شبح

 

عمرك جربت تعيش مع شبح
عمال بينزف إكمنه اندبح

ودموعه نازلة من الجروح
وبتجري وراه مكان ما يروح

عمرك جربت دموع الأشباح
اللي تلف حواليك وتخنقك كما الوشاح
عمرك جربت ابتسامة حزينة
وأمل تتمناه يجيلك دباح

أمل تتمناه وكارفك
وضاغط عليك وقارفك
لا قادر تنساه ولا تسيبه
ولا تروح عنده وتجيبه

ايه الفايدة انه يجرحك
ويقول بعدها انك حبيبه

ليه فاكر لما بايد تقتلني
وبالايد التانية تطمني
اني هاتطمن
ليه فاكر لما تدبحني
وبعدها تضمني وتفرحني
هاتلاقيني من الفرحة بتجنن

محدش قالك ان السعادة احساس
واني يوم ما هاحزن مش هالاقي للسعادة أساس
مهما عملت ساعتها خلاص
انا قلبي قفل

مهما حاولت تسعدني
بقت محاولاتك بتغرقني
كلمة حب منك بتخنقني
لا محاولات منك بترضيني
ولا بتتمني تشوفك عيني
ولا حبك دلوقتي قادر ينسيني

كل كلمة وجعتني في يوم
كل حزن كسرني
كل ذكري صعبة منك
بفتكرها وتقتلني

وسكاكين أحلامك اللي وجعت قلبي
أحلامك كانت بعيدة عني
تصدق ان طموحك كان بيخوفني
وكنت بسكت وبقول ان فرحتك بتفرحني

لكن لا فرحتي بتكفيك
ولا أحلامي بترضيك
فمتجيش تسأل عن قسوتي
واني في بعدك لقيت غنوتي
واني مصممة أعيش دنيتي

اه هاعيش
حتى لو مدبوحة هاعيش
هاعيش عيشة الأشباح
اللي ماينفعش تبكي علي روحها
ولا ينفع تتمني ترجع اللي راح