من كتر ما انت بتسكت
كتير افتكروك أخرس
فيوم ما اتكلمت
شافوا منطقك رخيص وكلامك ليهم أرخص
وقالوا كلمتين ويعدوا
وبكرة ترجع تموت
وحروفك وكلامك يتهدوا
وترجع لقلب السكوت
من كتر ما انت بتضحك
فكروا دموعك تمثيل
ولو يوم حزنت
يبقى ده استهبال وتهويل
هاتفضل ماتضحكش كدة كتير ؟
مش مسموحلك انت ممنوع من التغيير
من كتر ما بتقف بقوة
مش قادرين يشوفوك ضعيف
لو في يوم وقعت هايقعوا وراك
ضعفك ده عندهم سخيف
ما ينفعش انت تموت
أمال مين اللي هايقفل باب اللعبة وراه
مين اللي ماسك بإيده الدليل
وفي وقت ضعفه هاتلاقي الكل تاه
انت مش ممكن تكون غير زي ما بيفكروا
فيك
انت مبدأ انت معنى
محدش عنك راح يستغنى
ولو يوم كسرك حزنك
راح يبكولك
ارجع مين غيرك راح يسمعنا
انت في قلوبهم رسول
حبهم ليك مش معقول
بس اوعى حزنك يغلبك
اوعى يوم تحتاج طبطبة
كدة الأوضاع متشقلبة
أرواحهم هاتنام مُعذبة
من امتى الشمس بتطلب الدفا
احزن زي ما انت عاوز
بس خلي أحزانك في الخفا
اوعى يوم تعلن عن ضعفك
احتياجك مش هيكون ليهم شفا
واسكت وابتسم
اعمل من سكاتك توب
والبس
أكدلهم إنك من كتر سكاتك
بقيت أخرس
ليست هناك تعليقات:
إرسال تعليق