هاتكلم عن إيه ؟؟ مش عارفة
هاقول ايه ؟؟ مش عارفة برضه
كل اللي أعرفه إني هاكتب احساسي بشكل بسيط زي ما أكون بكلم نفسي، ياتري هانجح ؟؟؟ والله ماعارفة، مش عارفة، بجد مش عارفة.
*أنا بس نفسي أسأل سؤال؟؟ ليه الناس مابقتش واضحة ليه دايما اللي عاوز حاجة مش بيقول علطول وليه واقفين لبعض علي الواحدة ليه لما ممكن حد بيغلط غصب عنه مش بيلاقي اللي يسامحه، ليه الواحد لازم يفضل العمر كله يكفر عن غلطة أو يحور ويغلط عليها 100 غلطة علشان يبان قدام الناس كويس ؟؟
* هو ياتري أنا حد غريب لأني واخدة الدنيا ببساطة أوي ؟؟ الدنيا دي اتخلقت علشان نعيشها أنا بحب نفسي وبحب الناس كلها ونفسي بجد إن أعيش مرتاحة؟؟ دلوقتي أنا اتأكدت إني علشان أعيش مرتاحة لازم أعيش لوحدي وما أخرجش أبداً أو علي أحسن الظروف أعيش مع حد يفهم دماغي دي ، الدماغ اللي عندها استعداد انها تسامح أي حد علي أي حاجة بس المهم يكون من جواه حد كويس، وبما إني مالقتش الحد ده فبالتالي أنا مضطرة أعيش لوحدي، علي فكرة أنا ماقصدش إن الناس كلها وحشة بالعكس أنا أعرف ناس معرفتهم دي أجمل شئ حصلي في الدنيا ، بس أنا بتكلم علي نقطة واحدة الناس كلها عايشة الدنيا صراع محدش بيفكر يقف دقيقة واحدة يفكر هو عمل ايه واستمتع بيه ازاي، محدش بيفكر يقف دقيقة من عمره يشوف هو جرح إحساس مين علي فكرة إنك تجرح إحساس حد ده أصعب 100 مرة من إنك تقتله أو حتي تعذبه، لأن أصعب عذاب بجد هو اللي مانقدرش تعبر عنه، لما تكون مطالب إنك تكون بتتقطع من جواك ومع ذلك تكون مبتسم وعايش وتضحك مع الناس، علي فكرة أنا كنت طول عمري كان عندي القدرة دي بس للأسف أنا فقدت القدرة دي أو معظمها مؤخراً يمكن علشان مابقتش قادرة أستحمل الناس وهي بتجرح في بعض؟؟ يمكن علشان اتمليت فالفائض لازم يخرج مني، أول مرة أحس إني نفسي أعيط كتير كتير ومابطلش عياط، نفسي أخرج في مكان مفيهوش حد وأقعد أصرخ لحد ما أموت علي فكرة قالولي إن تمني الموت حرام ومع ذلك أنا مش قادرة أبطل إني أتمناه لأني لقيته حل كويس جداً للناس اللي زيي الي مش قادرين يتعايشوا مع الدنيا، ورغم إني ساعدت ناس كتير انهم يتعايشوا مع دنيتهم بس أنا بعلن فشلي إني ماعرفتش أعمل ده مع نفسي، ويمكن سبب فشلي إن الناس مابقتش صريحة كمان ياجماعة أنا بعلنها علي الملأ اللي عاوز مني حاجة يقول أنا بجد فقدت أجمل ما في حياتي يعني فقدت قدرتي إني أقدر أعيش من جوايا فقدت قدرتي علي الثقة في حد فقدت القدرة علي إني أبتسم من جوايا وبالتالي هاحاول إني ماخليش حد يحس بده، واللي يعزني بجد يدعيلي إني أخلص من كل الي أنا فيه ومن الدنيا واللي فيها وعلي فكرة عمر الموت ما كان شر وخاصة للناس اللي زيي.
ندي نادي
