرره

من وهم الحب للأبد

من وهم وجود من هو فوق الجميع

فالأعلى كالالأسفل

لا يوجد ما يمنع انهيار أحدهم

فليس الحب بعد اليوم

بهذا السد المنيع