عارف الطيارة الورق
اللي قعدنا نلعب بيها سوا
وعمر ما حد فينا زهق
فاكر لما مسكنا طيارتنا ؟
اللي قعدنا نلعب بيها سوا
وعمر ما حد فينا زهق
فاكر لما مسكنا طيارتنا ؟
بنسابق بعض وبنسابق الريح
وعمر ما حد فينا سبق
فاكر الشرايط الملونة ؟
لما جينا نقطعها وكنا مولعين بخور علشان ريحة الصمغ
وفجأة كل اللي في ايدينا اتحرق
وجينا نطفي الولعة الصغيرة علي الترابيزة
دلقنا مية وكله فجأة غرق
وقعدنا نضحك ونلم بسرعة
أحسن أهالينا ييجوا وتبقي ليلة ضايعة
طيب فاكر المصيف
لما كنا نحط في شنطتنا أول حاجة الطيارة الورق
ونفضل نجري بيها علي الرملة
وطياراتنا بينها وبين الطيور سبق
والهوا يجيبها يمين وشمال
وفجأة الهوا يروح تقع طياراتنا في الحال
ونحاول نطيرها تاني وبابا ورانا بيضحك ويقول محال
بس الهوا بيرجع وطياراتنا بتطلع لفوق
وتروح أبعد من الخيال
طياراتنا شافت الدنيا من فوق
واحنا شفنا الدنيا بعنيها
عدينا شط البحر للشط التاني
شفنا مراسي ومراكب شايلة أماني
شفنا ناس بتدوس علي التعب بالأغاني
شفنا أطفال بتلعب
وأطفال من مجرد النفس بتتعب
وشفنا ناس بتاكل أقل من طقتها
وناس بتاكل أكتر وكمان بتنهب
فاكر لما مامتك كانت بتنادي علينا علشان ناكل
وانت ماترضاش تسيب طيارتك
فتاخد الطيارة منك علشان تاكل
وتهددك انها هاتقطعها
فإنت تاكل بإيد وبالإيد التانية تمنعها
ونلاقي الساندويتشات دخل فيها رملة
بس احنا كنا بناكلها وبنخلصها كمان كاملة
بس علشان نرجع نلعب بطياراتنا الورق
عارف ....
كل ذكرياتنا
مكتوبة علي طياراتنا الورق
ليست هناك تعليقات:
إرسال تعليق