ماتعاتبنيش
على يوم اتمنيت حضنك
ولقيتك مفيش
ماتعاتبنيش
على حزني
وعلى اني اخترت نفسي وحضني
ماتعاتبنيش لما تلاقي ايديا
ايد بتمسح الدموع
وايد تطبطب وتقولي ماتبكيش
ماتعاتبنيش لأنها
نفس الايد اللي مالقتش
اللي يطمنها ويقولها ماتخافيش
ماتعاتبنيش
لما تلاقيني بسكت كتير
وبهرب من قدام عنيك
ولا اني حطيت همي في دموع كتير
وخروجة ومقابلة صديق
أصل الوحدة ساعات بتقتل
والحزن بيموت القلب اللي مالوش شريك
ماتعاتبنيش
لما أغير طقوس يومي
لما يكون بس لقاك
حلم بشوفه وسط نومي
لما أشيلك من حساباتي
لا ليك في فرحي ولا في همومي
ولما أنسى طعم لمستك
على ايدي وملامحي وهدومي
ماتستغربش لما ييجي عليا الوقت أشوفك مفيش
إنت اللي بدأت فماتعاتبنيش
ليست هناك تعليقات:
إرسال تعليق