أصعب وحدة انك تكون وحيد وسط الناس **
أصعب وحدة انك تكون وحيد من جواك بس **
أصعب وحدة اللي تحسها في حضن حبيبك **
كلام كتير قوى بنسمعه عن الوحدة وبقي بالنسبالنا زي كلام المناسبات والأشعار والجمل اللي بنكتبها في كل مكان زي "محدش بينجرح قوى إلا لما بيحب قوى، أو أنا ناقوس يدق ذاكرة النسيان، ونلاقي التوقيع تحت بدايةً من أمير الأحزان، لحد برنس الرومانسية والمعذبة والمجروح والكلام الفاضي ده"
بس لو بصينا للوحدة اللي بجد، هي أصلا ليه بتخوفنا قوى بعيد عن كلام الأغاني ده، الوحدة بتقتل جوانا الأمل، لأن كلنا بنستمد الأمل جوانا من حاجة تكسر الوحدة، لكن لما الوحدة تسود بيبقي مفيش حماس وطالما اتقتل الحماس يبقي مفيش أمل حاجة تحصل
الوحدة يعني المجهول، كلنا بنخاف من المجهول ومن اللي جاي بس لما بيكون عندنا أمل في حاجة بنحط أمل إن اللي جاي هايعوضنا، بس لما بنكون في وحدة عمرنا ما بنلاقي الأمل ده
الوحدة إنك تلاقي نفسك بتطبطب علي نفسك، وإنك رغم كلامك تحس انك وحيد، المقياس عمره ما كان عدد معارفك وأصدقائك، ولا حتى عدد القريبين منهم، لأن طبيعي يكون عندك ناس قريبين تحكيلهم وياخدوا بإيدك في مشاكلك، بس الوحدة انك يوم تكون محتاج تقول لحد انك خايف وتكتمها، انك تكون محتاج تطمن حتى لو بنظرة عين وتخاف تطلبها، رغم إنك محتاجلها قوى، الوحدة انك تخاف تعيط أحسن حد يسألك عن السبب، وإنت ماعندكش سبب، إنت بس جواك دموع نفسك انها تطلع قدام حد علشان يطمنك، بس تلاقي نفسك مش قادر تطلعها قدام حد فتطلعها مع نفسك وتلاقي دموعك بتنزل بأحلامك والأمل اللي انت عايش عليه، الوحدة إنك تلاقي نفسك بتكلم نفسك، إنك تخاف في يوم تتعرض لموقف صعب وتلاقي مفيش حد جنبك، أه هايكون في أصحابك وكل حاجة بس احساس الأمان فيهم مكسور لأن احساس الأمان اللي بجد حاجة تانية
ممكن ناس كتير تفهم إن الاحساس ده مش هايديهولك غير نصك التاني بس ده مش صح، ممكن يديهولك صاحب يبقي بالنسبالك غير أي حد وانت بالنسباله غير أي حد، ممكن يديهولك أب، أم حبيب أخ، المهم انك تلاقي معني في حياتك، حد تقدر في يوم تقوله انا خايف ومحتاج أطمن
احساس قوى جدا انك تمسح دموعك بإيديك، دي معناها القوة في ظاهرها معناها انا بس اللي ليا سيطرة علي نفسي، بس في باطنها قمة الضعف، لأن الإنسان القوى ده من برة بيبقي في أمس الحاجة إنه في يوم يلاقي إيد تانية تمسحله دموعه من غير ما تحسسه انه ضعيف، في ناس كتير بترسم القوة من برة علشان محدش يحسسها انها ضعيفة، علشان هي ماينفعش تبان إنها ضعيفة، احساس صعب قوى انك تلاقي حد قريب منك جه فجأة وحط راسه علي كتفك وقالك محتاج أطمن أو جه وقالك انه خايف ومحتاج يطمن بوجودك معاه، بيبقي
ساعتها جواك فيضان مشاعر، احساس سعادة انك مصدر أمان لحد، بالحب إنك بتحب البني أدم ده قوى، احساس بإنك انت كمان محتاج ده، وتحس ان جواك لهفة وشوق تعرف احساسه
بعد ما إنت ما طمنته ويبقي نفسك تحس الإحساس ده في يوم من الأيام
ــــــــــــــــــــــــــــــــــــــ
أنا ماعنديش كلام تاني أقوله
